Hakim-Hakim 15:1-20
-
Ibalas Simson kalak Pilisti (1-20)
15 Bas pudi wari, paksa musim rani gandum, lawes Simson ndahi diberuna janah babana sada anak kambing. Nina, “Lawes ateku njumpai diberuku bas kamar.” Tapi la bere mamana ia masuk.
2 Nina mamana, “Kuakap segat atendu anakku e.+ Emaka kubereken ia man salah sada anak perana si nemani kam sange.+ Adekna saja man bandu, jilen nge adekna asangken ia.”
3 Tapi nina Simson, “Gundari, amin pe kuserang kalak Pilisti pasti lanai aku salahken kalak e.”
4 Emaka lawes Simson janah tangkapna 300 biang kerangen.* Kenca si e buatna dua biang kerangen e, persadana alu ngiket ikurna. Jenari tamana sada obor ku ikur biang kerangen si enggo iiket e. Bage banna man kerina biang kerangen e.
5 Kenca si e pegarana obor e jenari pulahina biang kerangen e ku juma gandum kalak Pilisti. Emaka tertutung kerina juma gandum e, la soal gandum si turah denga ntah pe si enggo iperani, termasuk kebun anggur ras kebun saitun.
6 Sungkuni kalak Pilisti ise si ngelakokenca. Lit si ngatakenca man kalak e, nina, “Simson si ngelakokenca, ia kela kalak Timnah, perban bereken mamana diberuna man salah sada anak perana si nemani Simson sange.”+ Emaka tutung kalak Pilisti diberu e ras bapakna.+
7 Kenca si e nina Simson man kalak e, “Adi bage kin ban kena, labo aku sinik seh asa kubalas kena.”+
8 Kenca si e bunuhina kalak e sada per sada, jenari lawes ia ku gua i Tebing Batu Etam janah tading ia i je.
9 Kenca si e reh kalak Pilisti ku daerah kalak Juda janah serang kalak e kuta Lehi.+
10 Dung e nina kalak Juda man kalak e, “Engkai maka serang kena kami?” Nina kalak e, “Nangkap* Simson ate kami ku jenda, balas kami ate kami ia bagi si enggo banna man kami.”
11 Emaka lawes 3.000 kalak Juda ku gua i Tebing Batu Etam janah ning kalak e man Simson, “La kin tehndu kalak Pilisti si erkuasa nandangi kita?+ Engkai maka bage banndu man kami?” Nina Simson man kalak e, “Bage kuban perban bage banna bangku.”
12 Tapi nina kalak e man bana, “Tangkap* kami ate kami kam janah bereken kami man kalak Pilisti.” Jenari nina Simson, “Ersumpahlah kena maka labo pagi bunuh kena aku.”
13 Nina kalak e man bana, “Labo, iket kami ngenca kam janah baba kami kam ku kalak Pilisti. Labo kam bunuh kami.”
Emaka iket kalak e Simson alu dua nali si mbaru, jenari baba kalak e ia arah tebing batu e.
14 Sanga seh Simson i kuta Lehi, ersurak-surak kalak Pilisti ngidah ia. Kenca si e megegeh ia iban kesah si badia Jahwe.+ Jenari nali si ngiket tanna enggo bagi benang linen si tertutung, janah lepas si ngiket tanna e.+
15 Kenca si e datna sada tulan rahang kelede si mbaru mate, buatna janah pakena e guna munuh 1.000 kalak Pilisti.+
16 Kenca si e nina Simson,
“Alu tulan rahang kelede, enggo kubunuh musuh-musuh janah kupegun-gun mayatna!
Alu tulan rahang kelede, kubunuh 1.000 kalak.”+
17 Kenca katakenna bage, ambekkenna tulan rahang e janah banna gelar ingan e Ramat-Lehi.*+
18 Kenca si e muas kel ia janah erlebuh ia man Jahwe, nina, “Enggo berekenNdu budakNdu enda kemenangen si mbelin. Tapi gundari arus kin aku mate perban muas janah serahkenNdu aku ku tan kalak si la isunat?”
19 Emaka ban Dibata sada lubang i kuta Lehi janah ndarat lau i je nari.+ Sanga inemna lau e, megegeh ia mulihi janah segar kapna. Enda me sebapna maka banna gelar ingan e En Hakor.* Ingan e lit i kuta Lehi seh asa gundari.
20 Lit 20 tahun dekahna ia jadi hakim bas Israel sanga jaman kalak Pilisti.+
Cataten i teruh
^ Enda jenis biang si gendek nahena, galang cupingna, janah licik.
^ Ntah “Ngiket.”
^ Ntah “Iket.”
^ Ertina “Bukit Tulan Rahang.”
^ Ertina “Sumber Lau Kalak si Erlebuh.”
