Hakim-Hakim 4:1-24
4 Tapi kenca mate Ehut, lakoken kalak Israel ka kai si jahat menurut Jahwe.+
2 Emaka serahken* Jahwe kalak e ku tan Jabin raja Kanaan,+ si merentah i Hasor. Peminpin pasukenna eme Sisera, si tading i Haroset-hagoyim.+
3 Kenca si e pindo kalak Israel penampat man Jahwe,+ perban ngeri kel Jabin nindas kalak e. Lit 900 gereta perang Jabin si ersabi-sabi besi.+ Janah 20 tahun dekahna kalak Israel itindas.+
4 Sanga si e, si jadi hakim bas Israel eme sekalak nabiah+ si gelarna Debora, ia diberu Lapidot.
5 Ia biasana kundul i teruh batang kurmana si lit i antara Rama+ ras Betel+ i daerah pegunungen Eperaim. Kalak Israel rusur reh ndahi ia guna meteh kerna penghakimen Dibata.
6 Kirimna pesan man Barak+ anak Abinoam arah Kedes-naptali+ nari janah nina man bana, “Jahwe Dibata Israel enggo mereken perentah enda man bandu, ‘Laweslah* ku Gunung Tabor radu ras 10.000 kalak Naptali ras Sebulon.
7 Kuban kari Sisera, eme peminpin pasuken Jabin radu ras gereta-gereta perangna bage pe prajuritna reh ndahi kam i Lau* Kison,+ janah Kubereken kari ia ku tanndu.’”+
8 Tapi nina Barak man bana, “Adi ikut kam ras aku, lawes aku, tapi adi la kam ikut ras aku, la aku nggit lawes.”
9 Nina Debora man Barak, “Pasti aku ikut ras kam. Tapi peperangen enda la mereken kemulian man bandu, perban ibere Jahwe kari Sisera+ ku tan sekalak diberu.” Kenca si e lawes Debora ras Barak ku Kedes.+
10 Pepulung Barak suku Sebulon ras suku Naptali,+ janah lit 10.000 kalak si ngikutken ia ku Kedes. Debora pe ikut ras ia.
11 Sanga si e, Heber kalak Keni nerapken bana arah kalak Keni+ nari eme keturunen Hobap mama Musa.+ Banna kemahna i deher batang kayu si galang i Saananim si lit i Kedes.
12 Idat Sisera laporen maka Barak anak Abinoam enggo lawes ku Tabor.+
13 Minter pepulung Sisera kerina gereta perangna si ersabi-sabi besi, lit 900 buena, janah arah Haroset-hagoyim nari berkat ia ras kerina prajuritna ku Lau* Kison.+
14 Nina Debora man Barak, “Majulah, bas wari enda Sisera pasti bereken Jahwe ku tanndu. Jahwe kap si maju i lebe-lebendu.” Emaka nusur Barak arah Gunung Tabor nari radu ras 10.000 kalak si ngikutken ia.
15 Kenca si e ikacauken Jahwe Sisera ras kerina gereta perangna bage pe prajuritna alu pedang Barak.+ Dungna nusur Sisera arah gereta perangna nari janah kiam ia.
16 Ayaki Barak gereta-gereta perang e ras pasukenna seh ku Haroset-hagoyim. Emaka mate kerina pasuken Sisera ibunuh alu pedang. La lit sada pe si nggeluh.+
17 Tapi kiam Sisera ku kemah Jael+ diberu Heber+ kalak Keni, perban Jabin+ raja Hasor erteman ras keluarga Heber kalak Keni.
18 Kenca si e ndarat Jael ndahi Sisera janah nina, “Mari Tuan, mari ku basken. Ula kam mbiar.” Emaka masuk ia ku kemah Jael, jenari selimuti Jael ia.
19 Kenca si e nina Sisera, “Enta sitik lau, muas kel aku.” Emaka ibuka Jael kantong kulit si isina susu janah berena ia minem,+ dung e selimutina ka ia mulihi.
20 Nina man Jael, “Cinderlah kam i pintu kemah, adi lit kari kalak si reh janah sungkunna lit ntah lang kalak i jenda, kataken saja la lit.”
21 Tapi Jael diberu Heber e muat pantuk-pantuk kemah ras martel. Perban latih kel akap Sisera, entabeh kel kapna tunduh. Alu manjar-anjar deheri Jael ia janah tamakenna pantuk-pantuk ndai ku takal* Sisera jenari pekpekna alu martel tembus seh ku taneh, dung e mate ia.+
22 Barak sangana ndarami Sisera, emaka ndarat Jael ndahi ia janah nina, “Mari, nta kutuduhken kalak si daramindu.” Emaka ikutkenna Jael janah idahna Sisera ampar enggo mate, i takalna enggo tembus pantuk-pantuk kemah.
23 Emaka bas wari e, Jabin raja Kanaan italuken Dibata i lebe-lebe kalak Israel.+
24 Reh gegehna tan kalak Israel ngelawan Jabin raja Kanaan,+ seh asa Jabin raja Kanaan mate.+
