Heber 6:1-20
6 Gundari, kenca enggo dung sipelajari ajaren dasar+ kerna Kristus, teruslah siusahaken gelah jadi dewasa,+ janah ula nai kita mulihken ku ajaren dasar, eme ajaren kerna pertobaten arah perbahanen si sia-sia, kerna kiniteken man Dibata,
2 kerna peridin ras kerna namaken tan ku kalak,+ kerna kekeken kalak si mate+ bage pe penghakimen si rasa lalap.
3 Enda me si nandangi silakoken adi pediat Dibata.
4 Kalak si mbarenda enggo iterangi,+ si enggo nggejapken pemere bas surga nari, si enggo ikut ngaloken kesah si badia,
5 janah si enggo nggejapken berita si mehuli arah Dibata bage pe pasu-pasu* bas jaman* si nandangi reh,
6 tapi gundari enggo tulak kalak e ajaren kebenaren,+ emaka labo mungkin kalak enda isampati gelah sadar mulihi guna ertobat, perban ipakuken kalak e ka sekali nari Anak Dibata bas tiang* janah ipermelakenna ia i lebe-lebe jelma si enterem.+
7 Taneh ndatken pasu-pasu arah Dibata nari sanga alokenna lau udan si rusur nusur ku datasna janah hasilkenna sinuan-sinuan si erguna man si nuansa.
8 Tapi adi si hasilken taneh e peren si erduri ras dukut-dukut, taneh e lanai erguna janah mis nge isumpahi, dungna itutung.
9 O turang senina si ikelengi, amin pe bage ning kami, tek kami maka ulin keadan kena asangken kalak e, janah lakoken kena kai pe si lit hubungenna ras keselamaten.
10 Dibata labo la adil, emaka labo lupakenNa perbahanen kena bage pe kekelengen si buktiken kena guna gelarNa+ alu ngelayani kalak si badia ras terus ngelayanisa.
11 Amin pe bage, arapken kami gelah kerina kena tetap rajin bagi sedekah enda, gelah la kena sangsi nandangi arapen kena+ seh ku kedungenna,+
12 gelah ula kena jadi kisat,+ tapi usihlah kalak si ndatken warisen si janjiken Dibata perban kalak e erkiniteken ras sabar.
13 Sanga erjanji Dibata man Abraham, ersumpah Ia bas gelarNa sendiri perban la lit ise pe si terbelinen asangken Ia,+
14 nina, “Pasti Kupasu-pasu kam, enterem pagi Kuban keturunenndu.”+
15 Emaka kenca sabar Abraham nimaisa, alokenna janji e.
16 Manusia ersumpah bas gelar kalak si belinen asangken ia, janah sumpah kalak e ndungi tiap permasalahen, perban sumpah kalak e jadi jaminen si sah man kalak e.+
17 Bage ka pe, sanga perjelas Dibata man ahli waris janji e+ maka peratenNa labo mungkin berubah, jaminNa si e alu sumpah.
18 Duana enda la pernah berubah janah Dibata la mungkin erbual kerna si e.+ Emaka kita si enggo kiam ku ingan perlindungen, banci alu paguh sijemak arapen si lit i lebe-lebeta.
19 Arapenta e pasti ras paguh,+ bagi jangkar bas geluhta, janah babana kita masuk ku pudi tirai e,+
20 i je enggo lit si leben masuk guna kepentingenta, eme Jesus+ si enggo jadi imam si mbelin rasa lalap bagi Malkisedek.+
