Hakim-Hakim 7:1-25
7 Kenca si e, bas pagi-pagi si lampas medak Jerubaal eme Gideon+ ras kerina pasukenna janah erkemah kalak e i Mata Lau Harod. Kalak Midian erkemah i sebelah utara kalak e, i lembah si lit i Bukit More.
2 Nina Jahwe man Gideon, “Enteremsa denga prajurit si ikut ras kam. Adi Kuserahken kari kalak Midian man kalak Israel,+ megah kari akap kalak e janah nina, ‘Perban gegeh kami nge maka kami selamat.’+
3 Gundari, umumkenlah man prajurit-prajurit e, ‘Ise pe si mbiar ras gentar banci mulih ku rumah.’”+ Emaka uji Gideon kalak e, jenari lit 22.000 kalak si mulih ku rumahna janah 10.000 kalak tetap tading.
4 Tapi nina Jahwe man Gideon, “Enteremsa denga prajurit e. Suruhlah kalak e ku lau gelah Kuuji kalak e i je guna kam. Adi Kukataken, ‘Ia ikut,’ ikut kari ia ras kam, tapi adi Kukataken, ‘La ia ikut,’ la kari ia ikut ras kam.”
5 Emaka babai Gideon kalak e ku lau.
Kenca si e nina Jahwe man Gideon, “Kalak si minem lau alu tanna si bagi biang ndilat lau, arus pisahkenndu arah kalak si minem lau alu sujud.”
6 Lit 300 kalak si minem lau alu tanna. Si debanna minem alu sujud.
7 Kenca si e, nina Jahwe man Gideon, “Pasti Kuselamatken kari kena arah 300 kalak si minem lau alu tanna e. Kuserahken kari kalak Midian ku tanndu.+ Tapi si debanna suruhlah mulih ku rumahna.”
8 Emaka ibuat si 300 kalak ndai perbekalen ras trompet tanduk arah kalak Israel si debanna. Janah suruh Gideon kerina kalak Israel mulih selain si 300 kalak e. Perkemahen kalak Midian lit i lembah i teruh kalak e.+
9 Bas berngi e, nina Jahwe man Gideon, “Medakkenlah, seranglah perkemahen kalak Midian. Enggo Kuserahken kalak e ku tanndu.+
10 Tapi adi mbiar kam nyerangsa, nusurlah kam ku perkemahen e radu ras Pura pelayanndu.
11 Begikenlah kai si cakapken kalak e, kenca si e pang kari kam* nyerang perkemahen e.” Emaka nusur ia radu ras Pura pelayanna ku pinggir perkemahen musuh.
12 Kalak Midian, kalak Amalek, ras kalak arah Timur nari+ nutupi lembah e bali bagi labang. Unta kalak e la terkira buena+ bagi kersik i tepi laut.
13 Kenca seh Gideon, lit sekalak dilaki si sangana nceritaken nipina man temanna, nina, “Ernipi aku lit sada roti barli si kibul megulang ku perkemahen Midian. Antuk roti e sada kemah janah ceda kemah e.+ Terbalik kemah e janah rata ku taneh.”
14 Megi si e, nina temanna ngaloisa, “Enda pasti pedang Gideon+ anak Joas kalak Israel e. Enggo serahken Dibata kalak Midian ras kerina perkemahenna ku tanna.”+
15 Kenca begi Gideon nipi e ras ertina,+ sujud ia nembah Dibata. Kenca si e mulih ia ku perkemahen kalak Israel janah nina, “Ersikaplah, enggo serahken Jahwe perkemahen kalak Midian ku tan kena.”
16 Kenca si e, bagina 300 kalak e jadi telu kelompok janah berena trompet tanduk+ ras guci si galang si isina obor man kalak e kerina.
17 Kenca si e, nina man kalak e, “Perdiatekenlah kai si kulakoken janah banlah bage. Kenca seh aku i pinggir perkemahen e, banlah bagi si kulakoken e.
18 Sanga aku bage pe kalak si ras aku ngembus trompet tanduk, kena pe arus ngembus trompet i sekeliling perkemahen janah ersurak, ‘Pedang Jahwe ras pedang Gideon!’”
19 Sanga nandangi tengah berngi, kenca penjaga perkemahen mbaru denga ganti giliren jaga,* Gideon ras 100 kalak si ikut ras ia seh i perkemahen. Embus kalak e trompet tanduk+ janah pecahken kalak e guci si galang si ijemakna.+
20 Emaka telu kelompok pasuken e ngembus trompet tanduk ndai janah pecahken kalak e gucina. Angkat kalak e obor alu tan kirina janah embusna trompet si lit bas tan kananna jenari ersurak kalak e, “Pedang Jahwe ras pedang Gideon!”
21 Kalak e tetap tedis i sekeliling perkemahen tapi kerina pasuken musuh kiamen janahna serko.+
22 Lalap iembus si 300 kalak ndai trompet tandukna janah iban Jahwe musuh kalak e sibunuh-bunuhen alu pedang bas kerina perkemahen e.+ Kiamen pasuken e seh ku Bet-Sita, ku Saretan, janah seh ku Abil Mehola+ i deher Tabat.
23 Kenca si e, pulung kerina kalak Israel arah suku Naptali, Aser, ras kerina suku Manase+ jenari serang kalak e kalak Midian.
24 Suruh Gideon utusen guna mpeseh pesan enda ku kerina daerah pegunungen Eperaim, nina, “Nusurlah kena, seranglah kalak Midian. Rebutlah kerina daerah e seh ku Betbara ras Lau Jordan gelah la banci sebrangi kalak e lau e.” Emaka pulung kerina kalak Eperaim janah rebut kalak e kerina lau maler e seh ku Betbara ras ku Lau Jordan.
25 Tangkap kalak e dua peminpin kalak Midian eme Oreb ras Seeb. Bunuh kalak e Oreb i Batu Oreb,+ janah bunuh kalak e Seeb bas Ingan Meras Anggur Seeb. Terus ayaki kalak e kalak Midian+ janah baba kalak e takal Oreb ras takal Seeb man Gideon i daerah Lau Jordan.
Cataten i teruh
^ As. “reh gegehna kari tanndu.”
^ Kira-kira mulai jam 10 berngi seh ku jam 2 erpagi-pagi.
