Hakim-Hakim 2:1-23
2 Kenca si e, lawes malekat Jahwe+ arah Gilgal+ nari ku Bokim janah nina, “Kubaba kena ndarat arah Mesir nari ku negri si Kujanjiken alu sumpah man nini bulang kena.+ NingKu ka man kalak e, ‘Ndigan pe labo Kulanggar janjiKu man kena.+
2 Arusna la ban kena perjanjin ras penduduk negri enda+ janah arus hancurken kena ingan nutung* persembahen kalak e.’+ Tapi engkai maka la begiken kena kataKu?+ Engkai maka lakoken kena bage?
3 E me sebapna bagenda ningKu, ‘La Kupelawes kalak e arah lebe-lebe kena nari.+ Kalak e jadi jerat pagi man kena+ janah tadingken kena pagi Aku perban dibata-dibatana.’”+
4 Kenca ikataken malekat Jahwe kata-kata enda man kerina kalak Israel, megang sora kalak e ngandung.
5 Emaka gelari kalak e ingan e Bokim,* janah persembahken kalak e korban man Jahwe i je.
6 Sanga suruh Josua kalak Israel lawes, lawes kalak e ku taneh warisenna masing-masing guna ngerebut negri e.+
7 Terus sembah kalak Israel Jahwe segedang geluh Josua, bage pe segedang geluh peminpin-peminpin si nggeluh denga kenca Josua mate, ras si meteh kerina perbahanen Jahwe si luar biasa man kalak Israel.+
8 Kenca si e mate Josua anak Nun, pelayan Jahwe. Mate ia bas umur 110 tahun.+
9 Emaka ikuburken kalak e ia bas taneh warisenna i Timnat Heres+ si lit i daerah pegunungen Eperaim, i sebelah utara Gunung Gaas.+
10 Dungna kerina kalak Israel bas jaman e enggo mate janah keturunen kalak e la nandai Jahwe ntah pe la meteh kai si enggo lakokenNa man kalak Israel.
11 Emaka lakoken kalak Israel kai si jahat menurut Jahwe janah sembah kalak e Baal.+
12 Bage me kalak e nadingken Jahwe Dibata nini bulangna, si maba kalak e ndarat arah negri Mesir.+ Ikuti kalak e dibata-dibata si deban eme dibata si lit i sekelilingna,+ janah mungkuk kalak e nembah man bana. Iban kalak e Jahwe sakit hati.+
13 Tadingken kalak e Jahwe janah sembahna Baal ras patung Astarte.+
14 Merawa kel Jahwe man kalak Israel, emaka serahkenNa kalak e man perampok-perampok si njarah kalak e.+ SerahkenNa* kalak e ku tan musuh-musuh si lit i sekeliling kalak e,+ janah lanai kalak e ngasup ngelawan musuh-musuhna.+
15 Ku ja pe kalak e lawes, tan Jahwe ngelawan kalak e, banNa kalak e kena masalah+ bagi si enggo ikataken Jahwe ras bagi si enggo isumpahken Jahwe man kalak e.+ Mberat kel masalah si adapi kalak e.+
16 Emaka ipilih Jahwe hakim-hakim guna mbebasken kalak e arah tan perampok-perampok.+
17 Hakim-hakim e pe la begiken kalak Israel janah sembah kalak e* dibata-dibata si deban, jenari mungkuk kalak e man bana. Minter tadingken kalak e dalan si idalani nini bulangna si patuh man perentah-perentah Jahwe.+ Kalak e la seri ras nini bulangna.
18 Tiap pilih Jahwe hakim man kalak e,+ arak-arak Jahwe hakim-hakim e. Sanga nggeluh denga hakim-hakim e, selamatkenNa kalak e arah musuh-musuhna sebap mekuah ate Jahwe+ megi kalak e serko perban itindas+ ras isiksa.
19 Tapi kenca mate hakim-hakim e, lakoken kalak e ka si terparahen asangken nini bulangna. Ikutken kalak e dibata-dibata si deban, sembahna janah mungkuk kalak e man bana.+ Keras kepala kalak e janah la kalak e nggit robah.
20 Dungna merawa kel Jahwe man kalak Israel,+ nina, “Perban langgar bangsa enda perjanjinKu+ si Kuperentahken man nini bulang kalak e janah la kalak e patuh man bangKu,+
21 sada bangsa pe la Kupelawes arah lebe-lebe kalak e, eme bangsa si lit denga kenca Josua mate.+
22 Alu bage banci Kuuji kalak Israel, tetap denga nge kalak e erdalan bas dalan Jahwe+ bagi nini bulangna ntah lang.”
23 Emaka tetap pediat Jahwe bangsa-bangsa e tading i je. La minter pelawesNa bangsa-bangsa e janah la berekenNa kalak e ku tan Josua.
Cataten i teruh
^ Ertina “Kalak si Ngandung.”
^ As. “DayakenNa.”
^ Ntah “janah erlua-lua kalak e ras.”
