Hosea 13:1-16
13 “Eperaim kalak si terpandang bas Israel.+
Sanga ngerana ia, nggirgir kalak.
Tapi perban sembahna Baal,+ ersalah ia janah mate.
2 Tambahi kalak e dosa-dosana,Ban kalak e patung logam* arah pirakna.+
Beluh kel kalak e erban berhala-berhala, kerina e tukang si ahli si erbanca.
Nina kalak e, ‘Pediatlah kalak si mpersembahken korban ngema patung anak lembu e.’+
3 Emaka kalak e pagi bagi embun erpagi-pagi,Bagi namur si mis bene,Bagi segal* si kabangken badai bas ingan ngerik,*Bagi asap si ndarat arah lubang i atap.
4 Tapi Aku kap Jahwe Dibatandu mulai bas Mesir nari.+
La lit Dibata si tandaindu selain Aku,La lit si nelamatken kam selain Aku.+
5 Kuperdiateken kam i taneh mesawang,*+ i taneh si gersang.
6 Besur kalak e arah juma kalak e,+Besur kalak e janah dungna meganjang ukur kalak e.
Emaka lupaken kalak e Aku.+
7 Bali pagi Aku bagi singa si nguda denga akap kalak e,+Bagi macan tutul si cebuni i dalan guna njerngem.
8 Reh pagi Aku ndahi kalak e bagi beruang si kebenen anak-anakna,Kurigatken pagi tenten kalak e.
Bagi singa, Kupangani pagi kalak e i je.
Cabik-cabik binatang buas pagi kalak e.
9 O Israel, Kuhancurken pagi kam,Perban lawanndu Aku, lawanndu si nampati kam.
10 Enggo katakenndu, ‘Bereken man bangku raja ras peminpin-peminpin.’+
I ja dage rajandu? Gelah selamatkenna kam bas kerina kotandu.+
I ja dage peminpin-peminpinndu?*
11 Alu merawa, Kubere raja man bandu,+Alu merawa kel, Kubuat pagi ia.+
12 Labo Kulupaken kesalahen Eperaim.
Dosana enggo ihitung ras icatat.
13 Mesui pagi kapna bagi diberu si melahirken.
Tapi ia anak si motu.
Enggo pe seh waktuna ilahirken, la ia nggit ndarat.
14 Kutebus pagi kalak e arah Kuburen* nari.
Kubebasken kalak e arah kematen nari.+
O Kematen, i ja dage bisandu?+
O Kuburen, i ja dage gegehndu guna engkernepken?+
Lanai Kucidahken perkuah ateKu.
15 Amin pe subur perturahna i tengah dukut,Ban Jahwe pagi reh angin timur,Si rehna arah gurun nari guna ngkerahken sumur ras mata lau.
Ijarah pagi kerina ertana si merga.+
16 Samaria ikataken pagi ersalah,+ sebap mberontak ia man Dibatana.+
Ndabuh pagi kalak e alu pedang,+Ipekpeki pagi anak-anak kalak e ngasa mate,Diberu-diberu kalak e si hamil irigatken beltekna.”
Cataten i teruh
^ Ntah “patung tuangen.”
^ Ntah “kulit page; kulit gandum; kulit barli.”
^ Taneh si mbelang si jarang iingani.
^ As. “hakim-hakimndu.”
