Hakim-Hakim 18:1-31
18 Sanga si e la lit raja bas Israel.+ Suku Dan+ sangana ndarami warisen guna ingan kalak e tading, perban lenga aloken kalak e warisen i tengah-tengah suku Israel seh paksa si e.+
2 Utus kalak Dan lima kalak arah keluarga kalak e guna mata-matai negri e janah guna engkelilingisa. Si lima kalak e eme kalak Sora ras Estaol+ si banci iandalken. Nina kalak Dan man kalak e, “Kelilingilah negri e.” Kenca seh kalak e i daerah pegunungen Eperaim, lawes kalak e ku rumah Miha,+ janah erberngi kalak e i je.
3 Sanga kalak e i deher rumah Miha, tandai kalak e sora* kalak Lewi si anak perana ndai. Emaka dahi kalak e ia janah ning kalak e, “Ise si maba kam ku jenda? Erkai kam jenda? Engkai maka kam tading i jenda?”
4 Katakenna man kalak e kai si enggo lakoken Miha man bana janah nina, “Upahina aku gelah jadi imamna.”+
5 Kenca si e ning kalak e man bana, “Cuba sungkuni Dibata, berhasil nge kari perdalanen kami e ntah lang.”
6 Nina imam e man kalak e, “Laweslah kena, ula mbiar. Jahwe si nemani kena bas perdalanen kena.”
7 Emaka berkat si lima kalak e janah seh kalak e i Lais.+ Idah kalak e maka kalak si tading i je keadanna seri ras kalak Sidon. Tenang akap kalak e janah aman akapna.+ Bas negri e la lit penguasa si nindas ntah pe si ngganggu kalak e. Kalak e ndauh arah kalak Sidon janah kalak e la erurusen ras kalak si deban.
8 Sanga mulih si lima kalak e ndahi senina-seninana i Sora ras Estaol,+ nungkun senina-senina kalak e, “Kai dage si idah kena?”
9 Ning kalak e, “Negri e seh kel jilena, emaka ota siserang kalak e. Ula kena ragu. Minterlah sirebut negri e.
10 Kenca seh pagi kena bas negri e, idah kena maka aman kel akap pendudukna+ janah mbelang daerahna. Enggo bereken Dibata negri e man banta, eme ingan si la kurang kai pe bas doni enda.”+
11 Emaka berkat 600 prajurit si enggo ersikap erperang arah keluarga Dan nari. Berkat kalak e arah Sora ras Estaol nari.+
12 Lawes kalak e janah erkemah kalak e i deher Kiryat Jearim+ si lit i Juda. Enda me sebapna ingan si lit i sebelah barat Kiryat Jearim igelari Mahane-dan*+ seh asa gundari.
13 Lawes kalak e je nari ku daerah pegunungen Eperaim janah seh kalak e i rumah Miha.+
14 Kenca si e, si lima kalak si pernah jadi mata-mata ku negri Lais+ ngerana man senina-seninana, nina, “Teh kena, bas rumah e lit epod,* patung-patung berhala,* patung pahaten, ras patung logam.+ Kai akap kena si arus siban?”
15 Emaka ngadi kalak e i je janah masuk kalak e ku rumah kalak Lewi ndai,+ i deher rumah Miha, janah sungkun kalak e uga beritana.
16 Sanga si e, 600 prajurit Dan+ si enggo ersikap erperang, tedis i gerbang.
17 Masuk dilaki si lima kalak si pernah jadi mata-mata ku negri e+ guna muat patung pahaten, epod,*+ patung-patung berhala,*+ ras patung logam e.+ Imam e+ sangana tedis i gerbang ras 600 prajurit si enggo ersikap erperang.
18 Masuk kalak e ku rumah Miha janah buat kalak e patung pahaten, epod,* patung-patung berhala,* ras patung logam e. Nina imam e man kalak e, “Erkai kena e?”
19 Tapi ning kalak e, “Sinik saja kam. La padah kam ngerana.* Ikut saja kam ras kami. Jadi penasehat* kami kam ras jadi imam kami. Apai kapndu pangen, jadi imam sekalak jelma bas sada rumah+ ntah jadi imam man sada suku ras man sada keluarga bas Israel?”+
20 Emaka meriah kel akap imam e, janah babana epod,* patung-patung berhala,* ras patung pahaten e,+ jenari lawes ia ras kalak e.
21 Kenca si e terusken kalak e perdalanenna. Ban kalak e anak-anakna arah lebe, asuh-asuhenna, ras barang-barangna si merga.
22 Kenca enggo ndauh kalak e arah rumah Miha, kalak si tading i deher rumah Miha pulung janah ayaki kalak e kalak Dan ndai.
23 Sanga erlebuh kalak e man kalak Dan, tulihken kalak Dan ku pudi janah ning kalak e man Miha, “Kai e? Maka enterem kena reh?”
24 Emaka nina Miha, “Enggo buat kena dibata-dibata si enggo kuban, baba kena ka lawes imamku. Kadeku pe lanai lit. Nce, uga maka ‘Kai e?’ ning kena ka.”
25 Nina suku Dan, “Ula sergang kena kami. Ula kari serang kalak si merawa enda kena, dung e mate kena ras keluarga kena.”
26 Emaka terusken kalak Dan perdalanenna, tapi Miha mulih ku rumahna perban idahna gegehen kalak e asangken ia.
27 Kenca buat kalak Dan dibata-dibata si enggo iban Miha janah buat kalak e ka imamna, lawes kalak e ku Lais+ eme negri si pendudukna tenang janah aman.+ Serang kalak e kalak Lais alu pedang janah tutungna kotana.
28 La lit si nelamatken kota e perban kota e ndauh arah Sidon nari janah pendudukna la lit si erurusen ras bangsa si deban. Kota e pe lit i lembah jang Betrehop.+ Kenca si e, bangun kalak e kota e mulihi janah tading kalak e i je.
29 Ban kalak e gelar kota e Dan+ bagi gelar bapak kalak e eme Dan, anak Israel.+ Tapi mbarenda gelar kota e Lais.+
30 Kenca si e, pajekken kalak Dan patung pahaten e+ guna kalak e, janah pilih kalak e Jonatan+ anak Gersom+ jadi imamna. Gersom e anak Musa. Jonatan ras keturunenna jadi imam seh asa penduduk negri e itaban.
31 Tama kalak e patung pahaten si iban Miha i je, janah patung e tetap i je sedekah rumah Dibata si benar lit i Silo.+
Cataten i teruh
^ Ntah “logat.”
^ Ertina “Perkemahen Suku Dan.”
^ Ntah “dewa keluarga.” As. “terapim.”
^ Ntah “dewa keluarga.” As. “terapim.”
^ Ntah “dewa keluarga.” As. “terapim.”
^ As. “Tutup babahndu alu tanndu.”
^ As. “bapak.”
^ Ntah “dewa keluarga.” As. “terapim.”
