Hakim-Hakim 21:1-25
-
Suku Benyamin iselamatken (1-25)
21 Kalak Israel pernah ersumpah i Mispa,+ nina, “Ula lit sekalak pe arah kita mereken anakna si diberu jadi ndehara kalak Benyamin.”+
2 Reh kalak Israel ku Betel.+ Kundul kalak e seh asa berngi i lebe-lebe Dibata si benar, janah nderkuh kalak e i je.
3 Ning kalak e, “O Jahwe Dibata Israel, engkai maka si enda terjadi bas Israel? Engkai maka bas wari enda arus keri sada suku arah Israel?”
4 Paginna, lampas kalak Israel medak janah ban kalak e sada ingan nutung* persembahen i je guna mpersembahken persembahen tutungen ras korban persadan.+
5 Kenca si e nina kalak Israel, “Suku si apai arah Israel si sange la reh pulung i lebe-lebe Jahwe i Mispa?” Bage ning kalak e perban enggo ersumpah kalak e maka ise pe si la reh ku lebe-lebe Jahwe i Mispa, arus ibunuh.
6 Sedih kel akap kalak Israel perban kai si terjadi man senina kalak e eme kalak Benyamin. Ning kalak e, “Gundari enggo keri sada suku arah Israel.
7 Kai si arus silakoken gelah lit ndehara man kalak Benyamin si nggeluh denga? Sebap enggo kap kita ersumpah man Jahwe+ maka la sibere anakta si diberu jadi ndehara kalak e.”+
8 Nungkun kalak e, nina, “Ise suku Israel si la reh ku lebe-lebe Jahwe i Mispa?”+ Kepeken paksa si e, kalak Jabes Gileat la lit sekalak pe si reh ku perkemahen ingan kalak Israel pulung.
9 Sanga kalak e ikira, idah kalak e maka la lit penduduk Jabes Gileat i je.
10 Emaka kirim kalak si pulung e 12.000 prajurit si megegehna. Perentahken kalak e man prajurit e, “Laweslah kena janah bunuhlah penduduk Jabes Gileat alu pedang. Diberu ras anak-anak pe arus bunuh kena.+
11 Enda si arus lakoken kena: Kerina dilaki arus bunuh kena bage pe kerina diberu si pernah erhubungen seks ras dilaki.”
12 Arah penduduk Jabes Gileat, dat kalak e 400 diberu si perawan denga si lenga pernah erhubungen seks ras dilaki. Emaka baba kalak e diberu-diberu e ku perkemahen i Silo+ si lit i negri Kanaan.
13 Kenca si e kirim kalak si pulung e pesan guna erdame man kalak Benyamin si lit i Tebing Batu Rimon.+
14 Emaka sanga si e, reh ka kalak Benyamin mulihi. Diberu-diberu arah Jabes Gileat+ si ipediat nggeluh ibereken man kalak Benyamin, tapi la bias kerina diberu e man kalak e.
15 Sedih kel akap kalak Israel ngidah kai si terjadi man suku Benyamin,+ perban enggo pisahken Jahwe suku Benyamin arah suku-suku Israel.
16 Ngerana peminpin-peminpin perpulungen e, nina, “Uga nge kap kena siban gelah lit ndehara kalak Benyamin si nggeluh denga? Perban kerina diberu si lit bas suku Benyamin enggo mate.”
17 Ning kalak e, “Warisen suku Benyamin si nggeluh denga arus tetap lit, gelah ula masap sada suku pe arah Israel.
18 Tapi la banci sibere anakta si diberu jadi ndehara kalak e, perban enggo ersumpah kita, ‘Ise pe si mereken diberu jadi ndehara man suku Benyamin pasti kena sumpah.’”+
19 Kenca si e ning kalak e, “Tiap tahun lit kap perayan man Jahwe i Silo,+ si lit i utara Betel eme i sebelah timur dalan nangkeng arah Betel nari ku Sikem, si lit i sebelah selatan Lebona.”
20 Emaka perentahken kalak e man kalak Benyamin, “Laweslah kena janah cebuni kena i kebun anggur.
21 Sanga idah kena ndarat singuda-nguda arah Silo guna landek-landek, ndarat kena kerina arah kebun anggur e nari. Buat kenalah singuda-nguda arah Silo e jadi diberu kena, janah mulihlah kena ku taneh Benyamin.
22 Pasti pagi reh bapak singuda-nguda e ntah pe turangna ngadu-ngadu man kami. Kataken kami pagi man kalak e, ‘Mekuahlah ate kena kami bage pe kalak e, perban la bias diberu si itaban kami arah erperang jadi ndehara kalak e,+ janah kena pe la banci mereken diberu jadi ndehara kalak e perban ersalah pagi kena.’”+
23 Emaka lakoken kalak Benyamin bage. Buat kalak e singuda-nguda si landek-landek e jadi ndeharana. Kenca si e mulih kalak e ku taneh warisenna janah ibangunna kota-kota+ jenari tading kalak e i je.
24 Emaka mulih kalak Israel arah ingan e nari ku sukuna ras keluargana masing-masing, bage pe ku taneh warisenna masing-masing.
25 Sanga si e la lit raja bas Israel.+ Kerina kalak ngelakoken kai si akapna benar.
