Hakim-Hakim 8:1-35
8 Kenca si e, nina kalak Eperaim man Gideon, “Engkai maka la lebuh kena kami sanga kena erperang ras kalak Midian?+ Engkai maka bage ban kena man kami?” Jungut-jungut kalak e man Gideon.+
2 Tapi nina Gideon, “Kai kin ertina si kulakoken e adi bandingken ras kena? La kin ulin nge sisa rani arah Eperaim+ asangken hasil rani anggur arah Abieser?+
3 Ku tan kena kap Oreb ras Seeb+ peminpin kalak Midian iserahken Dibata. Kai ertina si kuban e adi bandingken ras kena?” Sanga bage nina Gideon, tenang kalak Eperaim ndai.
4 Kenca si e, seh Gideon i Lau Jordan janah sebrangina lau e. Latih kel akapna bage pe 300 prajurit ndai, tapi tetap denga kalak e ngayaki musuh.
5 Emaka nina Gideon man penduduk Sukot, “Bereken min roti kena man prajuritku, enggo latih akap kalak e janah aku sangana ngayaki Sebah ras Salmuna raja-raja kalak Midian.”
6 Nina peminpin-peminpin Sukot, “Enggo kin tangkapndu Sebah ras Salmuna, maka arus bereken kami roti man pasukenndu?”
7 Nina Gideon, “Perban bage ning kena, kenca serahken Jahwe kari Sebah ras Salmuna ku tanku, kuligasi kari kena alu duri ras peren duri arah taneh mesawang.”*+
8 Jenari lawes Gideon ku Penuel janah pindona ka bagi si ndai, tapi bali jawapen penduduk Penuel ras penduduk Sukot.
9 Emaka nina Gideon man penduduk Penuel, “Adi mulih kari aku alu selamat, kuruntuhken menara enda.”+
10 Paksa si e, Sebah ras Salmuna sangana i Karkor ras kira-kira 15.000 prajuritna. Kalak e nari ngenca prajurit si arah Timur si nggeluh denga,+ sebap 120.000 prajurit kalak e si ersenjata enggo mate.
11 Kenca si e, Gideon terus erdalan arah dalan si biasa dalani kalak si tading i kemah-kemah si lit i sebelah timur Nobah ras Jogbeha.+ Serangna perkemahen si la lit penjagana e.
12 Sanga kiam Sebah ras Salmuna, ayaki Gideon janah tangkapna dua raja kalak Midian e, emaka mbiar kel kerina kalak bas perkemahen e.
13 Kenca erperang, Gideon anak Joas mulih arah dalan si nangkeng ku Heres.
14 Bas perdalanen, tangkap Gideon sekalak anak perana arah Sukot nari, janah sungkunina anak perana e. Emaka tulis anak perana e man Gideon 77 gelar pejabat ras peminpin Sukot.
15 Kenca si e dahi Gideon penduduk Sukot janah nina, “Enda Sebah ras Salmuna. Sange tokohi kena aku, ning kena, ‘Enggo kin tangkapndu Sebah ras Salmuna, maka arus bereken kami roti man pasukenndu si latih akapna?’”+
16 Kenca si e, tangkapna peminpin kota Sukot janah hukumna alu duri ras peren duri arah taneh mesawang.*+
17 Jenari runtuhkenna Menara Penuel,+ janah bunuhna penduduk kota e.
18 Sungkun Gideon Sebah ras Salmuna, nina, “Uga kin jelmana kalak si bunuh kena i Tabor?” Nina kalak e, “Kalak e bagi kam, kerina kalak e tempa bagi anak raja.”
19 Nina Gideon man kalak e, “Senina-seninaku kap kalak e, kalak e anak mamakku. Ersumpah aku i lebe-lebe Jahwe Dibata si nggeluh, adi la min ndai bunuh kena kalak e, labo kena kubunuh.”
20 Kenca si e nina Gideon man Jeter anakna sintua, “Iah, bunuh kalak e.” Tapi la buat anakna e pedangna, mbiar ia sebap ia nguda denga.
21 Emaka nina Sebah ras Salmuna, “Adi tuhu kin kam dilaki, buktikenlah alu gegehndu. Mari, bunuh kami alu tanndu.” Emaka bunuh Gideon me Sebah ras Salmuna+ jenari buatna perhiasen si bentukna bagi bulan si lit i kerahung unta kalak e.
22 Kenca si e nina kalak Israel man Gideon, “Kam min si merentah kami, anakndu, bage pe kempundu, perban enggo selamatkenndu kami arah tan kalak Midian.”+
23 Tapi nina Gideon man kalak e, “Labo aku ntah pe anakku si merentah kena. Jahwe ngenca pagi si merentah kena.”+
24 Nina Gideon ka, “Sada ngenca si kupindo man kena: Tiap kalak arus mereken sada anting-anting igung arah barang jarahenna.” (Lit anting-anting igung musuh kalak e si iban arah emas nari sebap musuhna e kalak Ismael.)+
25 Nina kalak e, “Pasti bereken kami.” Emaka kimbangken kalak e uis janah tiap kalak ngamparken anting-anting igung hasil jarahenna ku uis e.
26 Kerina anting-anting si ipepulung Gideon beratna hampir 20 kilo,* lenga termasuk perhiasen si bentukna bagi bulan, kalung, ras baju si ipake raja Midian si iban arah wol ungu nari, bage pe kalung unta-unta kalak e.+
27 Iban Gideon emas e jadi epod*+ janah pamerkenna i Opra eme kotana.+ Dungna kerina kalak Israel nembah* epod e i je,+ janah epod e jadi jerat man Gideon ras keluargana.+
28 Bage me kalak Midian+ italuken kalak Israel, janah lanai pang kalak Midian nokohi kalak Israel. Dame negri e 40 tahun dekahna bas jaman Gideon.+
29 Emaka mulih Jerubaal+ anak Joas ku rumahna janah tading ia i je.
30 Lit 70 anak Gideon si dilaki sebap melala diberuna.
31 Arah gundikna* si lit i Sikem pe lit sada anakna dilaki, gelarna Abimelek.+
32 Dungna mate Gideon anak Joas kenca ia enggo metua kel janah ikuburken ia i kuburen Joas bapakna i Opra kota kalak Abieser.+
33 Kenca mate Gideon, mulihi ka kalak Israel nembah man* Baal+ janah pilih kalak e Baal-berit jadi dibata kalak e.+
34 Kalak Israel lupa man Jahwe Dibatana+ si nelamatken kalak e arah kerina musuhna si lit i sekelilingna.+
35 La kalak e setia man keluarga Jerubaal eme Gideon. La inget kalak e kerina perbahanen Gideon si mehuli man kalak Israel.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Ntah “erlua-lua secara rohani ras.”
^ Ntah “erlua-lua secara rohani ras.”
