Imamat 1:1-17
-
Persembahen tutungen (1-17)
1 Arah kemah perjumpan+ nari lebuh Jahwe me Musa, nina,
2 “Bagendalah nindu man kalak Israel,* ‘Ise pe si atena mpersembahken asuh-asuhenna man Jahwe, arus babana lembu, biri-biri, ntah pe kambing.+
3 “‘Adi lembu si persembahkenna jadi persembahen tutungen, lembu e arus lembu jantan si sehat.+ Persembahenna e arus meriah ukurna+ mabasa ku lebe-lebe Jahwe i pintu masuk kemah perjumpan.
4 Arus tamana tanna ku takal binatang persembahen tutungen e, alu bage aloken Dibata persembahenna e janah dosa-dosana pe iampuniNa.
5 “‘Kenca si e, lembu jantan e arus igeleh i lebe-lebe Jahwe. Si mpersembahken dareh lembu e eme anak-anak Harun si ertugas jadi imam-imam.+ Kalak e ka si mercikken dareh lembu e ku kerina bagin ingan nutung* persembahen,+ si lit i pintu masuk ku kemah perjumpan.
6 Binatang si ipersembahken e arus ikuliti janah ipotong-potong.+
7 Imam-imam keturunen Harun arus mpegara api ras nusun ranting i datas ingan nutung persembahen.+
8 Imam-imam keturunen Harun pe arus namaken daging persembahen si enggo ipotong-potong ndai,+ termasuk bagin takalna ras lemakna* ku datas ranting si enggo gara i datas ingan nutung persembahen e.
9 Usus ras betisna arus icuci alu lau. Kenca si e arus itutung imam-imam kerina e bas ingan nutung persembahen gelah ku das asapna. Enda ndai me persembahen tutungen, persembahen si itutung alu api, si merim* akap Jahwe.+
10 “‘Adi atena mereken biri-biri si nguda ntah pe kambing si nguda jadi persembahen tutungen,+ arus berena biri-biri ntah pe kambing si sehat.+
11 Binatang e arus igeleh i lebe-lebe Jahwe eme i sebelah utara ingan nutung persembahen. Imam-imam keturunen Harun si mercikken dareh binatang e ku kerina bagin ingan nutung persembahen.+
12 Imam si motong-motong daging binatang e bage pe namaken daging si enggo ipotong-potong e, termasuk bagin takalna ras lemakna ku datas ranting si enggo gara i datas ingan nutung persembahen e.
13 Usus ras betisna arus icuci alu lau. Kenca si e arus itutung imam-imam kerina e bas ingan nutung persembahen gelah ku das asapna. Enda ndai me persembahen tutungen si itutung alu api, si merim* akap Jahwe.
14 “‘Tapi adi atena mereken perik jadi persembahen tutungen man Jahwe, arus berena perik ndukur ntah pe merpati si nguda denga.+
15 Imam si arus mpersembahkenca i datas ingan nutung persembahen. Arus gelehna janah tutungna bas ingan nutung persembahen. Tapi dareh perik e arus banna maler ku ingan nutung persembahen.
16 Mbuluna arus icabut janah beruruna* arus ipedarat, jenari iambekken ku ingan abu* si lit i sebelah timur ingan nutung persembahen.+
17 Perik e arus ibelah dua. Belah i antara kabengna tapi ula seh asa retap. Kenca si e arus itutung imam-imam perik e bas ingan nutung persembahen gelah ku das asapna. Enda ndai me persembahen tutungen si itutung alu api, si merim* akap Jahwe.
Cataten i teruh
^ As. “keturunen Israel.”
^ Ntah “lemak si lit i sekeliling ginjalna.”
^ Ntah “si erban meriah.”
^ Ntah “si erban meriah.”
^ Kantong ingan nimpan pangan si lit i kerahung perik.
^ Ntah “abu si lit lemakna,” eme abu si tercampur ras lemak korban.
^ Ntah “si erban meriah.”