Hosea 2:1-23
2 “Kataken man senina-senina kena, ‘Umatku!’*+
Janah kataken man turang-turang kena, ‘O diberu si ndatken perkuah ate!’*+
2 Aduken mamak kena. Adukenlah ia,Sebap ia lanai diberuKu+ janah Aku lanai dilakina.
Ula nai ia jadi pelacur*Janah ula nai ia erlua-lua.
3 Adi lang, Kuban ia tilanjang bagi sanga ia lahir,Kuban ia bagi taneh mesawang,*Bagi taneh si kerah,Kuban ia mate perban muasna.
4 Man anak-anakna, la Kucidahken perkuah ateKu,Sebap kalak e anak-anak hasil pelacuren nari.*
5 Sebap mamak kalak e enggo jadi pelacur.*+
Perbahanen diberu si ngelahirken kalak e erban mela,+ sebap nina,‘Lawes aku njumpai rondong-rondongku,+Si mereken roti ras lau man bangku,Wol ras kain linen, minak ras inemen.’
6 Emaka Kuhalangi dalanna alu peren* si erduri.
Kubangun tembok batu guna ngambati ia,Gelah la lit dalanna ndarat.
7 Ayak-ayakna rondong-rondongna, tapi la datna.+
Daram-daramina kalak e, tapi la ia jumpa.
Kenca bage, nina, ‘Mulihlah aku ku dilakiku,*+Sebap ulin geluhku sanga si e asangken gundari.’+
8 La angkana maka Aku kap si mereken man bana biji-bijin,*+ anggur si mbaru, ras minak,Aku si mereken pirak si seh kel buena man banaBage pe emas, si igunaken kalak e guna nembah Baal.+
9 ‘Emaka bas musim rani, Kubuat pagi biji-bijinKuRas anggurKu si mbaru bas musimna,+Kusentapken pagi wol ras linenKu si nutupi dagingna.
10 Kutilanjangi pagi ia i lebe-lebe rondong-rondongna,Sekalak pe pagi la lit si nelamatken ia arah tanKu.+
11 Kupengadi pagi kerina keriahen ukurna,Perayan-perayanna,+ perayan bulan baruna, Sabatna, ras kerina perayan pilihenna.
12 Kuhancurken pagi batang anggur ras batang arana. Kerna si e nina,
“Enda upahku, si bereken rondong-rondongku man bangku,”Kuban pagi ia bagi kerangen,Pangani binatang liar pagi batang anggur ras batang arana.
13 Kuhukum pagi ia perban wari-wari si pakena mpersembahken korban man patung-patung Baal,+Sanga pakena cincin ras perhiasen ras ayakina rondong-rondongna,Enggo lupakenna Aku,’+ nina Jahwe.
14 ‘Kuendik-endik ia pagi,Kubaba ia ku taneh mesawang,*Lembut pagi Aku ngerana man bana gelah Kudat ukurna.
15 Kuulihken pagi kebun anggurna man bana,+Lewatina pagi Lembah* Akhor+ guna masuk ku negri arapen.
Pasti aloina pagi Aku i je bagi sanga ia nguda denga,Bagi bas wari ia ndarat arah negri Mesir nari.’+
16 Bas wari e pagi, Aku Jahwe ngataken man bana,‘Lebuhndu pagi Aku dilakindu, janah lanai lebuhndu Aku tuanndu.’*
17 ‘Lanai pagi Kubere belaskenna gelar-gelar patung Baal,+Gelar-gelar e lanai pagi iinget.+
18 Bas wari e, Kuban perjanjin ras binatang liar guna umatKu,+Bage pe ras perik-perik i langit ras binatang si nggawang i taneh.+
Kuhancurken pagi arah negri e panah, pedang, ras peperangen,+Kuban pagi kalak e nggeluh alu aman.+
19 Kuban pagi kam jadi diberuKu seh rasa lalap.
Adil ras benar pagi perbahanenKu man bandu,Kucidahken kekelengenKu si setia ras perkuah ateKu.+
20 Erjanji Aku maka setia pagi Aku man bandu,Pasti tandaindu pagi Jahwe.’+
21 Bas wari e, Aku Jahwe pasti ngaloi,‘Pasti Kubereken pemindon langit,Langit pasti mereken pemindon doni.+
22 Doni pasti mereken pemindon biji-bijin, anggur si mbaru, bage pe minak.
Janah si enda kerina pasti mereken pemindon Jesreel.*+
23 Guna diriKu Kuamburken pagi ia bagi ngamburken benih i doni,+Pasti Kucidahken perkuah ateKu man si la ndatken perkuah ate.*
Man kalak si labo umatKu* pasti Kukataken, “Kena kap umatKu,”+
Kalak e pe ngataken, “Kam kap Dibata kami.”’”+
Cataten i teruh
^ Ntah “Ula nai ia ngelakoken perbahanen seks si salah.”
^ Taneh si mbelang si jarang iingani.
^ Ntah “hasil ngelakoken perbahanen seks si salah.”
^ Ntah “enggo ngelakoken perbahanen seks si salah.”
^ Ntah “pagar.”
^ Ntah “dilakiku si pertama.”
^ Taneh si mbelang si jarang iingani.
^ Ntah “Baluren.”
^ Ntah “Baalndu.”
^ Ertina “Amburken Dibata Pagi Benih.”
