Imamat 16:1-34
-
Wari Pendamen (1-34)
16 Kenca mate duana anak Harun perban reh ku lebe-lebe Jahwe,+ ngerana Jahwe man Musa.
2 Nina Jahwe, “Kataken man seninandu Harun gelah ula ate-atena masuk ku Ingan Sibadiana+ si lit i pudi tirai+ janah tedis i lebe-lebe penutup Peti Perjanjin,* gelah ula ia mate,+ sebap reh kari Aku bas embun+ i datas penutup+ Peti e.
3 “Adi masuk Harun ku Ingan Sibadiana, enda me si arus ibabana: sada lembu si nguda denga jadi persembahen dosa+ janah sada biri-biri jantan jadi persembahen tutungen.+
4 Arus pakena jubah linen,+ celana pendek* si iban arah linen nari+ si nutupi awakna seh ku pahana, ikat pinggang linen,+ ras penutup takalna.+ Si e kerina badia.+ Arus bersihkenna dirina alu lau,+ jenari pakena si e ndai kerina.
5 “Arus buatna arah kalak Israel+ nari dua kambing si nguda denga jadi persembahen dosa janah sada biri-biri jantan jadi persembahen tutungen.
6 “Kenca si e, arus persembahken Harun lembu jantan jadi persembahen dosa guna dirina sendiri, janah arus banna pendamen guna ia+ ras keluargana.
7 “Jenari buatna dua kambing janah babana ku lebe-lebe Jahwe ku pintu masuk kemah perjumpan.
8 Arus iundi Harun guna nentuken kambing si apai man Jahwe janah si apai man Asasel.*
9 Arus baba Harun kambing si enggo iundi+ ndai man Jahwe janah persembahkenna e jadi persembahen dosa.
10 Tapi kambing si enggo iundi man Asasel ndai arus ibaba nggeluh-nggeluh ku lebe-lebe Jahwe guna erban pendamen, gelah kambing e ilepasken man Asasel ku taneh mesawang.*+
11 “Arus persembahken Harun lembu si jadi persembahen dosa e guna dirina sendiri, janah banna pendamen guna dirina ras guna keluargana. Kenca si e, gelehna lembu si jadi persembahen dosa e.+
12 “Jenari arus buatna ingan rara+ si dem rara api arah ingan nutung*+ persembahen si lit i lebe-lebe Jahwe, janah buatna ka dua ngkerauk kemenyan si merim,+ jenari babana ku pudi tirai.+
13 Arus ka tamana kemenyan ku datas rara api si lit i lebe-lebe Jahwe,+ gelah asapna nutupi tutup+ Peti Perjanjin e,+ gelah ula ia mate.
14 “Arus buat Harun sitik dareh lembu e+ alu jari-jarina, jenari percikkenna pitu kali ku lebe-lebe tutup Peti e si pengalana ku sebelah timur.+
15 “Arus gelehna kambing persembahen dosa guna bangsa e,+ janah babana darehna ku pudi tirai.+ Jenari arus percikkenna ku lebe-lebe penutup Peti e, bagi si lakokenna man dareh lembu ndai.+
16 “Arus pebadia Harun Ingan Sibadiana arah perbahanen si najis, arah kesalahen ras dosa kalak Israel.+ Arus ka lakokenna bage man kemah perjumpan, si lit i tengah-tengah kalak Israel si perbahanenna najis.
17 “Ise pe la banci lit bas kemah perjumpan sanga iban Harun pendamen, mulai ia masuk seh ngasa ia ndarat. Arus banna pendamen man dirina sendiri, man keluargana,+ bage pe man kerina kalak Israel.+
18 “Kenca si e, arus ia ndarat janah lawes ku ingan nutung persembahen+ si lit i lebe-lebe Jahwe janah pebadiana ingan nutung persembahen e. Arus buatna sitik dareh lembu jantan ras dareh kambing ndai, janah oleskenna ku kerina tanduk si lit bas ingan nutung persembahen.
19 Arus buatna sitik dareh e jenari percikkenna pitu kali ku ingan nutung persembahen alu jari-jarina, guna mpebadiaken ingan e arah perbahanen kalak Israel si najis.
20 “Kenca dung pebadia+ Harun Ingan Sibadiana, kemah perjumpan, ras ingan nutung persembahen,+ arus babana kambing si nggeluh ndai.+
21 Arus tamaken Harun duana tanna ku datas takal kambing si nggeluh e, janah akuina kerina kesalahen kalak Israel, pelanggaren kalak e, ras kerina dosa kalak e. Alu bage, kerina dosa e tempa-tempa tamakenna ku datas takal kambing e.+ Kenca si e kambing e arus ilepasken ku taneh mesawang* janah enggo itentuken ise si ngelepaskenca.
22 Lepaskenna me kambing e, janah baba kambing e me kerina kesalahen+ kalak Israel ku taneh mesawang.*+
23 “Kenca si e, Harun arus masuk ku kemah perjumpan, janah tangtangina baju linen si pakena sanga masuk ku Ingan Sibadiana. Baju e arus itadingken i je.
24 Arus bersihkenna dirina alu lau+ bas ingan si badia janah pakena baju imamna.+ Jenari arus persembahkenna persembahen tutungenna+ ras persembahen tutungen bangsa e,+ janah banna pendamen man dirina ras man bangsa e.+
25 Arus tutungna lemak persembahen dosa bas ingan nutung persembahen gelah ku das asapna.
26 “Kalak si ngelepasken kambing man Asasel+ ndai, arus cucina pakenna janah ridi ia. Kenca si e maka banci ia masuk ku perkemahen.
27 “Lembu jantan bage pe kambing si jadi persembahen dosa si darehna ibaba ku Ingan Sibadiana guna erban pendamen, arus ibaba ku darat perkemahen. Kulitna, dagingna, ras kotoren binatang-binatang e arus itutung.+
28 Kalak si nutungsa ndai arus cucina pakenna janah ridi ia, kenca si e maka banci ia masuk ku perkemahen.
29 “Peraturen enda arus terus patuhi kena: Bas wari pe-10-ken bas bulan pepituken, arus peteruk* kena diri kena janah la banci kena erdahin,+ la soal e kalak Israel ntah pe kalak asing si tading ras kena.
30 Bas wari e, iban me pendamen+ guna kena. Bersihlah kena arah kerina dosa-dosa kena i lebe-lebe Jahwe.+
31 Wari e wari Sabat, wari istrahat si istimewa man kena janah arus peteruk kena diri kena.+ E me peraturen si arus terus patuhi kena.
32 “Imam si ipilih ras si ilantik+ jadi imam+ guna nggantiken bapakna+ arus erban pendamen janah pakena baju linen+ eme baju si badia.+
33 Arus pebadiana ingan si badia,+ kemah perjumpan,+ ras ingan nutung persembahen.+ Arus ka banna pendamen man imam-imam ras man kerina kalak Israel.+
34 Enda me peraturen si arus terus ipatuhi kena.+ Setahun sekali arus ban imam pendamen man kalak Israel gelah kerina dosa kalak e iampuni.”+
Lakoken Harun me kai si perentahken Jahwe arah Musa.
Cataten i teruh
^ Ntah “Peti Perpadanen.”
^ Ntah “paken dalam.”
^ Mungkin ertina “Kambing si Bene.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Mungkin maksudna puasa ras ngikutken larangen-larangen si deban.
