Hakim-Hakim 17:1-13
-
Patung berhala Miha ras imamna (1-13)
17 Lit sekalak dilaki arah daerah pegunungen Eperaim+ nari gelarna Miha.
2 Nina man mamakna, “Sange bene 1.100 logam pirakndu me, Mak. Janah kubegi sumpahindu kalak si nangkosa. Situhuna aku nge si nangkosa, Mak. Gundari pirak e lit bas aku.” Megi si e nina mamakna, “Mbera-mbera ipasu-pasu Jahwe kam, Nakku.”
3 Emaka ulihkenna 1.100 logam pirak e man mamakna, tapi nina mamakna, “Kupebadia pirak e man Jahwe gelah banci pakendu guna erban patung pahaten ras patung logam.+ Emaka pirak e man bandu saja.”
4 Kenca ulihkenna pirak e man mamakna, buat mamakna 200 logam pirak, jenari berekenna man tukang pirak. Iban tukang pirak e patung pahaten ras patung logam. Kenca si e patung e itamaken bas rumah Miha.
5 Lit ingan ersembah bas rumah Miha. Ibanna sada epod*+ bage pe patung-patung berhala*+ janah pilihna salah sada anakna si dilaki jadi imamna.+
6 Sanga si e, la lit raja bas Israel.+ Kerina kalak ngelakoken kai si akapna benar.+
7 Lit sada anak perana arah Betlehem+ si lit i Juda, ia rehna arah keluarga Juda. Ia kalak Lewi+ si enggo ndekah tading i je.
8 Lawes ia arah Betlehem si lit i Juda guna ndarami ingan tading. Bas perdalanenna, seh ia bas rumah Miha si lit i daerah pegunungen Eperaim.+
9 Kenca si e nina Miha man bana, “Ja nari asalndu?” Nina, “Aku kalak Lewi arah Betlehem i Juda. Sangana aku ndarami ingan tading.”
10 Emaka nina Miha man bana, “Ras aku saja kam tading. Jadi penasehatku* kam ras jadi imamku. Kubereken kari sepuluh logam pirak tiap tahun man bandu. Kubere kari kam man janah kubereken ka sepasang baju man bandu.” Emaka masuk kalak Lewi e ku rumahna.
11 Setuju kalak Lewi e tading ras Miha, janah ia enggo bali bagi anak Miha.
12 Ipilih Miha kalak Lewi e jadi imamna+ janah tading ia i rumah Miha.
13 Kenca si e nina Miha, “Gundari enggo kuteh maka pasti mehuli kari Jahwe man bangku, perban kalak Lewi e enggo jadi imamku.”
