Heber 5:1-14
5 Tiap imam si mbelin si rehna i tengah-tengah manusia nari, ipilih guna kepentingen manusia, eme guna ngurus kai pe si lit hubungenna ras Dibata,+ gelah banci persembahkenna persembahen ras korban guna dosa.+
2 Sekalak imam si mbelin banci rate mekuah man kalak si kurang pemetehna ras si erban salah, perban ia pe ngadapi kelemahenna sendiri.
3 E me sebapna arus persembahkenna korban guna dosana bagi si lakokenna guna dosa bangsa e.+
4 La lit sekalak pe si banci ngelantik dirina guna dahin si mulia enda. Dibata ngenca si banci ngelantiksa bagi Harun mbarenda.+
5 Bage ka me Kristus, labo muliakenna bana+ alu jadi imam si mbelin. Tapi ia imuliaken Dibata si ngataken man bana, “Kam kap anakKu, gundari Aku jadi Bapakndu.”+
6 Nina ka bas ayat si deban, “Kam kap imam seh rasa lalap bali bagi Malkisedek.”+
7 Sanga Kristus nggeluh i doni, tutus atena ertoto, nderkuh ia, mambur iluhna+ mindo man Dibata si banci nelamatken ia arah kematen nari. Ibegiken Dibata totona e perban mbiar ia man baNa.
8 Amin pe ia Anak Dibata, erlajar ia patuh arah kiniseran si nanamina.+
9 Kenca ia jadi sempurna,+ ertanggung jawap ia mereken keselamaten si rasa lalap man kerina kalak si patuh man bana,+
10 perban ia enggo ipilih Dibata jadi imam si mbelin bagi Malkisedek.+
11 Melala denga ate kami si kataken kami kerna ia, tapi mesera kap kami njelaskenca perban kena enggo melet bas ngangkai.*
12 Amin pe gundari kena arusna enggo jadi guru, perluken kena denga sekalak jelma guna ngajar kena mulai tangtangna nari kerna ajaren dasar+ si lit bas kata-kata si badia arah Dibata nari, janah mulihken ka kena merluken susu, labo pangan si keras.
13 Ise pe si lalap minem susu saja, labo angkana kata kebenaren sebap ia anak si kitik denga.+
14 Tapi pangan si keras eme pangan man kalak si dewasa, si kengasupen rukurna rusur pakena, alu bage terlatih ia bas mbedaken kai si benar ras kai si salah.
Cataten i teruh
^ Ntah “megi.”
