Imamat 14:1-57
14 Nina Jahwe ka man Musa,
2 “Enda me undang-undang si arus iikutken sanga kalak si kena penakit kusta reh ndahi imam bas wari ia ibersihken arah penakitna.+
3 Imam arus lawes ku darat perkemahen guna mereksa ia. Adi enggo malem penakit kustana ndai,
4 arus isuruh imam ia maba dua perik si la ipantangken, kayu aras, benang megara, ras hisop guna acara pembersihenna.+
5 Isuruh imam kari gelah sada perik ndai igeleh i das ingan lau si iban arah taneh liat nari si risi lau bersih.
6 Kenca si e arus ibuat imam sada nari perik si nggeluh ndai bage pe kayu aras, benang megara, ras hisop, jenari celupkenna kerina ku dareh perik si igeleh ndai.
7 Dung e percikken imam dareh e pitu kali ku kalak si sangana mbersihken diri kenca malem arah penakit kustana, jenari umumken imam maka ia enggo lanai najis, janah lepasken imam me perik si nggeluh ndai ku mbalmbal.+
8 “Kalak si mbersihken diri ndai arus cucina pakenna, cukurna kerina buk si lit bas dagingna, janah arus ia ridi gelah lanai ia najis. Kenca si e, banci ia masuk ku perkemahen, tapi arus ia tading i darat kemahna pitu wari dekahna.
9 I bas wari pepituken, arus cukurna kerina buk takalna, janggutna, ras alisna. Kenca cukurna kerina buk si lit bas dagingna ndai, arus cucina pakenna janah ridi ia. Emaka ia enggo lanai najis.
10 “I bas wari pewaluhken, arus babana dua biri-biri jantan si nguda denga ras sada biri-biri beruna,+ duana biri-biri e arus sehat janah umurna setahun ntah kurang. Arus ka babana telu setengah kilo* tepung halus si icampur minak si jadi persembahen pangan,*+ janah kira-kira sepertelu liter* minak saitun.+
11 Imam si ngumumken maka ia lanai najis arus maba kalak si enggo ibersihken e radu ras persembahenna ku lebe-lebe Jahwe, ku pintu masuk kemah perjumpan.
12 Ibuat imam e sada biri-biri jantan si nguda ndai janah persembahkenna jadi persembahen kesalahen+ radu ras sepertelu minak saitun ndai, jenari ayunkenna jadi persembahen si iayunken i lebe-lebe Jahwe.+
13 Kenca si e biri-biri jantan si nguda ndai arus igeleh imam bas ingan nggeleh persembahen dosa ras persembahen tutungen+ eme bas ingan si badia, perban persembahen kesalahen e jadi jang imam seri bagi persembahen dosa.+ E badia kel.+
14 “Kenca si e arus ibuat imam sitik dareh arah persembahen kesalahen ndai. Jenari tamakenna sitik ku cuping si kanan kalak si mbersihken diri ndai, ku jempol tanna si kanan, ras ku jempol nahena si kanan.
15 Arus ibuat imam sitik minak saitun+ e janah amburkenna ku tapak-tapak tanna si kiri.
16 Kenca si e arus celupken imam jari-jari tan kananna ku minak saitun si lit bas tapak-tapak tan kirina, jenari percikkenna sitik minak e alu jarina pitu kali i lebe-lebe Jahwe.
17 Dung e arus ibuat imam sitik minak saitun si lit bas tapak-tapak tanna janah tamakenna ku cuping si kanan kalak si mbersihken diri ndai, ku jempol tanna si kanan, ras jempol nahena si kanan, bali bagi sanga ia namaken dareh persembahen kesalahen ku kalak ndai.
18 Kenca si e arus tamaken imam sisa minak si lit bas tapak-tapak tanna ndai ku takal kalak si mbersihken diri e, janah arus iban imam pendamen guna ia i lebe-lebe Jahwe.+
19 “Arus korbanken imam persembahen dosa+ janah banna pendamen guna kalak si mbersihken diri e, jenari arus gelehna binatang si jadi persembahen tutungen.
20 Arus persembahken imam persembahen tutungen ras persembahen pangan+ bas ingan nutung* persembahen, jenari arus iban imam pendamen guna kalak e,+ dung e lanai ia najis.+
21 “Tapi, adi kalak mesera ia janah la ngasup mereken si e, arus babana sada biri-biri jantan jadi persembahen kesalahen si jadi persembahen si iayunken man pendamen guna dirina, bage pe sada kilo* tepung halus si icampur minak jadi persembahen pangan, sepertelu liter minak saitun,
22 ras dua ndukur ntah dua merpati si nguda denga, si ngasup ia merekenca. Sada jadi persembahen dosa, sada nari jadi persembahen tutungen.+
23 Bas wari si pewaluhken,+ arus babana si e kerina man imam ku pintu masuk kemah perjumpan i lebe-lebe Jahwe guna acara pembersihen dirina.+
24 “Arus ibuat imam biri-biri jantan si nguda ndai+ ras sepertelu liter minak ndai jenari ayunken imam jadi persembahen si iayunken i lebe-lebe Jahwe.+
25 Kenca si e biri-biri si jadi persembahen kesalahen e arus igeleh imam jenari buatna sitik darehna, janah tamakenna ku cuping si kanan kalak si mbersihken diri ndai, ku jempol tanna si kanan, ras jempol nahena si kanan.+
26 Dung e arus amburken imam sitik minak saitun ku tapak-tapak tanna si kiri,+
27 jenari arus buatna minak si lit bas tapak-tapak tanna e alu jari tanna si arah kanan janah percikkenna pitu kali i lebe-lebe Jahwe.
28 Jenari arus buat imam sitik minak si lit bas tapak-tapak tanna janah tamakenna ku cuping si kanan kalak si mbersihken diri ndai, ku jempol tanna si kanan, ras jempol nahena si kanan, bali bagi sanga ia namaken dareh persembahen kesalahen ku kalak ndai.
29 Kenca si e arus tamaken imam sisa minak si lit bas tapak-tapak tanna ndai ku takal kalak si mbersihken diri e, janah arus iban imam pendamen man kalak ndai i lebe-lebe Jahwe.
30 “Arus persembahken imam sada merpati ntah pe sada ndukur eme persembahen si ngasup kalak ndai merekenca,+
31 sada jadi persembahen dosa janah sada nari jadi persembahen tutungen,+ radu ras persembahen pangan ndai. Jenari arus iban imam pendamen guna kalak si mbersihken diri ndai i lebe-lebe Jahwe.+
32 “Enda ndai me undang-undang si arus ilakoken kalak si kena kusta tapi la ngasup mereken persembahen guna acara pembersihen dirina.”
33 Kenca si e nina Jahwe ka man Musa ras Harun,
34 “Adi enggo masuk pagi kena ku negri Kanaan+ si Kubereken man kena,+ janah adi lit rumah si Kupediat kena penakit kusta,+
35 si mpuna rumah e arus reh ndahi imam janah katakenna maka lit idahna bercak bas tembok rumahna si tempa-tempa bagi kusta.
36 Ope lenga ipereksa imam rumah e, arus lebe isuruhna gelah rumah e ikosongken. Arus ikosongken lebe rumah e ope lenga pereksana gelah la umumkenna maka kerina isi rumah e enggo najis.
37 Sanga ipereksa imam bercak si lit bas rumah e, adi idahna dingdingna lit pergersing-gersingna ras permeratah-ratahna ntah lit permegara-garana, janah enggo meresap ku dingding e,
38 arus ndarat imam arah rumah e jenari tutupna rumah e pitu wari dekahna.+
39 “I bas wari si pepituken arus pereksa imam ka mulihi rumah e. Adi bercak ndai enggo reh belangna i dingding rumah e,
40 arus perentahken imam gelah batu-batu dingding si lit bercakna e ipedarat jenari iambekken ku darat kota, ku ingan ngambekken barang-barang si najis.
41 Kenca si e arus isuruh imam gelah ikiskis kerina bagin si arah bas rumah e. Plester ras semen si enggo ikiskis arah dingding rumah e arus iambekken ku darat kota, ku ingan ngambekken barang-barang si najis.
42 Dung e arus ibuat kalak e batu-batu si deban guna nggantiken batu si enggo iambekken ndai. Janah batu e arus ipasang janah isemen ras iplester mulihi.
43 “Tapi adi turah ka bercak bas rumah e kenca batu-batu ndai ipedarat ras kenca rumah e enggo ikiskis ras iplester,
44 arus ka masuk imam ku bas rumah e guna mereksasa. Adi bercak e reh belangna, berarti e penakit kusta si mekelek.+ Rumah e enggo najis.
45 Kenca si e arus isuruh imam gelah rumah e iruntuhken, termasuk kerina batuna, kayuna, plesterna ras semen rumah e, jenari kerina e iambekken ku darat kota ku ingan ngambekken barang-barang si najis.+
46 Ise pe si masuk ku rumah e sanga rumah e itutup denga,+ ia jadi najis seh asa terbenam matawari.+
47 Ise pe si medem ntah pe man bas rumah e arus cucina bajuna.
48 “Tapi kenca dung rumah e iplester mulihi janah ipereksa imam maka bercak ndai la reh belangna bas rumah e, arus umumken imam maka rumah e la najis, perban bercak ndai enggo bene.
49 Guna acara mbersihken rumah e, arus buatna dua perik, kayu aras, benang megara, ras hisop.+
50 Sada perik e arus igeleh imam i datas ingan lau si iban arah taneh liat nari si risi lau bersih.
51 Kenca si e arus ibuat imam kayu aras, benang megara, hisop, bage pe sada nari perik si nggeluh ndai, jenari celupkenna kerina ku dareh perik si igeleh ndai. Dung e percikken imam dareh e pitu kali ku rumah e.+
52 Iban imam acara pembersihen rumah e alu dareh perik ndai, lau si bersih, perik si nggeluh ndai, kayu aras, hisop, bage pe benang si megara.
53 Jenari lepasken imam me perik si nggeluh ndai ku darat kota, janah iban imam pendamen gelah rumah e bersih ras lanai najis.
54 “Enda ndai me undang-undang kerna erbage penakit kusta, ugah bas takal ntah pe isang,+
55 kusta bas paken+ ntah pe bas rumah,+
56 bage pe kerna bengkak bas kulit, korengen, ras bercak-bercak,+
57 guna meteh apai si najis ras apai si la najis.+ Enda me undang-undang kerna penakit kusta.”+
Cataten i teruh
^ As. “janah 1 log.”
