Imamat 15:1-33
-
Cairen arah alat kelamin si erban najis (1-33)
15 Nina Jahwe ka man Musa ras Harun,
2 “Bagendalah nindu man kalak Israel, ‘Adi lit dilaki si sakit janah ndaraten cairen arah alat kelaminna, cairen e erban ia najis.+
3 La soal cairen e terus ndaraten arah alat kelaminna ntah pe erban tersumbat alat kelaminna, ia tetap najis.
4 “‘I japa pe dilaki si sakit e medem, ingan medemna e jadi najis, janah kai pe si kundulina jadi najis.
5 Ise pe si kuitna ingan medem dilaki ndai arus cucina pakenna janah arus ia ridi, jenari najis ia seh asa terbenam matawari.+
6 Ise pe si kundul i bas ingan si enggo ikunduli dilaki si sakit e arus cucina pakenna janah arus ia ridi, jenari najis ia seh asa terbenam matawari.
7 Ise pe si kuitna dilaki si sakit e arus cucina pakenna janah arus ia ridi, jenari najis ia seh asa terbenam matawari.
8 Ise pe si kena cidur dilaki si sakit e arus cucina pakenna janah arus ia ridi, jenari najis ia seh asa terbenam matawari.
9 Pelana* kai pe si kunduli dilaki si sakit e jadi najis.
10 Ise pe si kuitna kai pe si enggo kunduli dilaki si sakit e, ia najis seh asa terbenam matawari. Ise pe si ngangkat barang si kundulina ndai arus cucina pakenna janah arus ia ridi, jenari najis ia seh asa terbenam matawari.
11 Adi kuit dilaki si sakit e+ kalak si deban ope lenga burihina tanna, kalak si kuitna e arus cucina pakenna janah arus ia ridi, jenari najis ia seh asa terbenam matawari.
12 Adi kuit dilaki si sakit e barang-barang si iban arah taneh liat, barang e arus ipecahken. Adi barang-barang si iban arah kayu nari si ikuitna, barang-barang e arus icuci.+
13 “‘Adi enggo malem dilaki e janah cairen si ndaraten arah alat kelaminna ndai enggo ngadi, pitu wari kenca si e arus bersihkenna dirina, cucina pakenna, ridi ia alu lau bersih, jenari lanai ia najis.+
14 Bas wari pewaluhken, arus babana dua ndukur ntah dua merpati si nguda denga+ ku lebe-lebe Jahwe i pintu masuk kemah perjumpan, janah berekenna man imam.
15 Imamlah si mpersembahken persembahen e, sada jadi persembahen dosa janah sada nari jadi persembahen tutungen. Iban imam me pendamen i lebe-lebe Jahwe gelah dilaki e lanai najis.
16 “‘Adi sekalak dilaki ndarat air manina, arus ia ridi janah najis ia seh asa terbenam matawari.+
17 Paken ntah kai pe si iban arah kulit nari si enggo kena air mani e arus cucina alu lau, janah barang-barang e najis seh asa terbenam matawari.
18 “‘Adi sekalak dilaki ndarat air manina sanga erhubungen seks ras diberu, duana ia arus ridi janah kalak e duana jadi najis seh ngasa terbenam matawari.+
19 “‘Adi sekalak diberu sangana haid, ia najis pitu wari dekahna.+ Ise pe si kuitna ia jadi najis seh ngasa terbenam matawari.+
20 Kai pe si pedemina ntah pe si kundulina sanga ia haid, kerina jadi najis.+
21 Ise pe si kuitna ingan medem diberu e, arus cucina pakenna, ridi ia, janah najis ia seh ngasa terbenam matawari.
22 Ise pe si kuitna barang-barang si enggo kunduli diberu e arus cucina pakenna, ridi ia, janah najis ia seh asa terbenam matawari.
23 Adi kundul diberu e i datas ingan medem ntah pe i datas barang-barang si deban, kalak si kuitna barang-barang e jadi najis seh asa terbenam matawari.+
24 Adi sekalak dilaki erhubungen seks ras diberu si sangana haid,+ dilaki e jadi najis pitu wari dekahna. I japa pe dilaki e medem, ingan medemna e jadi najis.
25 “‘Adi sekalak diberu ndarat darehna padahal ia la sangana haid,+ ntah lalap denga lit ndarat dareh padahal biasana enggo dung ia haid,+ ia jadi najis. Adi terus denga lit ndarat darehna, ia jadi najis seri bagi sanga ia haid.
26 Adi lit denga lalap darehna si ndarat, kai pe si ipedemi ntah pe si kunduli diberu e jadi najis seri bagi sanga ia haid.+
27 Ise pe si kuitna barang-barang e jadi najis. Arus cucina pakenna, ridi ia, janah najis ia seh asa terbenam matawari.+
28 “‘Tapi adi lanai ndarat darehna ndai, lanai ia najis kenca pitu wari.+
29 I bas wari pewaluhken, arus babana dua ndukur ntah pe dua merpati si nguda denga,+ babana e man imam ku pintu masuk kemah perjumpan.+
30 Imamlah si mpersembahken persembahen e, sada jadi persembahen dosa janah sada nari jadi persembahen tutungen. Imam si erban pendamen guna diberu e i lebe-lebe Jahwe gelah diberu e lanai najis.+
31 “‘Bage me cara kena njaga kalak Israel tetap bersih, gelah kalak e la mate perban la pebadiana kemahKu eme kemah ingan kena ersembah si lit i tengah-tengah kena.+
32 “‘Enda ndai me undang-undang kerna dilaki si ndaraten cairen arah alat kelaminna nari, dilaki si najis perban ndarat air manina,+
33 diberu si najis perban haid,+ dilaki si terus ndaraten cairen arah alat kelaminna, diberu si pendarahen,+ bage pe dilaki si erhubungen seks ras diberu si najis.’”
Cataten i teruh
^ Ingan kundul bas gurung binatang.
