Heber 3:1-19
3 Emaka, o senina-seninaku si badia, si ikut ilebuh* ku surga,+ perdiatekenlah rasul ras Jesus eme imam si mbelin si enggo siakui.+
2 Setia ia man Dibata si milih ia,+ bagi Musa sanga ngelayani bas kerina rumah Dibata.*+
3 Kalak si mbangun rumah lebih ibanggaken asangken rumah e, bage ka Jesus, cocoken ia ndatken kemulian si belinen+ asangken Musa.
4 Tiap rumah lit si mbangunsa, tapi si mbangun kerinana eme Dibata.
5 Musa setia selaku pelayan bas kerina rumah Dibata, janah pelayanenna jadi saksi kerna kai si kataken Dibata pagi.
6 Tapi Kristus setia selaku Anak Dibata+ si jadi kepala bas rumah Dibata. Adi terus kita ngerana alu bebas janah terus paguh bas arapenta seh ku kedungenna, kita jadi rumah Dibata.+
7 Enda sesuai ras kai si ikataken arah kesah si badia+ eme, “Wari enda, adi begiken kena soraKu,
8 ula kena mekeng bagi nini bulang kena si erban Aku merawa bas wari Aku iujina i taneh mesawang,*+
9 uji nini bulang kena Aku janah cubaina Aku, amin pe enggo idah kalak e kerina si Kulakoken 40 tahun dekahna.+
10 E me sebapna ciga kel teKu bangsa e, ningKu, ‘Pusuh kalak e lalap ndauh arah Aku nari, la tandaina dalan-dalanKu.’
11 Merawa Aku janah ersumpah, ‘Ndigan pe kalak e labo masuk ku bas wari istrahatKu.’”+
12 O turang senina, hati-hatilah kena gelah ula sada pe arah kena nari si jahat perukurenna janah kurang kinitekenna perban ndauh arah Dibata si nggeluh.+
13 Tapi pegegehilah sada ras si debanna tiap wari sedekah lenga keri masa si igelari “Wari enda,”+ gelah ula sekalak pe arah kena itipu dosa si erban piher ukur kena.
14 Kita pe banci ikut ngaloken kai si aloken Kristus, adi tetap sijemak alu nteguh seh ku kedungenna kai si tangtangna nari enggo siteki.+
15 Bali ras kata-kata, “Wari enda, adi begiken kena soraKu, ula kena mekeng bagi nini bulang kena si erban Aku merawa.”+
16 Ise kin si megiken sora Dibata tapi banna ka Dibata jadi merawa kel? La kin kerina kalak e si ndarat bas Mesir nari, si ipinpin Musa?+
17 Selain si e, man ise kin ciga ate Dibata sedekah 40 tahun?+ La kin man kalak si ngelakoken dosa si mayatna amparen bas taneh mesawang?*+
18 Kerna ise kin si kataken Dibata sanga ersumpah Ia maka kalak e la masuk ku bas wari istrahatNa? La kin kerna kalak si la patuh nge?
19 E me sebapna maka siidah kalak e la banci masuk perban la erkiniteken.+
Cataten i teruh
^ Ntah “iundang.”
^ Maksudna, i tengah-tengah bangsa Israel.
^ Taneh si mbelang si jarang iingani.
^ Taneh si mbelang si jarang iingani.
