Heber 7:1-28
7 Malkisedek raja Salem, imam Dibata Si Meganjangna, jumpa ia ras Abraham si mbaru denga mulih kenca naluken raja-raja, kenca si e pasu-pasuna Abraham.+
2 Bereken Abraham sepersepuluh arah hasil jarahenna. Gelar Malkisedek adi iterjemahken ertina “Raja si Adil,” ia pe igelari ka raja Salem, si ertina “Raja Dame.”
3 La lit iceritaken kerna nande bapa Malkisedek ntah pe kerna nini bulangna. La lit iceritaken kerna pertubuhna ntah pe permatena. Tapi iban ia bagi Anak Dibata, gelah banci ia tetap jadi imam seh rasa lalap.+
4 Perdiatekenlah uga hebatna dilaki enda, ibereken nini bulangta Abraham man bana sepersepuluh hasil jarahen si mehulina.+
5 Payo, menurut Undang-Undang Musa, keturunen Lewi+ si ilantik jadi imam arus mpepulung sepersepuluh arah erta bangsa Israel nari,+ eme arah turang senina kalak e, amin pe kalak e keturunen Abraham.
6 Tapi Malkisedek si labo keturunen kalak Lewi ngaloken sepersepuluh arah Abraham, janah pasu-pasuna Abraham si ndatken janji-janji Dibata.+
7 Kerina kalak setuju maka belinen si masu-masu asangken si ipasu-pasu.
8 Keturunen Lewi si ngaloken perpuluhen e manusia si nandangi mate, tapi lit tertulis bas Kitap si Badia maka lit sekalak dilaki si bagi Malkisedek janah terus nggeluh.+
9 Banci ikataken maka Lewi si ngaloken perpuluhen e enggo nggalar perpuluhen arah Abraham,
10 sebap ia kap keturunenna si lenga lahir sanga jumpa nini bulangna e ras Malkisedek.+
11 Peraturen si lit bas imam keturunen Lewi eme kap bagin arah Undang-Undang Musa si ibereken man kalak Israel. Bicara banci kita sempurna iban keturunen imam Lewi,+ perlu denga kin kita imam si bagi Malkisedek?+ La kin imam si bagi Harun pe enggo bias?
12 Perban peraturen kerna imam iubah, peraturen kerna Undang-Undang Musa pe perlu ka iubah.+
13 Kalak si icakapken e rehna arah suku si deban nari, janah la lit sekalak pe arah suku e pernah erdahin bas ingan nutung* persembahen.+
14 Jelas maka Tuanta rehna arah suku Juda nari,+ tapi la lit ikataken Musa maka imam-imam rehna arah suku e nari.
15 Enda jadi reh jelasna sanga lit imam si deban+ si bagi Malkisedek,+
16 si jadi imam labo perban ia reh arah suku tertentu bagi si arusken undang-undang, tapi perban lit kuasa si erban kegeluhenna la banci ikernepken.+
17 Lit kesaksin kerna ia, “Kam kap imam seh rasa lalap bali bagi Malkisedek.”+
18 Emaka, imasapken me peraturen si ndekah perban peraturen e lemah janah la erguna.+
19 Undang-Undang Musa la banci erban kai pe jadi sempurna,+ tapi ipetandaken me sada arapen si terulin+ si erban kerinana jadi sempurna, janah arah arapen e banci kita rembak ras Dibata.+
20 Bage ka pe, lit sumpah si ikataken kerna ia.
21 (Sebap lit kalak si jadi imam labo perban sumpah, tapi ia jadi imam perban sumpah si ikataken Dibata kerna ia, nina, “Jahwe* enggo ersumpah janah labo pagi Ia berubah pikiren,* ‘Kam kap imam seh rasa lalap.’”)+
22 Alu bage, Jesus jadi jaminen guna sada perjanjin si terulin.+
23 Selain si e, imam-imam dungna mate janah lanai banci ndahiken dahinna. Emaka enterem kalak si arus nggantikenca bas ndahiken dahinna.+
24 Tapi perban Jesus nggeluh seh rasa lalap,+ dahinna selaku imam la perlu igantiken.
25 Emaka, kerina kalak si rembak ras Dibata arah ia, tuhu-tuhu banci selamatkenna, perban ia nggeluh rasa lalap guna erban pemindon man kepentingen kalak e.+
26 Perlu kap kita imam si mbelin si bagenda: si setia, la ersalah, la najis,+ ndauh arah kalak erdosa, janah ipeganjang i datas langit.+
27 Labo ia seri ras imam si mbelin si deban. Perban enggo korbankenna dirina sekali seh rasa lalap,+ emaka la perlu persembahkenna korban tiap wari,+ pertama korban guna dosana, kenca si e korban guna dosa bangsana.+
28 Imam si mbelin si ilantik perban Undang-Undang Musa eme kalak si lit kelemahenna,+ tapi si ilantik perban sumpah+ si lit kenca Undang-Undang Musa eme sekalak Anak, si enggo ijadiken sempurna+ seh rasa lalap.
