Hosea 11:1-12
11 “Sanga anakKu Israel kitik denga, keleng ateKu ia.+
Kulebuh anakKu arah Mesir nari.+
2 Reh rusurna ilebuh,*Reh dauhna kalak e.+
Terus bereken kalak e persembahen man patung-patung Baal.+
Persembahken kalak e korban man patung-patung ukiren.+
3 Tapi Aku kap si ngajari Eperaim erdalan,+ Kuangkip ia.+
Aku kap si mpepalem kalak e tapi la akui kalak e.
4 Kutarik kalak e ku Aku alu kiniulin ras kekelengen.*+
Aku bagi kalak si ngangkat pasangen* arah kuduk kalak e,Alu lembut Kubaba pangan man tiap kalak.
5 Labo pagi kalak e mulih ku negri Mesir, tapi Assur pagi jadi raja kalak e,+Perban kalak e la nggit mulihken man bangKu.+
6 Iputar-putar pagi pedang ku kota-kotana,+Ihancurken pagi kalak e bage pe palang-palang gerbang kotana perban rencanana si jahat.+
7 UmatKu lalap la setia man bangKu.+
Amin pe kalak e ilebuh ku datas,* la lit sekalak pe si tedis.
8 La banci Kutadingken kam, o Eperaim.+
La mungkin Kuserahken kam, o Israel.
La mungkin Kulakoken man bandu bagi si Kulakoken man Adma.
La mungkin Kuban man bandu bagi si Kuban man Seboim.+
PusuhKu enggo berubah.
Enggo mekuah ateKu man bandu.+
9 Labo pagi Kusehken rawaKu si gara.
Labo pagi Kuhancurken Eperaim,+Sebap Aku Dibata labo manusia,Si Badia si lit i tengah-tengah kena.
Labo pagi Aku reh ndahi kena alu merawa.
10 Erdalan pagi kalak e ngikutken Jahwe, erngaung pagi Ia bagi singa.+
Sanga Ia erngaung, nggirgir pagi anak-anakNa reh arah barat nari.+
11 Nggirgir pagi kalak e bagi perik, sanga kalak e ndarat arah Mesir nari,Bagi merpati ndarat arah negri Assur nari.+
Janah Aku, Jahwe, erban kalak e tading i rumah kalak e pagi.+
12 Lalap Eperaim erbual man bangKu.
Ku japa pe Kunen, Kuidah Israel nipu.+
Tapi Juda tetap erdalan ras Dibata,Setia ia man Si Badiana.”+
Cataten i teruh
^ Maksudna, lit nabi-nabi ras kalak si deban si isuruh guna ngajar Israel.
^ As. “alu tali manusia, alu tali kekelengen.”
^ Pasangen eme alat si biasa itama ku kuduk manusia ntah pe binatang guna maba baban.
^ Maksudna, ku penembahen si terulin.