Heber 8:1-13
8 Enda si pentingna arah kai si cakapken kami: Lit bas kita imam si mbelin si bage,+ janah enggo kundul ia i sebelah kanan tahta Dibata Si Madakuasa i surga,+
2 ia pelayan bas ingan si badia+ ras bas kemah situhu-tuhu, labo si ibangun manusia tapi si ibangun Jahwe.*
3 Sebap imam si mbelin ilantik guna mpersembahken pemere ras korban, janah ia pe lit ka si perlu persembahkenna.+
4 Bicara lit ia i doni, labo ia jadi imam+ sebap enggo lit kalak si mpersembahken pemere menurut Undang-Undang Musa.
5 Pelayanen si badia si lakoken kalak e jadi contoh ras bayangen+ kerna kai si lit i surga.+ Enda teridah arah perentah Dibata man Musa si berekenNa sanga nandangi banna kemah e, eme, “Banlah kerina e bagi rancangen si enggo ituduhken man bandu i gunung e.”+
6 Tapi gundari enggo aloken Jesus pelayanen si lebih penting, perban ia pe jadi perantara+ sada perjanjin si terulin+ si isahken alu janji-janji si terulin.+
7 Bicara perjanjin si pertama e sempurna, labo perlu lit perjanjin si peduaken.+
8 Tapi idah Dibata kesalahen bangsa e, emaka nina Jahwe,* “‘Bas waktuna pagi, Kuban sada perjanjin si mbaru ras kalak Israel bage pe kalak Juda.
9 Perjanjin e la seri ras perjanjin si enggo Kuban ras nini bulang kalak e sanga Kutegu-tegu kalak e ndarat arah Mesir.+ Perban la kalak e setia man perjanjinKu, lanai Kuperdiateken kalak e,’ nina Jahwe.*
10 “‘Enda perjanjin si Kuban pagi ras kalak Israel kenca masa e,’ nina Jahwe.* ‘Kutama pagi undang-undangKu ku bas perukuren kalak e janah Kutulis bas pusuhna.+ Aku pagi jadi Dibata kalak e, kalak e pagi jadi umatKu.+
11 “‘Lanai pagi lit sekalak pe si ngajari temanna sada bangsa ntah pe seninana guna nandai Jahwe,* sebap kerina pagi kalak e nandai Aku, mulai si kitik nari seh ku si galang.
12 Kuampuni pagi kerina kesalahen kalak e, dosa-dosa kalak e lanai pagi Kuinget.’”+
13 Alu ngataken “perjanjin si mbaru,” perjanjin si pertama enggo jadi perjanjin si ndekah.+ Kai si enggo ndekah ras si reh tuana, masap pagi dungna.+