Hakim-Hakim 3:1-31
3 Lit bangsa-bangsa si pediat Jahwe tetap tading i negri Kanaan gelah kerina kalak Israel si lenga pernah erperang ras kalak Kanaan banci iuji.+
2 Alu bage keturunen Israel seterusna si lenga pernah erperang banci lit pengalamenna erperang.
3 Bangsa-bangsa e eme lima penguasa kalak Pilisti,+ kerina kalak Kanaan, kalak Sidon,+ ras kalak Hewi+ si tading i Gunung Libanon+ mulai Gunung Baal Hermon seh ku dalan masuk ku Hamat.+
4 Bangsa-bangsa e ipediat nguji bangsa Israel. Alu bage banci iteh patuh ntah lang kalak e man perentah Jahwe si berekenNa man nini bulang kalak e arah Musa.+
5 Emaka kalak Kanaan,+ kalak Het, kalak Amori, kalak Peris, kalak Hewi, ras kalak Jebusi tading ras kalak Israel.
6 Buat kalak Israel anak si diberu arah bangsa-bangsa e jadi diberuna, janah bere kalak Israel anakna si diberu jadi diberu anak si dilaki arah bangsa e. Janah mulai sembah kalak e dibata bangsa-bangsa e.+
7 Emaka lakoken kalak Israel kai si jahat menurut Jahwe, janah lupaken kalak e Jahwe Dibatana jenari sembahna Baal+ ras tiang-tiang si badia.*+
8 Emaka merawa kel Jahwe man kalak Israel janah serahkenNa* kalak e ku tan Kusan Risataim raja Mesopotami.* Layani kalak Israel Kusan Risataim waluh tahun dekahna.
9 Sanga mindo penampat kalak Israel man Jahwe,+ pilih Jahwe Otniel+ anak Kenas si nelamatken kalak e.+ Kenas e adek Kalep.
10 Kesah si badia Jahwe reh man Otniel,+ janah jadi hakim Israel ia. Sanga lawes ia erperang, bereken Jahwe me Kusan Risataim raja Mesopotami* ku tanna, emaka banci talukenna Kusan Risataim.
11 Kenca si e dame negri e 40 tahun dekahna. Kenca e mate Otniel anak Kenas.
12 Mulihi ka lakoken kalak Israel kai si jahat menurut Jahwe.+ Emaka pediat Jahwe Eglon raja Moap+ naluken kalak Israel, perban lakoken kalak e kai si jahat akap Jahwe.
13 Selain si e, banNa ka kalak e iserang kalak Ammon+ ras kalak Amalek.+ Serang kalak e kalak Israel janah rebut kalak e kota batang kurma.+
14 Layani kalak Israel Eglon raja Moap 18 tahun dekahna.+
15 Kenca si e mindo penampat kalak Israel man Jahwe,+ emaka pilih Jahwe Ehut si nelamatken kalak e.+ Ehut+ e anak Gera kalak Benyamin,+ ia kidal.+ Sanga si e, suruh kalak Israel Ehut si maba upeti* man Eglon raja Moap.
16 Iban Ehut pedang si dua babahna janah gedangna kira-kira 38 sentimeter.* Iketkenna pedang e i balik uisna, bas pahana sebelah kanan.
17 Kenca si e babana upeti man Eglon raja Moap. Eglon e mbur kel.
18 Kenca dung bereken Ehut upeti e, suruhna kalak si maba upeti e lawes.
19 Tapi kenca seh ia i patung-patung pahaten* i Gilgal,+ mulihken ia janah nina, “O Raja, lit pesan rahasia man bandu.” Emaka nina raja man pelayan-pelayanna, “Lawes kena kerina!” Kenca si e lawes kalak e kerina nadingken ia.
20 Emaka deheri Ehut raja si sangana kundul sisada bas ruangenna si sejuk i atap. Nina Ehut man bana, “Lit pesan arah Dibata man bandu.” Emaka tedis ia arah tahtana* nari.
21 Kenca si e ibuat Ehut pedang arah paha kananna alu tan kirina jenari tebakna beltek raja e.
22 Masuk pedang e ras sukulna ku beltek raja janah tertutup pedang e iban lemakna perban la tarik Ehut mulihi pedang e arah beltek raja nari, jenari ndaraten kotoren raja e.
23 Tutup Ehut pintu-pintu ruangen atap, kuncina janah ndarat ia arah lubang udara.
24 Kenca lawes Ehut, reh pelayan-pelayan raja janah idah kalak e pintu-pintu ruangen atap e ikunci. Emaka nina kalak e, “Raja pasti sangana i kamar mandi bas ruangenna si sejuk e.”
25 Terus kalak e nimai seh ngasa mamang ate kalak e, tapi perban lalap la buka-buka raja pintu ruangen atap e, buat kalak e kunci, bukana ruangen e janah idah kalak e tuanna enggo mate i lante.
26 Taren pelayan-pelayan e nimai, Ehut enggo kiam ngelewati patung-patung pahaten,*+ janah selamat ia seh i Seirah.
27 Kenca ia seh, embusna trompet tanduk+ i daerah pegunungen Eperaim.+ Ipinpinna kalak Israel nusur arah daerah pegunungen.
28 Kenca si e nina man kalak e, “Ikutken aku, sebap enggo bere Jahwe musuh-musuh kena eme kalak Moap ku tan kena.” Emaka ikutken kalak e ia janah rebut kalak e ingan penyebrangen Lau Jordan gelah kalak Moap la banci nyebrang. Ise pe la ibere kalak e nyebrang.
29 Sanga si e lit kira-kira 10.000 kalak Moap si ibunuh kalak e.+ Kerina si ibunuh e prajurit si megegeh ras perpang. La lit sekalak pe si selamat.+
30 Bas wari e italuken Israel me Moap, janah dame negri e 80 tahun dekahna.+
31 Kenca Ehut, Samgar+ anak Anat si nelamatken kalak Israel. Lit 600 kalak Pilisti+ si ibunuhna alu tongkat permakan.+
Cataten i teruh
^ As. “dayakenNa.”
^ As. “Aram-naharaim.”
^ As. “Aram.”
^ Ntah banci saja “i tambang batu.”
^ Ntah “ingan kundulna.”
^ Ntah banci saja “ngelewati tambang batu.”
