Hakim-Hakim 9:1-57
9 Bas pudi wari, lawes Abimelek+ anak Jerubaal ndahi keluarga mamakna i Sikem, janah nina man kalak e ras kerina keluarga bulangna,*
2 “Cuba sungkuni kena kerina peminpin* Sikem, ‘Apai kap kena pangen, sekalak si merentah kena ntah 70 kalak anak Jerubaal?+ Janah ingetlah, sada dareh kap kita.’”
3 Emaka peseh turang-turang mamakna kerna si e man kerina peminpin Sikem, janah turah ukur kalak e ngikutken Abimelek, sebap nina kalak e, “Seninata kap ia.”
4 Kenca si e bere kalak e man Abimelek 70 logam pirak arah ingan ersembah man Baal-berit,*+ janah gunaken Abimelek sen e guna ngupahi kalak si pengangguren ras gutul gelah ngikutken ia.
5 Kenca si e lawes ia ku rumah bapakna i Opra,+ jenari bunuhna 70 senina-seninana+ eme anak Jerubaal bas sada batu. Sada ngenca si selamat eme Jotam, anak Jerubaal si nguda, perban cebuni ia.
6 Kenca si e kerina peminpin-peminpin Sikem ras Betmilo pulung i deher batang kayu si galang i sebelah tiang si lit i Sikem, jenari ban kalak e Abimelek jadi raja.+
7 Sanga dat Jotam laporen kerna si e, minter ia lawes janah tedis ia i puncak Gunung Gerisim,+ kenca si e megang ia ngerana, nina, “O peminpin-peminpin Sikem, begiken aku gelah begiken Dibata kena.
8 “Bas sada waktu, lit batang-batang kayu si atena milih raja guna merentah ia. Emaka nina batang-batang kayu e man batang saitun, ‘Kamlah jadi raja kami.’+
9 Tapi nina batang saitun, ‘Adi jadi raja aku,* lanai banci kuhasilken minak si erban Dibata ras manusia imuliaken.’
10 Kenca si e nina batang-batang kayu e man batang ara, ‘Kamlah jadi raja kami.’
11 Tapi nina batang ara, ‘Adi jadi raja aku,* lanai banci kuhasilken buah si ntebu ras si mejile.’
12 Kenca si e nina batang-batang kayu e man batang anggur, ‘Kamlah jadi raja kami.’
13 Nina batang anggur, ‘Adi jadi raja aku,* lanai banci kuhasilken anggur si mbaru si erban Dibata ras manusia senang.’
14 Dungna, nina batang-batang kayu e man peren si erduri, ‘Kamlah jadi raja kami.’+
15 Nina peren si erduri e man batang-batang kayu, ‘Adi tuhu-tuhu kin pilih kena aku jadi raja, dahilah aku janah erlindunglah i teruhku. Tapi adi lang, pediatlah api ndarat arah aku nari janah nutung batang-batang kayu aras Libanon.’
16 “Gundari alu erban Abimelek jadi raja,+ bujur ras mulia kin perbahanen kena e? Mehuli kin perbahanen kena man Jerubaal ras keluargana? Cocok kin perbahanen kena e ras kai si enggo lakoken Jerubaal?
17 Sanga erperang bapakku guna kena,+ ipertaruhkenna kesahna guna nelamatken kena arah tan kalak Midian.+
18 Tapi gundari lawan kena keluarga bapakku janah bunuh kena 70 anakna bas sada batu.+ Kenca si e ban kena Abimelek, anak arah budakna si diberu+ jadi raja guna minpin Sikem perban senina kena ia.
19 Gundari, adi bujur ras mulia kin perbahanen kena man Jerubaal ras keluargana, ermeriah ukurlah perban Abimelek janah Abimelek pe mbera-mbera ermeriah ukur perban kena.
20 Tapi adi lang, mbera-mbera reh api arah Abimelek nari janah tutungna peminpin-peminpin Sikem ras Betmilo.+ Mbera-mbera reh api arah peminpin-peminpin Sikem ras Betmilo nari janah tutungna Abimelek.”+
21 Kenca si e lawes Jotam+ janah kiam ia ku Beer. Tading ia i je perban seninana Abimelek.
22 Lit telu tahun dekahna Abimelek merentah bas Israel.
23 Kenca si e pediat Dibata terjadi perubaten antara Abimelek ras peminpin-peminpin Sikem, jenari hianati kalak e Abimelek.
24 Enda terjadi gelah kejahaten si ilakoken man 70 anak Jerubaal ibalas. Alu bage Abimelek ras peminpin-peminpin Sikem si nampati ia munuh senina-seninana, ertanggung jawap nandangi dareh kalak si mate e.+
25 Emaka iaturken peminpin-peminpin Sikem gelah lit kalak cebuni i puncak-puncak gunung guna nyerang Abimelek, janah ngerampok kerina kalak si lewat arah e. Dungna, ilaporken kerna si e man Abimelek.
26 Kenca si e, Gaal anak Ebet ras senina-seninana lewat arah je ku Sikem,+ janah peminpin-peminpin Sikem tek kel man bana.
27 Lawes penduduk Sikem ku juma janah pepulungna buah anggur arah kebun anggurna, iperas kalak e buah e guna erban inemen anggur, janah ban kalak e pesta. Kenca si e lawes kalak e ku rumah dibatana.+ Man ras minem kalak e janah sumpahi kalak e Abimelek.
28 Kenca si e ngerana Gaal anak Ebet, nina, “Ise kin Abimelek e, ise kin Sikem si arus silayani e? La kin ia anak Jerubaal,+ la kin Sebul wakilna? Pangen silayani anak-anak Hamor, bapak Sikem! Engkai maka arus silayani Abimelek?
29 Adi aku jadi peminpin kalak e, Abimelek pasti kugantiken.” Kenca si e nina man Abimelek, “Tambahilah prajuritndu, majulah, gelah erperang kita.”
30 Sanga Sebul peminpin kota e megi kata-kata Gaal anak Ebet, merawa kel ia.
31 Emaka alu erbuni-buni* suruhna kalak ngataken man Abimelek, “Gaal anak Ebet ras senina-seninana gundari lit i Sikem, janah ajakna penduduk kota e ngelawan kam.
32 Rehlah kam ras pasukenndu bas berngi wari, cebunilah kena i darat kota guna nyerang.
33 Bas pagi-pagi si lampas kenca terbit matawari, arus kena medak janah serang kena kota e. Sanga ndarat kari Gaal ras pasukenna, lakokenlah kai pe guna naluken ia.”
34 Emaka sanga berngi, lawes Abimelek ras pasukenna. Cebuni kalak e i darat kota bas empat kelompok guna nyerang Sikem.
35 Sanga ndarat Gaal anak Ebet janah tedis ia i pintu gerbang kota, ndarat Abimelek ras pasukenna arah inganna cebuni nari.
36 Sanga idah Gaal pasuken e, nina man Sebul, “Nenlah! Lit kuidah enterem jelma nusur arah puncak-puncak gunung nari.” Tapi nina Sebul man bana, “Bayangen gunung-gunung nge si idahndu e si mirip ras jelma.”
37 Dung e nina Gaal, “Nenlah! Lit kalak nusur arah bagin tengah nari janah lit sada kelompok si reh arah dalan si lit i deher batang kayu Meonenim.”
38 Nina Sebul ngaloi, “Mbarenda sombong kam ngerana, nindu, ‘Ise kin Abimelek maka arus silayani ia?’+ La kin kalak e nge si tulakndu? Gundari majulah, lawanlah kalak e.”
39 Emaka maju Gaal i lebe peminpin-peminpin Sikem janah serangna Abimelek.
40 Ayaki Abimelek Gaal, janah kiam Gaal arah ia nari. Enterem si mate ibunuh seh ku pintu gerbang kota.
41 Abimelek terus tading i Aruma, janah Gaal ras senina-seninana ipelawes Sebul+ arah Sikem nari.
42 Paginna, penduduk kota e ndarat arah kota, janah ikataken me kerna si e man Abimelek.
43 Emaka bagina pasukenna jadi telu kelompok janah cebuni kalak e i darat kota. Sanga idahna penduduk kota e ndarat arah kota, serangna kalak e janah bunuhna.
44 Abimelek ras kelompok si lit ras ia nyerang pintu gerbang kota jenari rebutna, janah dua kelompok si debanna nyerang kalak si lit i darat kota ras bunuhna.
45 Sada warin Abimelek nyerang kota e jenari rebutna. Bunuhna kalak si lit bas kota e, hancurkenna kota e,+ janah amburkenna sira ku je.
46 Sanga kerina peminpin Menara Sikem megi kerna si e, minter kalak e lawes ku ingan cebuni bas ingan ersembah man El-berit.*+
47 Kenca ilaporken man Abimelek maka kerina peminpin i Menara Sikem enggo pulung,
48 Abimelek ras kerina pasukenna nangkeng ku Gunung Salmon. Itektekna sada dahan batang kayu alu kapak janah babana alu barana jenari nina man pasukenna, “Iah, meter, lakokenlah bagi si kuban e!”
49 Emaka kerina pasuken e ngelakoken bagi si iban Abimelek. Tektek kalak e dahan batang kayu janah tama kalak e ku ingan cebuni e jenari tutung kalak e alu api. Kerina kalak si lit bas Menara Sikem e mate. Lit 1.000 kalak buena, dilaki ras diberu.
50 Kenca si e, lawes Abimelek ku Tebes. Erkemah ia i je guna nyerangsa ras ngerebutsa.
51 Bas tengah-tengah kota e lit menara si paguh, kerina dilaki ras diberu bage pe kerina peminpin kota e kiam ku je. Kunci kalak e pintuna janah nangkih kalak e ku atap menara e.
52 Lawes Abimelek ku menara e jenari serangna menara e. Deherina pintu menara e janah tutungna atena.
53 Kenca si e dabuhken sekalak diberu batu penggilingen ku das takal Abimelek janah retak takalna.+
54 Minter lebuhna si maba senjatana, janah nina man bana, “Buat pedangndu, bunuh aku, gelah la kataken kalak pagi kerna aku, ‘Diberu si munuh ia.’” Emaka tebak pelayanna ia, dung e mate ia.
55 Kenca idah kalak Israel maka Abimelek enggo mate, mulih kalak e kerina.
56 Bage me Dibata mbalas Abimelek perban kejahaten si enggo lakokenna man bapakna, perban enggo bunuhna 70 senina-seninana.+
57 Ibalas Dibata ka kerina kejahaten kalak Sikem. Emaka terjadi man kalak e sumpah Jotam+ anak Jerubaal.+
Cataten i teruh
^ As. “keluarga bulangna si arah mamakna.”
^ Ntah banci saja “kerina si mpuna taneh.”
^ Ntah “Baal-perpadanen.”
^ As. “Adi kuugur-ugur dahanku i datas batang kayu si deban.”
^ As. “Adi kuugur-ugur dahanku i datas batang kayu si deban.”
^ As. “Adi kuugur-ugur dahanku i datas batang kayu si deban.”
^ Ntah “alu licik.”
^ Igelari ka Baal-berit ntah Baal-perpadanen.
