Hosea 1:1-11
1 Reh kata Jahwe man Hosea* anak Beeri bas jaman Ussia,+ Jotam,+ Ahas,+ ras Hiskia+ raja Juda,+ bage pe bas jaman Jerobeam+ anak Joas+ raja Israel.
2 Sanga ngerana Jahwe arah Hosea, nina Jahwe man Hosea, “Empoilah sekalak diberu. Diberundu e pagi jadi pelacur,* lit pagi anakndu arah pelacurenna* e, sebap negri enda enggo tuhu-tuhu nadingken Jahwe, bagi sekalak pelacur.”*+
3 Emaka empoi Hosea me Gomer anak Diblaim. Hamil Gomer janah lahirkenna sekalak anak dilaki man Hosea.
4 Kenca si e nina Jahwe man bana, “Ban gelarna Jesreel,* sebap lanai ndekah Kupindo pertanggung jawapen man keluarga Jehu+ perban pembunuhen* i Jesreel. Kupengadi pagi kerajan Israel.+
5 Sanga si e, Kupenggelken pagi panah Israel i Lembah* Jesreel.”
6 Hamil ka Gomer janah lahirkenna sekalak anak diberu. Nina Dibata man Hosea, “Ban gelarna Lo-ruhama,* sebap lanai pagi Kucidahken perkuah ateKu+ man bangsa Israel, pasti Kupelawes kalak e.+
7 Tapi Kucidahken pagi perkuah ateKu man kalak Juda,+ janah Aku Jahwe Dibata kalak e+ pagi si nelamatken kalak e. Kuselamatken kalak e labo alu panah ntah pe pedang ntah pe perang ntah pe kuda ntah pe prajurit si erkuda.”+
8 Kenca enggo ngadi Gomer pepinemken* Lo-ruhama, hamil ia janah lahirkenna sekalak anak dilaki.
9 Kenca si e nina Dibata, “Ban gelarna Lo-ami* sebap kena labo umatKu janah Aku labo Dibata kena.
10 “Tapi kalak* Israel pagi bagi kersik i laut buena, si la terkira ntah pe la tertimbang.+ Bas ingan si mbarenda Kukataken man kalak e, ‘Kena labo umatKu,’+ i je pagi Kukataken man kalak e, ‘Kena me anak-anak Dibata si nggeluh.’+
11 Ersada pagi kalak Juda ras kalak Israel,+ jenari pilih kalak e pagi sekalak peminpin janah lawes kalak e arah negri e nari, sebap wari e wari si mbelin pagi man Jesreel.+
Cataten i teruh
^ Singkaten arah Hosyaya, si ertina “Iselamatken Jahwe; Enggo Iselamatken Jahwe.”
^ Ntah “pagi ngelakoken perbahanen seks si salah.”
^ Ntah “perbahanen seksna si salah.”
^ Ntah “bagi kalak si ngelakoken perbahanen seks si salah.”
^ As. “dareh si mambur.”
^ Ertina “Amburken Dibata Pagi Benih.”
^ Ntah “Baluren.”
^ Ertina “La Ndatken Perkuah Ate.”
^ Ntah “mere ASI man.”
^ Ertina “Labo UmatKu.”
^ As. “keturunen.”
