Hakim-Hakim 19:1-30
-
Perbahanen seks si erban ciga ate arah kalak Benyamin i Gibea (1-30)
19 Paksa si e, sanga la lit raja bas Israel,+ lit sekalak kalak Lewi si tading bas pelosok si lit i daerah pegunungen Eperaim.+ Buatna gundik* arah Betlehem+ si lit i Juda jadi diberuna.
2 Tapi gundikna e la setia man bana, janah mulih ia ku rumah bapakna i Betlehem si lit i Juda. Tetap ia tading i je empat bulan dekahna.
3 Kenca si e dahi dilakina ia janah tami-tamina ia gelah nggit mulih. Baba dilaki e ka pelayanna si dilaki ras dua kelede. Emaka baba diberu e dilakina ku rumah bapakna. Sanga idah bapakna dilaki e, meriah kel ukurna.
4 Emaka petetap mamana ukur dilaki e gelah erberngi ia telu wari i je. Man ras minem kalak e janah erberngi ia i je.
5 Bas wari si peempatken, sanga medak kalak e bas pagi-pagi si lampas janah berkat atena, nina bapak diberu si nguda denga e man kelana, “Man kena lebe gelah lit gegeh kena. Kenca si e, berkat kena.”
6 Emaka kundul kalak e, janah ras-ras kalak e man ras minem. Kenca si e, nina bapak diberu e man dilaki e, “Erberngilah kena i jenda janah banlah uga kap kena meriah.”
7 Sanga lawes ate dilaki e, mindo lalap mamana man bana, emaka erberngi ka ia i je.
8 Bas wari si pelimaken, kenca medak ia bas erpagi-pagi si lampas janah lawes atena, nina bapak diberu e man bana, “Manlah kena lebe gelah lit gegeh kena.” Terus pedekah-dekah kalak e seh asa karaben, janah terus kalak e man duana.
9 Sanga lawes ate dilaki e ras gundikna bage pe pelayanna, nina mamana man bana, “Enggo kap ben, enggo nandangi gelap. Erberngi saja kena i jenda janah banlah uga kap kena meriah. Pagi, lampas kena medak jenari berkat kena mulih ku rumah* kena.”
10 Tapi, lanai nggit dilaki e erberngi i je emaka berkat ia janah seh ia i Jebusi, eme Jerusalem.+ Si ikut ras ia eme gundikna, pelayanna, ras dua keledena si lit pelanana.
11 Sanga seh kalak e deher Jebusi, wari enggo nandangi gelap. Emaka nina pelayanna man tuanna, “Uga adi ngadi kita lebe i kota kalak Jebusi enda janah erberngi kita i jenda?”
12 Tapi nina tuanna man bana, “La kita banci ngadi bas kota kalak asing si la kalak Israel. Terus saja kita lawes ku Gibea.”+
13 Kenca si e, nina man pelayanna, “Ota lawes kita ku salah sada kota ah. I jah kari kita erberngi, adi la bas Gibea, bas Rama.”+
14 Emaka terusken kalak e perdalanenna, janah matawari enggo mulai terbenam sanga seh kalak e deher Gibea eme kota kalak Benyamin.
15 Emaka ngadi kalak e i Gibea janah erberngi ate kalak e i je. Sanga masuk kalak e ku kota e, kundul kalak e i lapangen kota, tapi la lit sekalak pe si ngajak kalak e erberngi i rumahna.+
16 Tapi sanga berngi, lit dilaki si enggo metua si reh juma nari. Asalna daerah pegunungen Eperaim nari+ janah enggo ndekah ia tading i Gibea. Tapi penduduk si tading i kota e eme kalak Benyamin.+
17 Sanga idah dilaki si enggo metua e kalak e bas lapangen kota, nina, “Ja nari kena e, ku ja ate kena?”
18 Nina kalak Lewi e, “E denga kel kami arah Betlehem si lit i Juda, ate kami mulih ku kuta asalku, daerah pelosok si lit i pegunungen Eperaim. Sebelumna, lawes aku ku Betlehem si lit i Juda,+ janah gundari lawes ateku ku rumah Jahwe,* tapi la lit si ngajak kami ku rumah.
19 Bias nge nggala ras pangan man kelede kami,+ janah bias nge roti+ ras anggur man bangku ras diberu enda bage pe man pelayan kami. Cukup nge kerina si iperluken kami.”
20 Tapi, nina dilaki si enggo metua e, “Ota ku rumahku kita! Kubereken kari kai si iperluken kena. Tapi ula kena erberngi bas lapangen kota.”
21 Emaka babana kalak e ku rumahna janah berekenna kelede-kelede e man. Kenca si e, cuci kalak e nahena jenari man ras minem kalak e.
22 Sanga meriah-riah akap kalak e, reh dilaki-dilaki si jahat bas kota e janah kepungna rumah e ras tuktukina pintu. Nina kalak e man dilaki si enggo metua si mpuna rumah e, “Baba ndarat dilaki si reh ku rumahndu ena, gelah erhubungen seks kami ras ia.”+
23 Emaka ndarat si mpuna rumah e janah nina, “Ula bage senina-seninaku. Jahat kap adi bage. Dilaki e tamu bas rumahku. Ula kena pemela-melaken.
24 Lit anakku singuda-nguda janah dilaki e pe lit gundikna. Kubaba kari kalak e ndarat, janah banlah uga ate kena ban kena man kalak e,+ tapi ula lakoken perbahanen si la meteh mela man dilaki e.”
25 Tapi la begiken kalak e dilaki e, emaka tarik kalak Lewi e gundikna+ janah babana ku darat jenari berekenna man kalak e. Perkosa kalak e ia janah siksana gedang-gedang berngi seh ngasa erpagi-pagi. Kenca enggo nandangi terang, suruh kalak e diberu e lawes.
26 Bas pagi-pagi si lampas, reh diberu e janah ampar ia i pintu rumah dilaki si enggo metua ndai si i je dilakina erberngi. Ampar ia i je seh asa terang.
27 Sanga medak dilakina erpagi-pagi, janah bukana pintu rumah e guna nerusken perdalanenna, idahna diberu e eme gundikna ampar i lebe-lebe rumah e janah tanna enggo seh i lebe-lebe pintu.
28 Emaka nina man diberu e, “Iah medakken, ota kita lawes.” Tapi la ia ngaloi. Angkatna diberu e ku das kelede jenari babana ku rumahna.
29 Kenca seh ia i rumah, buatna piso* jenari potong-potongna mayat gundikna e jadi 12 potong. Kenca si e, kirimna sada potong ku tiap daerah Israel.
30 Kerina si ngidahsa ngataken bagenda, “La pernah terjadi ntah pe siidah si bagenda, mulai kin kalak Israel ndarat arah Mesir nari seh asa gundari. Ukurilah kerna si e janah cakapken,+ jenari kataken kai si arus lakoken kami.”
Cataten i teruh
^ As. “kemah.”
^ Ntah banci saja “janah aku ngelayani bas rumah Jahwe.”
^ Piso e ipake guna nggeleh binatang.
