Imamat 10:1-20
10 La ndekah kenca si e, anak-anak Harun eme Nadap ras Abihu+ tersada muat ingan rara, tamana rara ku je, jenari tutungna kemenyan+ i datas rara e. Kenca si e ipersembahkenna persembahen si la sah ku lebe-lebe Jahwe,+ si la pernah iperentahken Dibata.
2 Emaka reh api arah Jahwe nari janah ipan api e kalak e duana,+ dungna mate kalak e i lebe-lebe Jahwe.+
3 Kenca si e nina Musa man Harun, “Bagenda nina Jahwe, ‘Kalak si lit i deherKu,+ arus ingetna maka Aku badia janah arus imuliaken bangsa enda Aku.’” Tapi sinik saja Harun.
4 Emaka ilebuh Musa me Misael ras Elisapan. Kalak e duana anak Usiel,+ Usiel e bapak uda Harun. Kenca si e nina Musa man kalak e duana, “Ku jendalah kena, angkat mayat anak-anak senina kena e arah lebe-lebe ingan si badia nari janah baba ku darat perkemahen.”
5 Emaka reh kalak e janah babana mayat e. Mayat e make jubah imam denga. Ibaba kalak e mayat ndai ku darat perkemahen bagi si perentahken Musa.
6 Nina Musa man Harun ras man anak-anak Harun si deban eme Eleasar ras Itamar, “Ula pediat buk kena la terurus janah ula cigatken baju kena,+ gelah ula kena mate janah gelah ula merawa Dibata man bangsa enda. Senina-senina kena bage pe kerina kalak Israel pasti erceda ate perban kematen kalak si ibunuh Jahwe alu api.
7 Ula tadingken kena pintu masuk kemah perjumpan gelah la kena mate, perban minak pelantiken arah Jahwe enggo itama ku takal kena.”+ Emaka lakoken kalak e bagi si kataken Musa.
8 Kenca si e nina Jahwe man Harun,
9 “Kam ras anak-anakndu la banci minem anggur ntah kai pe si lit alkoholna sanga kena masuk ku kemah perjumpan,+ gelah ula kena mate. Enda me peraturen si arus terus ipatuhi kena ras keturunen kena.
10 Peraturen enda iban gelah jelas bedana antara si badia ras si la badia bage pe antara si najis ras si la najis,+
11 janah guna ngajari kalak Israel kerna kerina perentah si ibereken Jahwe man kalak e arah Musa.”+
12 Kenca si e nina Musa man Harun ras man anak-anakna si nggeluh denga eme Eleasar ras Itamar, “Buatlah sisa persembahen pangan* si itutung alu api man Jahwe. Banlah e jadi roti si la itama ragi janah panlah e i deher ingan nutung* persembahen+ perban badia kel roti e.+
13 Enda me si jadi bagin kena ras keturunen kena arah persembahen si itutung alu api man Jahwe, janah arus ipan kena e i bas ingan si badia.+ Enda me si perentahken Dibata man bangku.
14 Arah korban persadan si ibereken kalak Israel, bagin kena ras keturunen kena eme dada binatang persembahen si iayunken ras nahena, eme bagin si badia.+ Enda arus pan kena bas ingan si la najis radu ras anak-anak kena si dilaki ras si diberu.+
15 Arus baba kalak e nahe eme bagin si badia ras dada arah persembahen si iayunken, bage pe lemak arah persembahen si itutung alu api, gelah persembahen e iayunken i lebe-lebe Jahwe. Dada ras nahe e me si lalap jadi bagin kena ras keturunen kena+ bagi si perentahken Jahwe.”
16 Kenca si e darami Musa daging kambing persembahen dosa,+ tapi enggo keri itutung. Emaka merawa ia man Eleasar ras Itamar eme anak-anak Harun si nggeluh denga, nina,
17 “Engkai maka la ipan kena daging persembahen dosa e bas ingan si badia?+ Daging e badia kel janah enda enggo ibere Dibata man kena, gelah kena si nanggung dosa bangsa enda ras erban pemindon gelah iampuni Jahwe dosa bangsa enda.
18 Dareh persembahen e la ibaba ku ingan si badia,+ jadi arusna ipan kena dagingna e bas ingan si badia, bagi si iperentahken Dibata man bangku.”
19 Nina Harun ngaloi Musa, “Enggo persembahken kalak e persembahen dosa ras persembahen tutungen i lebe-lebe Jahwe.+ Tapi la banci kupan daging e perban wari enda enggo terjadi si la mehuli man bangku. Bicara kupan gia daging e, meriah kin ukur Jahwe?”
20 Kenca ibegi Musa ranan Harun e, iangkana engkai maka bage nina.
