Hakim-Hakim 20:1-48
-
Perang ngelawan kalak Benyamin (1-48)
20 Emaka kerina kalak Israel reh mulai Dan nari+ seh ku Berseba bage pe taneh Gileat nari.+ Ersada kalak e kerina pulung i lebe-lebe Jahwe i Mispa.+
2 Kerina peminpin kalak Israel ras kerina suku Israel lit i je i tengah-tengah umat Dibata. Prajurit si erdalan si make pedang buena 400.000 kalak.+
3 Ibegi kalak Benyamin maka kalak Israel pulung i Mispa.
Nina kalak Israel, “Kataken man kami, uga maka terjadi kejahaten e?”+
4 Ngerana kalak Lewi,+ eme dilaki arah diberu si enggo ibunuh ndai, nina, “Reh aku ras gundikku* ku Gibea+ si lit i Benyamin guna erberngi.
5 Kenca si e, reh penduduk* Gibea ndahi aku janah kepungna rumah inganku erberngi. Ibunuh kalak e atena aku, tapi dungna perkosa kalak e gundikku, janah mate gundikku e.+
6 Emaka kubuat mayat gundikku e janah kupotong-potong. Dung e kukirim ku kerina bagin taneh warisen Israel,+ perban enggo lakoken kalak e perbahanen jahat si erban mela bas Israel.
7 Emaka gundari, o kalak Israel, uga kap kena siban?”+
8 Emaka ersada arih kalak e kerina ngataken, “Ise pe la banci mulih ku kemahna ntah pe ku rumahna.
9 Gundari, bagendalah siban man Gibea: Siserang kalak e menurut undi.+
10 Arah kerina suku Israel, sipilih 10 kalak arah 100 kalak, 100 kalak arah 1.000 kalak, ras 1.000 kalak arah 10.000 kalak guna mpepulung persedian man pasuken. Alu bage banci iserang kalak e Gibea si lit i Benyamin perban perbahanenna erban mela bas Israel.”
11 Bage me kerina kalak Israel ersada ngelawan kota Gibea.
12 Kenca si e kirim suku-suku Israel utusen man kerina kalak Benyamin, nina, “Engkai maka kejahaten enda banci terjadi i tengah-tengah kena?
13 Gundari serahken kalak jahat si lit i Gibea e,+ gelah bunuh kami kalak e janah masapken kami kejahaten arah Israel.”+ Tapi la begiken kalak Benyamin kalak Israel seninana e.
14 Kenca si e pulung kalak Benyamin i darat kota Gibea guna erperang ngelawan kalak Israel.
15 Bas wari e lit 26.000 prajurit si make pedang si pepulung kalak Benyamin arah kota-kota kalak e, lenga termasuk 700 prajurit pilihen arah Gibea nari.
16 Bas pasuken e lit 700 prajurit pilihen si kidal tanna. Kerina kalak e beluh mbenterken batu alu nali si iban arah kulit nari* janah la pernah meleset selambar buk pe.
17 Selain suku Benyamin, suku Israel si deban pe mpepulung 400.000 prajurit si make pedang,+ janah kerina kalak e prajurit si enggo erpengalamen.
18 Emaka lawes kalak e ku Betel guna nungkun man Dibata.+ Kenca si e nina kalak Israel, “Ise nge arah kami si leben erperang ngelawan kalak Benyamin?” Nina Jahwe, “Juda leben.”
19 Kenca si e berkat kalak Israel erpagi-pagi janah erkemah i deher Gibea guna ngelawan kalak e.
20 Lawes kalak Israel erperang ngelawan Benyamin. Bentuk kalak e barisen perang i Gibea guna ngelawan kalak Benyamin.
21 Emaka ndarat kalak Benyamin arah Gibea, janah bas wari e bunuh kalak e 22.000 kalak Israel.
22 Tapi, kalak Israel la mbiar. Bentuk kalak e ka barisen perang bas ingan si seri bagi wari si pertama.
23 Kenca si e lawes kalak Israel ku Betel janah ngandung kalak e i lebe-lebe Jahwe seh asa berngi. Jenari sungkun kalak e Jahwe, nina, “Arus ka nge kami erperang ngelawan senina kami kalak Benyamin?”+ Nina Jahwe, “Laweslah kena. Lawan kalak e.”
24 Emaka bas wari si peduaken, dahi kalak Israel kalak Benyamin.
25 Kalak Benyamin pe ndarat arah Gibea nari bas wari si peduaken e njumpai kalak Israel janah bunuhna 18.000 kalak Israel,+ kalak si mate e prajurit si make pedang.
26 Emaka lawes kerina kalak Israel ku Betel. Ngandung janah kundul kalak e i lebe-lebe Jahwe.+ Puasa kalak e+ seh asa berngi jenari persembahken kalak e persembahen tutungen+ ras korban persadan+ i lebe-lebe Jahwe.
27 Dung e sungkun kalak Israel me Jahwe,+ perban paksa si e Peti Perjanjin* Dibata si benar lit i je.
28 Sanga si e, Pinehas+ anak Eleasar kempu Harun si ngelayani i lebe-lebe Peti Perjanjin. Nungkun kalak e, nina, “Arus denga nge kami erperang ngelawan senina kami kalak Benyamin, ntah ngadi saja kami?”+ Nina Jahwe, “Laweslah, perban Kuserahken pagi kalak e ku tan kena.”
29 Kenca si e cebuni kalak Israel i sekeliling Gibea guna nyerang+ kalak e.
30 Bas wari si peteluken, lawes kalak Israel ngelawan kalak Benyamin, janah bentuk kalak e barisen perang guna ngelawan Gibea bagi sebelumna.+
31 Sanga ndarat kalak Benyamin njumpai pasuken e, iban pasuken e gelah ndauh kalak Benyamin arah kota nari.+ Kenca si e, bagi si sebelumna, mulai iserang ras ibunuh kalak Benyamin piga-piga kalak bas dalan ku Betel ras ku Gibea, janah lit 30 kalak Israel si mate bas darat kota.+
32 Nina kalak Benyamin, “Talu ka kalak e bagi si sebelumna.”+ Tapi nina kalak Israel, “Mundur kita, gelah siban kalak e lawes ku dalan janah ndauh arah kota.”
33 Emaka lawes kerina kalak Israel arah inganna nari janah ban kalak e barisen perang i Baaltamar. Kalak Israel si cebuni ndai ndarat arah inganna nari i daerah Gibea guna nyerang kalak Benyamin.
34 Emaka reh 10.000 prajurit pilihen kalak Israel ku lebe-lebe Gibea, janah terjadi peperangen si seh kel ngerina. Tapi la teh kalak Benyamin maka ntisik nari talu kalak e.
35 Taluken Jahwe kalak Benyamin+ i lebe-lebe kalak Israel, janah bas wari e lit 25.100 prajurit kalak Benyamin si ibunuh kalak Israel. Kerina si mate e prajurit si make pedang.+
36 Sanga mundur kalak Israel arah Benyamin nari, akap kalak Benyamin talu kalak Israel.+ Kepeken mundur kalak Israel perban tek kalak e man prajurit si cebuni guna nyerang Gibea.+
37 Minter serang kalak si cebuni e Gibea. Dung e merap kalak e janah bunuh kalak e kerina si lit bas kota alu pedang.
38 Enggo aturken kalak Israel gelah kalak si cebuni guna nyerang kota ndai erban tanda, eme asap si nangkih ku datas.
39 Sanga mundur kalak Israel arah peperangen nari, mulai serang kalak Benyamin ras bunuhna kira-kira 30 kalak Israel,+ janah ning kalak e, “Enggo talu kel kalak e siban, bagi bas peperangen si sebelumna.”+
40 Tapi tanda e mulai teridah, eme asap si nangkih arah kota e nari. Sanga tulihken kalak Benyamin, idah kalak e kota e enggo itutung janah asapna seh ku langit.
41 Kenca si e mulihken kalak Israel janah serangna kalak e. Dungna mbiar kalak Benyamin perban enggo teh kalak e maka nandangi talu kalak e.
42 Emaka mundur kalak Benyamin arah kalak Israel nari janah lawes kalak e ku taneh mesawang,* tapi terus serang kalak Israel ia. Kalak Israel si ndarat arah kota pe ikut nyerang kalak e.
43 Kepung kalak Israel kalak Benyamin janah terus ayakina. Perjaki kalak e kalak Benyamin i lebe-lebe Gibea si lit i sebelah timur.
44 Dungna, lit 18.000 kalak Benyamin si mate, kerina si mate e prajurit si megegeh.+
45 Kenca si e, mulihken kalak Benyamin janah kiam kalak e ku taneh mesawang* eme ku Tebing Batu Rimon,+ janah lit 5.000 kalak Benyamin si bunuh kalak Israel bas dalan. Terus ayaki kalak Israel kalak Benyamin seh ku Gidom, janah mate ka 2.000 kalak nari.
46 Kerina kalak Benyamin si mate bas wari e buena 25.000 prajurit si make pedang,+ kerina si mate e prajurit si megegeh.
47 Tapi 600 kalak mundur ku taneh mesawang* ku Tebing Batu Rimon, janah tading kalak e bas Tebing Batu Rimon empat bulan dekahna.
48 Dung e mulihken serang kalak Israel kalak Benyamin janah bunuh kalak e si lit bas kota alu pedang eme jelma ras asuh-asuhen bage pe kerina si lit i je. Tutung kalak e kerina kota si lewatina.
Cataten i teruh
^ Ntah banci saja “reh si mpuna taneh.”
^ Ntah “Peti Perpadanen.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
