Imamat 12:1-8
-
Mbersihken diri kenca melahirken (1-8)
12 Nina Jahwe ka man Musa,
2 “Bagendalah nindu man kalak Israel, ‘Adi lit diberu si hamil jenari lahirkenna sekalak anak dilaki, najis ia pitu wari dekahna bagi sanga najis ia paksa haid.+
3 Bas wari pewaluhken, anakna e arus isunat.+
4 Arus terus bersihkenna dirina arah dareh 33 wari nari dekahna. Sope dung bersihkenna dirina, la banci kuitna kai pe si badia, janah la ia banci masuk ku ingan si badia.
5 “‘Adi anak diberu si ilahirkenna, ia najis sedekah 14 wari bali bagi sanga ia najis paksa haid. Kenca si e arus bersihkenna dirina arah dareh 66 wari nari dekahna.
6 Kenca dung bersihkenna dirina perban enggo lahirkenna anak dilaki ntah pe diberu, arus babana sada biri-biri jantan si nguda denga si umurna setahun ntah kurang jadi persembahen tutungen.+ Janah babana ka sada ndukur ntah pe merpati jadi persembahen dosa ku pintu masuk kemah perjumpan, jenari berekenna man imam.
7 Imam me si mpersembahkenca i lebe-lebe Jahwe janah pindokenna gelah dosa diberu e iampuni. Alu bage, bersih diberu e arah pendarahenna. Enda me undang-undang kerna diberu si melahirken anak dilaki ntah pe diberu.
8 Tapi adi la ngasup diberu e mereken sada biri-biri, arus berekenna dua ndukur ntah pe dua merpati si nguda denga,+ sada man persembahen tutungen janah sada nari man persembahen dosa. Imam me si erban pemindon gelah dosa diberu e iampuni. Alu bage diberu e lanai najis.’”
