Hakim-Hakim 6:1-40
6 Tapi lakoken kalak Israel ka kai si jahat menurut Jahwe,+ emaka serahken Jahwe kalak e ku tan kalak Midian pitu tahun dekahna.+
2 Emaka mulai itindas kalak Midian kalak Israel.+ Perban si e, iban kalak Israel inganna cebuni* i gunung-gunung, i gua-gua, janah bas ingan-ingan si mesera idahi kalak.+
3 Adi nuan benih kalak Israel, reh kalak Midian, kalak Amalek,+ bage pe kalak arah Timur+ nyerang kalak e.
4 Erkemah kalak e guna nyerang kalak Israel janah hancurken kalak e hasil juma bas negri e seh ku Gasa, janah la lit tadingken kalak e kai pe man pangan kalak Israel. Biri-biri, lembu, ras kelede pe la tadingken kalak e.+
5 Reh kalak e maba asuh-asuhenna ras kemah-kemahna si bali buena ras labang.+ Kalak e ras unta-untana la terkira perban buena.+ Reh kalak e ku negri e guna ngancurkenca.
6 Mesera kel keadan kalak Israel perban kalak Midian, emaka pindo kalak Israel penampat man Jahwe.+
7 Sanga pindo kalak Israel penampat man Jahwe perban kalak Midian,+
8 utus Jahwe sekalak nabi man kalak Israel guna ngataken man kalak e, “Bagenda nina Jahwe Dibata Israel, ‘Kubaba kena ndarat arah Mesir nari bage pe arah ingan perbudaken nari.+
9 Enggo Kuselamatken kena arah tan Mesir nari bage pe arah kerina si nindas kena. Enggo Kupelawes kalak e arah lebe-lebe kena, jenari Kubereken negri kalak e man kena.+
10 Enggo Kukataken man kena, “Aku kap Jahwe Dibata kena.+ Ula kena mbiar man dibata-dibata kalak Amori si bas negrina kena tading.”+ Tapi la kena patuh man bangKu.’”*+
11 Kenca si e reh malekat Jahwe+ janah kundul ia i teruh batang kayu si galang jang Joas kalak Abieser si lit i Opra.+ Anakna eme Gideon+ sangana mekpeki gandum bas ingan meras anggur gelah la idah kalak Midian gandum e.
12 Jumpai malekat Jahwe me Gideon janah nina, “O pejuang si megegeh, Jahwe ras kam kap.”+
13 Nina Gideon, “Tuan, nungkun ateku bandu. Adi tuhu kin Jahwe ras kami, engkai maka kerina enda terjadi man kami?+ I ja dage kerina perbahanenNa si luar biasa si ceritaken nini bulang kami man kami,+ nina, ‘Jahwe kap si maba kita ndarat arah Mesir nari.’+ Tapi gundari enggo tadingken Jahwe kami+ janah serahkenNa kami ku tan kalak Midian.”
14 Itatap Jahwe* ia janah nina, “Asa gegehndu, laweslah kam janah selamatken kalak Israel arah tan kalak Midian.+ Aku kap si nuruh kam lawes.”
15 Nina Gideon njawapsa, “Maapken aku, Jahwe. Uga ningku nelamatken kalak Israel? Keluarga bapakku kap si kitikna bas suku Manase, janah aku kap si la mehergana bas keluargaku.”
16 Tapi nina Jahwe man bana, “Perban Aku ras kam,+ pasti talukenndu kalak Midian bali bagi naluken sekalak jelma.”
17 Kenca si e nina Gideon, “Adi tuhu kin jadi ateNdu aku, bereken dage tandana maka Kam si ngerana ras aku.
18 Mindo aku, ula Kam lawes seh ngasa reh ka kari aku maba pemereku janah kubereken man baNdu.”+ Emaka nina, “Kutimai kam i jenda seh ngasa kam reh.”
19 Lawes Gideon janah sikapkenna sada kambing si nguda denga bage pe roti si la itama ragi arah tepung si buena 11 kilo.*+ Tamakenna daging e bas keranjang janah kuahna bas kudin. Kenca si e, babana janah berekenna man bana i teruh batang kayu si galang.
20 Nina malekat Dibata si benar man bana, “Buat daging ras roti si la itama ragi e janah tamaken ku datas batu si galang si lit i je, jenari amburken kuahna ku datasna.” Lakoken Gideon bage.
21 Kenca si e ikuit malekat Jahwe daging ras roti si la itama ragi e alu ujung tongkat si ijemakna. Emaka ndarat api arah batu e nutung daging ras roti si la itama ragi e.+ Kenca si e, lanai idahna malekat Jahwe ndai.
22 Dungna sadar Gideon maka si idahna e malekat Jahwe.+
Emaka minter nina Gideon, “Cilaka kel aku o Jahwe Tuhan Si Meganjangna, enggo langsung kuidah malekat Jahwe!”+
23 Tapi nina Jahwe, “Tenang kam.* Ula kam mbiar,+ labo kam mate.”
24 Emaka iban Gideon sada ingan nutung* persembahen man Jahwe. Janah ingan e igelari Jahwe-syalom*+ seh asa gundari. Ingan e tetap lit i Opra bas ingan kalak Abieser.
25 Bas berngi e, nina Jahwe man bana, “Buatlah lembu jantan bapakndu si nguda denga eme lembu jantan si peduaken si umurna pitu tahun. Hancurken ingan nutung persembahen Baal jang bapakndu janah runtuhken tiang-tiang si badia* si lit i sebelahna.+
26 Kenca si e, susunlah batu-batu i datas ingan si ertembok e guna jadi ingan nutung persembahen man Jahwe Dibatandu. Jenari buat lembu jantan si nguda denga e janah persembahken i je jadi persembahen tutungen i datas potongen kayu arah tiang-tiang si badia* si enggo runtuhkenndu.”
27 Emaka idilo Gideon sepuluh pelayanna janah lakokenna bagi si perentahken Jahwe man bana. Tapi mbiar kel ia man keluarga bapakna bage pe man penduduk kota e, emaka la lakokenna paksa ciger tapi sanga berngi.
28 Paginna sanga erpagi-pagi si lampas, medak penduduk kota e janah idah kalak e ingan nutung persembahen Baal enggo hancur. Tiang-tiang si badia* si lit i sampingna pe enggo iruntuhken. Janah bas ingan nutung persembahen si mbaru ibangun, lit i je ipersembahken lembu jantan si peduaken ndai.
29 Nungkun kalak e man sada ras si debanna, nina, “Ise si erbanca enda?” Kenca selidiki kalak e, nina, “Gideon anak Joas si erbanca.”
30 Emaka nina penduduk kota e man Joas, “Baba anakndu ku darat, ia arus ibunuh sebap enggo hancurkenna ingan nutung persembahen man Baal janah runtuhkenna tiang-tiang si badia* si lit i sebelahna.”
31 Nina Joas+ man kerina kalak si nentang ia, “Arus kin bela kena Baal? Arus kin selamatken kena ia? Ise pe si mbela ia arus ibunuh pagi-pagi enda.+ Adi dibata kin ia, pasti belana dirina+ sanga lit kalak si ngancurken ingan nutung persembahenna.”
32 Bas wari e, Gideon igelari Joas jadi Jerubaal,* nina, “Pediatlah Baal mbela dirina sanga lit kalak si ngancurken ingan nutung persembahenna.”
33 Kenca si e, pulung kerina kalak Midian,+ kalak Amalek,+ bage pe kalak arah Timur.+ Isebrangi kalak e lau maler guna lawes ku Lembah Jesreel janah erkemah kalak e i je.
34 Kesah si badia Jahwe reh ku Gideon+ janah embusna trompet tanduk+ jenari reh kalak Abieser+ ngikutken ia.
35 Suruhna utusen ku kerina suku Manase janah kalak e pe ngikutken ia. Isuruhna ka utusen ku Aser, Sebulon, ras Naptali janah kalak e pe reh ndahi ia.
36 Kenca si e nina Gideon man Dibata si benar, “Adi selamatkenNdu kalak Israel arah aku bagi janjiNdu,+
37 berelah aku sada tanda. Enda kutamaken mbulu biri-biri bas ingan ngerik.* Adi lit kari embun bas mbulu biri-biri e tapi taneh i sekelilingna kerah, kuteh maka selamatkenNdu kalak Israel arah aku bagi si enggo janjikenNdu.”
38 Bage si terjadi. Sanga lampas ia medak, perehna mbulu biri-biri e janah datna lau embun dem sada mangkok si galang.
39 Tapi nina Gideon man Dibata si benar, “Ula Kam merawa man bangku, bere min aku mindo sekali nari. Berelah bangku sada tanda nari arah mbulu biri-biri e. Banlah mbulu biri-biri e saja si kerah janah taneh i sekelilingna kena embun.”
40 Bage si ilakoken Dibata bas berngi e. Mbulu biri-biri e saja si kerah janah taneh i sekelilingna kena embun.
Cataten i teruh
^ Ntah banci saja “gudang i teruh taneh.”
^ As. “la begiken kena soraKu.”
^ Maksudna, malekat Jahwe.
^ As. “Dame man bandu.”
^ Ertina “Jahwe Eme Kedamen.”
^ Ertina “Pediat Baal Mbela Dirina.”
