Hakim-Hakim 16:1-31
16 Bas sada wari lawes Simson ku Gasa janah idahna sekalak pelacur i je. Jenari masuk Simson ku rumah diberu e.
2 Nina kalak Gasa, “Reh Simson ku jenda.” Emaka ikepung kalak e ingan e janah cebuni kalak e i gerbang kota gedang-gedang berngi guna nyerang. Tetap kalak e i je perban nina kalak e bas pusuhna, ‘Kenca enggo terang kari wari, sibunuh ia.’
3 Tapi Simson medem seh ngasa tengah berngi. Kenca tengah berngi, medak ia janah cabutna pintu gerbang kota bage pe dua tiang ras palangna. Babana kerina alu barana ku puncak gunung si pengalana ku Hebron.
4 Kenca si e jatuh cinta ia man sekalak diberu i Lembah* Sorek si gelarna Delila.+
5 Emaka dahi penguasa-penguasa kalak Pilisti diberu e janah nina, “Tami-tami ia.+ Nce darami ja nari datna gegehna e, uga cara nalukensa, uga cara ngiket ia ras erban ia lanai ergegeh. Masing-masing kari kami mereken 1.100 logam pirak man bandu.”
6 Nina Delila man Simson, “Kataken min bangku ja nari rehna gegehndu e, janah kai si banci ngiket kam gelah kam talu.”
7 Nina Simson man bana, “Adi iketndu aku alu pitu nali panah si mbaru si lenga kerah, pasti lemah aku janah bali aku bagi kalak si deban.”
8 Emaka baba penguasa Pilisti e man Delila pitu nali panah si mbaru si lenga kerah janah iket Delila ia alu nali e.
9 Cebuni kalak Pilisti e bas kamar guna nangkap Simson, janah nina Delila man Simson, “O Simson, enggo reh kalak Pilisti!” Megi si e, minter retapken Simson nali e, nukah kapna bagi ngeretapken benang si kena api.+ Rahasia gegehna lenga tereteh.
10 Kenca si e, nina Delila man Simson, “Enggo tokohindu aku.* Enggo bualindu aku. Gundari kataken min kai si banci ngiket kam.”
11 Emaka nina man diberu e, “Adi iiket aku alu nali si lenga pernah ipake, pasti lemah aku janah bali bagi kalak si deban.”
12 Emaka buat Delila nali-nali si mbaru jenari iketna Simson alu nali e janah nina, “O Simson, enggo reh kalak Pilisti!” (Paksa si e kalak si atena nangkap Simson cebuni i kamar.) Megi si e mis retapken Simson nali ndai bagi ngeretapken benang.+
13 Kenca si e nina Delila man Simson, “Seh asa gundari tokohindu aku lalap. Bualindu aku.+ Kataken min kai si banci ngiket kam.” Kenca si e nina man diberu e, “Me lit pitu kepang bukku enda, arus tenunndu alu benang arah alat tenun nari.”
14 Emaka reh ketatna ban Delila kepangen buk Simson alu kayu si ipake guna nenun, jenari nina, “O Simson, enggo reh kalak Pilisti!” Emaka medak Simson janah cabutna kayu tenun e bage pe benangna.
15 Emaka nina Delila, “Ngena ateku kam nindu,+ kepeken ukurndu labo man bangku. Enggo telu kali aku tokohindu janah lalap la katakenndu ja nari gegehndu e.”+
16 Lalap sungkunina Simson tiap wari janah paksana ia. Enggo latih kel akap Simson janah mate atena.+
17 Dungna katakenna kerina man Delila, nina, “Bukku la pernah ipotong, perban mulai kin aku lahir* aku kalak Nasir man Dibata.+ Adi ipotong bukku, lanai aku ergegeh janah lemah aku bagi kalak si deban.”
18 Sanga teh Delila maka enggo kataken Simson kerina man bana, minter kirim Delila pesan man penguasa Pilisti,+ nina, “Rehlah kena, sebap enggo katakenna kerina man bangku.” Emaka reh penguasa Pilisti e ndahi ia janah baba kalak e sen man bana.
19 Ban Delila Simson medem bas ampunna, jenari lebuhna kalak guna motong pituna kepang buk Simson. Kenca si e mulai kendaliken Delila ia perban enggo bene gegehna.
20 Jenari nina Delila, “O Simson, enggo reh kalak Pilisti!” Medak Simson janah nina, “Enta kulepasken bangku bagi si sebelumna.”+ Tapi la tehna kepeken enggo tadingken Jahwe ia.
21 Emaka tangkap kalak Pilisti ia janah cungkil kalak e duana matana. Kenca si e baba kalak e ia ku Gasa janah iket kalak e ia alu dua rante tembaga. Ban kalak e ia jadi si nggiling gandum i penjara.
22 Tapi mulai ka turah bukna e kenca ipotong.+
23 Bas sada wari, pulung penguasa-penguasa Pilisti guna erpesta ras mpersembahken korban si mbelin man Dagon+ dibata kalak e, sebap ning kalak e, “Enggo serahken dibatata musuhta Simson ku bas tanta!”
24 Sanga idah kalak e ia,* ipuji kalak e dibatana, nina, “Enggo serahken dibatata musuhta ku bas tanta, eme kalak si ncedai negrita+ ras kalak si enggo munuh enterem temanta.”+
25 Perban meriah kel ukur kalak e, ning kalak e, “Lebuh Simson, gelah banci sitawa-tawai ia.” Emaka lebuh kalak e Simson arah penjara nari guna jadi pertawan kalak e. Ban kalak e ia tedis i antara tiang-tiang.
26 Kenca si e, nina Simson man anak dilaki si negu-negu ia, “Pediatlah kudadap tiang si nahan bangunen enda, gelah banci aku tertande ku je.”
27 Sanga si e, bas ingan e enggo dem i je dilaki ras diberu. Kerina penguasa Pilisti pe lit i je, janah lit kira-kira 3.000 dilaki ras diberu i datas atap si nonton Simson janah tawa-tawai kalak e ia.
28 Mindo Simson+ man Jahwe, nina, “O Jahwe Tuhan Si Meganjangna, inget min aku janah pegegehilah aku+ sekali enda saja. O Dibata, pediatlah kubalas kalak Pilisti guna salah sada mataku enda.”+
29 Kenca si e, sorong Simson duana tiang si nahan bangunen e, sada alu tan kananna janah sada nari alu tan kirina.
30 Megang Simson ngerana, nina, “Pediatlah aku mate ras kalak Pilisti enda!” Kenca si e sorongna asa gegehna, janah runtuh bangunen e. Dabuhi bangunen e penguasa-penguasa ndai ras kerina kalak si lit i je.+ Buen kalak si bunuhna bas wari ia mate e, asangken kalak si bunuhna segedang geluhna.+
31 Kenca e reh senina-seninana ras kerina keluarga bapakna ngelegi mayatna. Baba kalak e mayatna e janah ikuburken i antara Sora+ ras Estaol bas ingan kuburen Manoah+ bapakna. Lit 20 tahun dekahna ia jadi hakim bas Israel.+
Cataten i teruh
^ Ntah “La ergaindu aku.”
^ As. “mulai kin aku bas rahim nari.”
^ Mungkin maksudna patung e.
