Imamat 13:1-59
13 Kenca si e nina Jahwe man Musa ras Harun,
2 “Adi lit sekalak jelma si lit bengkak bas kulitna, ntah korengen, ntah pe mbentar-mbentar si banci saja dungna jadi penakit kusta,*+ arus ia ibaba ku Imam Harun ntah pe ku salah sada anakna.+
3 Arus pereksa imam penakit kulitna e. Adi buk bas kulitna e berubah jadi mbentar janah penakit e bagesen asangken kulit i sekelilingna, penakit e penakit kusta. Adi idah imam si bage, arus umumkenna maka kalak e ndai najis.
4 Tapi adi bercak si lit bas kulitna e warna mbentar janah penakit e la teridah bagesen asangken kulit i sekelilingna, ras buk si lit i je la berubah jadi mbentar, arus pisahken imam ia ku ingan si deban pitu wari dekahna.+
5 Bas wari si pepituken, arus ia pereksa imam. Adi penakit e bage-bage saja ngenca janah la reh belangna, arus pisahken imam ia ku ingan si deban pitu wari nari dekahna.
6 “Bas wari pepituken pereksa imam ka ia mulihi. Adi warna kulitna e mulai normal janah penakit e la reh belangna, arus umumken imam maka ia la najis,+ berarti penakitna e korengen saja ngenca. Arus cucina pakenna, labo ia najis.
7 Amin pe enggo dahina imam janah kataken imam ia la najis, tapi adi korengna e reh belangna, arus ka dahina imam.
8 Arus pereksa imam mulihi penakit e. Adi tuhu kin korengna e reh belangna, arus umumken imam maka ia najis, sebap e penakit kusta.+
9 “Adi lit kalak si kena penakit kusta, arus ibaba ia ku imam,
10 janah arus ia ipereksa imam.+ Adi bengkak kulitna janah mbentar warnana ras buk si lit i je berubah jadi mbentar janah turah ka ugah+ bas bengkak e,
11 berarti penakitna e penakit kusta si mekelek. Arus umumken imam maka ia najis. La perlu ia ipisahken guna ipereksa mulihi,+ perban ia enggo tuhu-tuhu najis.
12 Adi idah imam penakit kusta e reh belangna ku kerina kulitna, mulai arah takalna nari seh ku nahena,
13 arus pereksa imam ia mulihi. Adi idahna penakit e tuhu-tuhu enggo serser ku kerina kulitna,* arus umumken imam maka ia lanai najis. Perban kerina kulitna berubah jadi mbentar, alu bage ia lanai najis.
14 Tapi adi lit turah ugah bas kulitna e, ia jadi najis.
15 Adi lit idah imam turah ugah bas kulitna, arus umumkenna ia najis.+ Ugah e najis perban e penakit kusta.+
16 Tapi adi berubah ugahna e jadi mbentar, arus ka ia reh ndahi imam.
17 Arus pereksa imam ia+ janah adi ugahna e berubah jadi mbentar, arus umumken imam maka ia enggo malem. Lanai ia najis.
18 “Adi lit kalak si enggo malem bisulna,
19 tapi adi bas bekas bisul e lit bengkakna janah warnana mbentar ntah pe mbentar megara-gara, arus tuduhkenna man imam.
20 Pereksa imam me ia.+ Adi bekas bisulna e bagesen asa kulit i sekelilingna janah warna buk si lit i je jadi mbentar, arus umumken imam maka ia najis. Sebap e penakit kusta si turah arah bekas bisulna ndai.
21 Tapi adi enggo pereksa imam ia janah idahna la berubah warna buk si lit i je jadi mbentar, janah penakitna e la bagesen asa kulitna ras warna kulitna enggo jadi pudar, arus pisahken imam ia ku ingan si deban pitu wari dekahna.+
22 Adi idah imam penakit e enggo reh belangna, arus umumken imam maka ia najis, sebap e penakit kusta.
23 Tapi adi si mbentar-mbentar ndai la reh belangna, arus umumken imam maka ia la najis. Sebap e bengkak saja ngenca perban bekas bisulna ndai.+
24 “Adi lit kalak si tertutung kulitna janah bekas lukana si lenga kerah e jadi warna mbentar ntah pe mbentar megara-gara,
25 arus pereksa imam ia. Adi buk si lit bas kulitna e jadi mbentar janah bekas si tertutung e bagesen asa kulit i sekelilingna, enda penakit kusta si turah arah bekas si tertutung ndai, janah arus umumken imam maka ia najis, perban e penakit kusta.
26 Tapi adi enggo pereksa imam janah idahna maka buk si lit i je la jadi mbentar ras bekas si tertutung e pe la bagesen asa kulit i sekelilingna, janah warnana pudar, arus pisahken imam ia ku ingan si deban pitu wari dekahna.+
27 Bas wari si pepituken arus pereksa imam ia janah adi idahna maka e reh belangna, arus umumken imam maka ia najis, perban e penakit kusta.
28 Tapi adi si mbentar-mbentar e la reh belangna janah warnana pudar, berarti e bengkak perban bekas tertutung ndai. Arus umumken imam maka ia la najis, sebap e bengkak perban bekas tertutung ndai ngenca.
29 “Adi lit dilaki ntah pe diberu si ugahen takalna ntah pe isangna,
30 arus pereksa imam ugahna e.+ Adi ugahna e bagesen ngasa kulitna janah buk si lit i je ntah pe janggutna jadi megersing ras menipes, arus umumken imam maka ia najis. Sebap e penakit bas kulit takal ntah pe bas isang. E penakit kusta bas takal ntah pe bas isang.
31 Tapi adi idah imam ugah e la bagesen asa kulitna janah buk si lit i je la mbiring warnana, arus pisahken imam ia ku ingan si deban pitu wari dekahna.+
32 Bas wari si pepituken arus pereksa imam ugahna e. Adi ugah e la reh belangna ras la lit bukna si megersing janah ugah e la bagesen asa kulitna,
33 ia arus icukur, tapi bagin si lit ugahna la banci icukur. Kenca si e arus pisahken imam ia ku ingan si deban pitu wari dekahna.
34 “Bas wari si pepituken arus ka pereksa imam ia mulihi. Adi ugah si bas takalna ras isangna e la reh belangna ras la bagesen asa kulitna, arus umumken imam maka ia la najis. Dung e arus cucina bajuna janah la ia najis.
35 Tapi adi ugahna e reh belangna kenca ia ibersihken,
36 arus pereksa imam ia janah adi tuhu kin ugahna e reh belangna, lanai perlu darami imam lit ntah lang bukna si megersing, perban ia enggo najis.
37 Tapi kenca pereksa imam ugah e janah ugah e la reh belangna ras turah buk si mbiring i je, berarti ugahna e enggo malem. La ia najis janah arus umumken imam ia la najis.+
38 “Adi lit bercak-bercak si mbentar bas kulit dilaki ntah pe diberu,
39 arus pereksa imam ia.+ Adi warna kulitna agak mbentar ngenca berarti e la bahaya. La ia najis.
40 “Adi rontok buk sekalak dilaki janah dungna botak ia, ia labo najis.
41 Adi rontok bukna bas bagin takalna si arah lebe janah dungna sulahen ia, ia labo najis.
42 Adi lit turah ugah si warna mbentar megara-gara bas botakna e ntah pe bas sulahna, berarti e sakit kusta si turah bas botakna ntah pe bas sulahna.
43 Arus pereksa imam ia. Adi ugahna si lit bas botakna ntah pe sulahna e jadi bengkak ras warnana mbentar megara-gara, janah tempa-tempa bagi penakit kusta,
44 berarti ia sakit kusta. Ia najis, janah arus umumken imam maka ia najis perban penakitna e.
45 Ise pe si kena penakit kusta arus pakena baju si merigat-rigat janah pediatna bukna la terurus ras tutupna babahna* janahna serko, ‘Najis, najis!’
46 Sedekah ia sakit kusta, ia tetap najis. Perban ia najis, ia arus tading bas ingan si terpisah eme i darat perkemahen.+
47 “Adi lit paken si kena kusta, la soal paken e iban arah wol ntah pe arah linen nari,
48 ntah kusta e kena ku serat kain si itenun arah wol ntah pe linen, ntah kena ku bahan kulit, ntah kena ku kai pe si iban arah kulit nari,
49 janah kusta e erban paken, bahan arah kulit, serat kain, ras kerina si iban arah kulit ndai jadi lit permeratah-ratahna, lit pergersing-gersingna, ntah lit permegara-garana, barang e arus icidahken man imam, perban barang e enggo kena kusta.
50 Arus pereksa imam penakit e janah barang e itama ku ingan si terpisah pitu wari dekahna.+
51 Bas wari pepituken, arus pereksa imam mulihi barang e. Adi idah imam kusta ndai reh belangna bas paken ndai, serat kain ndai, bage pe bas kerina barang si iban arah kulit ndai (la soal guna kai kulit e ipake) berarti e penakit kusta si mekelek, janah e najis.+
52 Kerina si enggo kena kusta si mekelek, arus itutung imam la soal e paken, ntah serat kain si itenun arah wol ntah pe arah linen nari, ntah barang kai pe si iban arah kulit nari. Si e arus itutung.
53 “Tapi adi idah imam maka kusta e la reh belangna bas paken ndai, ntah bas serat kain ndai, ntah bas kerina si iban arah kulit ndai,
54 arus perentahken imam gelah kerina si enggo kena kusta e icuci, janah arus iban ku ingan si terpisah pitu wari nari dekahna.
55 Kenca dung icuci, arus pereksa imam mulihi. Adi si kena kusta ndai la berubah amin pe la reh belangna, berarti barang e najis. Arus itutung imam barang e perban enggo kena kusta bas baginna si arah bas bage pe si arah darat.
56 “Tapi sanga pereksa imam barang e janah idahna warna kusta ndai enggo pudar kenca icuci, arus cigatkenna bagin si kena kusta arah paken e, bage pe arah serat kain ndai, ras arah barang si iban arah kulit ndai.
57 Tapi adi lit ka turah kusta bas bagin si deban bas paken ndai, ntah bas serat kain ndai, bage pe bas barang si iban arah kulit ndai, berarti kusta e enggo langket. Emaka arus tutungndu kerina, la soal barang kai pe e.+
58 Tapi adi la lit kusta si turah bas bagin si deban arah paken ndai, ntah pe bas serat kain ndai, bage pe bas barang si iban arah kulit si enggo icuci ndai, barang e arus icuci sekali nari, alu bage barang e lanai najis.
59 “Enda me undang-undang kerna kusta si lit bas paken si iban arah wol ntah linen nari, ntah bas serat kain, ntah bas barang kai pe si iban arah kulit nari. Alu bage teh imam barang si apai si arus umumkenna najis ntah pe la najis.”
Cataten i teruh
^ Bas bahasa Heber, kata si iterjemahken jadi “kusta” banci ngertiken erbage jenis penakit kulit si langket. Banci ka ngertiken jamur bas uis ntah pe bas rumah.
^ Ntah “penakit e lanai banci langket ku kalak si deban.”
^ Ntah “kumisna.”
