Imamat 11:1-47
-
Binatang si la najis ras si najis (1-47)
11 Kenca si e nina Jahwe man Musa ras Harun,
2 “Bagendalah nindu man kalak Israel, ‘Enda binatang si nggeluh i daraten si banci ipan kena:+
3 Binatang e arus memamah biak* ras erbelah silu-siluna janah ercelah silu-siluna.
4 “‘Si la banci pan kena eme binatang si memamah biak ngenca ntah pe si silu-siluna ngenca erbelah. Termasuk unta, perban amin pe ia memamah biak tapi la erbelah silu-siluna. E me sebapna unta pantang ipan.+
5 Bage pe menci gunung,*+ perban amin pe ia memamah biak tapi silu-siluna la erbelah. E me sebapna menci gunung pantang ipan.
6 Bage pe kelinci,* amin pe ia memamah biak tapi silu-siluna la erbelah. E me sebapna kelinci pantang ipan.
7 Bage pe babi,+ perban amin pe silu-siluna erbelah ras ercelah tapi la memamah biak. E me sebapna babi pantang ipan.
8 La banci pan kena dagingna janah la banci kuit kena bangkena. Enda ndai kerina pantang ipan.+
9 “‘Binatang si nggeluh bas lau, la soal bas laut ntah pe bas lau maler, banci pan kena adi lit sisikna ras siripna.+
10 Tapi binatang kai pe si nggeluh bas laut ntah pe bas lau maler, termasuk binatang si kitik bage pe kerina si nggeluh bas lau, arus ciga ate kena adi la lit sisik ras siripna.
11 Kerina e arus ciga ate kena janah la banci pan kena dagingna.+ Bangkena pe arus najis akap kena.
12 Kerina si nggeluh bas lau, si la ersisik ras ersirip arus ciga ate kena.
13 “‘Binatang-binatang si kabang si arus ciga ate kena janah la banci pan kena dagingna eme: kuliki,+ kuliki laut, kuliki mbiring si man bangke,+
14 kuliki si megara ras kerina jenis kuliki si mbiring,
15 kerina jenis burung gagak,
16 burung unta, burung hantu, perik laut,* kerina jenis kuliki falkon,
17 burung hantu si kitik, perik lau,* burung hantu si gedang cuping,
18 angsa, burung pelikan, burung bangke,
19 bangau, kerina jenis perik kuntul, perik hupo, ras kelelawar.*
20 Kerina serangga si erkabeng si erdalan alu empat nahena arus ciga ate kena.
21 “‘Arah kerina serangga si erkabeng si erdalan alu empat nahena, si banci pan kena eme serangga si lit dua nahena si gedangen asangken si dua nari guna lompat i taneh.
22 Enda me serangga si banci ipan: labang biasa, kirik, ras erbage-bage labang si debanna.+
23 Tapi kerina serangga si debanna si erkabeng si erdalan alu empat nahena, arus ciga ate kena.
24 Ise pe si man serangga-serangga e jadi najis. Ise pe si njemak bangke serangga-serangga e jadi najis seh asa terbenam matawari.+
25 Ise pe si njemak bangke serangga-serangga e arus cucina pakenna,+ janah ia jadi najis seh asa terbenam matawari.
26 “‘Kerina binatang si nggeluh bas daraten, si erbelah silu-siluna tapi la lit celahna janah la memamah biak, arus pantangken kena. Ise pe si njemak binatang e jadi najis.+
27 Kerina binatang si empat nahena janah banci ncakar* arus pantangken kena. Ise pe si ngkuit bangke binatang e jadi najis seh asa terbenam matawari.
28 Ise pe si njemak bangke binatang e arus cucina pakenna,+ janah ia jadi najis seh asa terbenam matawari.+ Kerina binatang e arus pantangken kena.
29 “‘Binatang-binatang si nggeluh bas daraten si arus pantangken kena eme: menci taneh, menci,+ ras kerina jenis kadal,*
30 tokek, kadal si galang, salamander,* kadal pasir, ras bunglon.*
31 Kerina binatang e arus pantangken kena.+ Ise pe si njemak bangke binatang e jadi najis seh asa terbenam matawari.+
32 “‘Kai pe si idabuhi bangke binatang e jadi najis, misalna peralaten si iban arah kayu, paken, kulit, ntah pe guni. Kerina e arus icuci alu lau, janah jadi najis seh asa terbenam matawari, kenca si e maka lanai najis.
33 Adi idabuhi bangke e kudin taneh, kudin e arus ipecahken, janah kerina isi kudin e arus najis akap kena.+
34 Pangan kai pe si kena lau arah kudin si bage, pantang pan kena, janah kerina lau inemen si lit bas kudin si bage, e pe enggo pantang.
35 Kai pe si idabuhi bangke e la soal alat panggangen ntah pe kompor si kitik, e enggo jadi najis janah arus ihancurken. Kerina e jadi najis janah arus tetap najis akap kena.
36 Adi bangkena e ndabuh ku mata lau ntah pe ku bas sumur,* lau e la jadi najis. Tapi kalak si ngkuit bangke e jadi najis.
37 Adi bangke e ndabuh ku benih si nandangi isuan, benih e la najis.
38 Tapi adi bangke e ndabuh ku benih si enggo itama lau, benih e arus ianggap najis.
39 “‘Adi mate binatang si banci ipan, ise pe si ngkuit bangke binatang e jadi najis seh asa terbenam matawari.+
40 Ise pe si man bangke ndai arus cucina bajuna janah najis ia seh asa terbenam matawari.+ Ise pe si ngangkat bangke e arus cucina bajuna janah jadi najis ia seh asa terbenam matawari.
41 Kerina binatang si kitik si nggeluh i daraten arus ciga ate kena+ janah arus pantangken kena.
42 Ula pan kena binatang kitik si apai pe si erdalan alu beltekna, ntah pe si erdalan alu empat nahena bage pe si melala nahena, perban kerina binatang e erban ciga ate Dibata.+
43 Ula ban kena diri kena jadi najis ntah pe erban ciga ate Dibata perban binatang-binatang e ndai.+
44 Aku kap Jahwe Dibata kena.+ Arus kena tetap bersih janah badia,+ sebap Aku pe badia.+ Emaka ula ban kena diri kena jadi najis perban binatang-binatang si nggeluh i daraten.
45 Sebap Aku kap Jahwe si negu-negu kena ndarat arah negri Mesir nari, guna mbuktiken maka Aku kap Dibata kena.+ Kena arus badia+ sebap Aku pe badia.+
46 “‘Enda ndai me undang-undang kerna binatang-binatang, binatang si kabang, binatang si nggeluh bas lau, ras binatang si kitik si nggeluh i daraten.
47 Alu bage, banci teh kena apai binatang si najis ras si la najis bage pe binatang si apai si banci ipan ras si la banci ipan.’”+
Cataten i teruh
^ Binatang si ingat-ngatina mulihi pangan si enggo ibendutna.
^ Binatang si mirip bagi marmut si galang, la lit ikurna, janah tading i daerah si erbatu-batu.
^ Binatang enda galangen asa kelinci biasa, janah gedangen cupingna ras nahena asa kelinci biasa.
^ Bas bahasa Indonesia enda perik camar.
^ Nahe perik lau enda bagi nahe bebek, nyelam ia nangkap ikan.
^ Ntah “bengkik.”
^ Contohna singa, beruang, ras srigala.
^ Ntah “lobar.”
^ Binatang enda mirip ras tokek, nggeluh bas ingan si lembap.
^ Ntah “bindoran.”
^ Maksudna, lubang guna nimpan lau.
