Imamat 18:1-30
18 Nina Jahwe ka man Musa,
2 “Kataken man kalak Israel, ‘Aku kap Jahwe Dibata kena.+
3 Ula usih kena perbahanen kalak si tading i Mesir, ingan tading kena mbarenda. Ula lakoken kena perbahanen kalak si tading bas negri Kanaan, ingan si ku je kari kena Kubaba.+ Ula ikutken kena kebiasan kalak e.
4 Dalankenlah undang-undangKu janah patuhilah peraturen-peraturenKu, ikutkenlah kerina e.+ Aku kap Jahwe Dibata kena.
5 Dalankenlah peraturen-peraturenKu ras undang-undangKu. Ise pe si ndalankenca pasti nggeluh.+ Aku kap Jahwe.
6 “‘Ise pe la banci erhubungen seks ras keluargana.+ Aku kap Jahwe.
7 Ula kena erhubungen seks ras bapak kena, janah ula kena erhubungen seks ras mamak kena. Sebap ia mamak kena emaka ula kena erhubungen seks ras ia.
8 “‘Ula kena erhubungen seks ras diberu bapak kena,+ sebap e perbahanen si mpermelaken bapak kena.
9 “‘Ula kena erhubungen seks ras turang kena, la soal turang kena e anak bapak kena ntah pe anak mamak kena, la soal ia lahir bas sada rumah ras kena ntah lang.+
10 “‘Ula kena erhubungen seks ras kempu kena si diberu la soal ia arah anak kena si diberu ntah si dilaki, sebap perbahanen si bage mpermelaken diri kena sendiri.
11 “‘Ula kena erhubungen seks ras turang kena sada bapak lain mamak, sebap ia pe turang kena kap.
12 “‘Ula kena erhubungen seks ras turang bapak kena. Sebap ia sada dareh ras bapak kena.+
13 “‘Ula kena erhubungen seks ras senina mamak kena. Sebap ia sada dareh ras mamak kena.
14 “‘Ula kena erhubungen seks ras diberu senina bapak kena sebap e mpermelaken senina bapak kena. Mamak kena kap diberuna e.+
15 “‘Ula kena erhubungen seks ras permen kena.+ Sebap ia diberu anak kena, emaka ula kena erhubungen seks ras ia.
16 “‘Ula kena erhubungen seks ras diberu senina kena,+ sebap e mpermelaken senina kena.
17 “‘Ula kena erhubungen seks ras anak si diberu arah diberu si empoi kena.+ Ula kena erhubungen seks ras kempuna si diberu, la soal kempuna e arah anakna si dilaki ntah pe si diberu. Sebap kalak e sada dareh denga ras diberu kena e. Si e perbahanen si pemela-melaken.
18 “‘Adi nggeluh denga diberu kena, ula empoi kena senina diberu kena e guna njadiken ia diberu kena si peduaken+ janah ula kena erhubungen seks ras ia.
19 “‘Ula kena erhubungen seks ras diberu si sangana haid, perban ia sangana najis.+
20 “‘Ula kena erhubungen seks ras diberu kalak, sebap e erban kena najis.+
21 “‘Ula bereken kena anak kena ipersembahken man Dewa Molekh,+ perban e ncedai gelar Dibata.+ Aku kap Jahwe.
22 “‘Ula lit dilaki si erhubungen seks ras dilaki.*+ Perbahanen si bage ciga ate Dibata.
23 “‘La soal dilaki ntah diberu la banci erhubungen seks ras binatang,+ sebap perbahanen si bage pantang man kena janah erban kena najis.
24 “‘Ula ban kena diri kena najis alu perbahanen si e ndai kerina, sebap perbahanen si bage me si ilakoken bangsa-bangsa si nandangi Kupelawes arah lebe-lebe kena nari, janah e me si erban kalak e jadi najis.+
25 Perbahanen kalak e erban kerina negri e najis. Kuhukum pagi penduduk negri e perban kesalahenna. Janah ipelawes pagi penduduk negri e arah negrina nari.+
26 Tapi arus terus ikutken kena peraturen-peraturenKu ras undang-undangKu.+ Kena bage pe kalak asing si tading ras kena la banci ngelakoken kai pe si erban ciga ate ndai.+
27 Perbahanen si erban ciga ate e me si ilakoken penduduk si tading i negri si nandangi idahi kena+ janah e me si erban negri e najis.
28 Emaka adi la ban kena negri e jadi najis, labo kena ipelawes je nari bagi bangsa-bangsa si nandangi ipelawes arah negri e nari.
29 Ise pe si ngelakoken perbahanen-perbahanen si erban ciga ate e arus ibunuh.
30 Arus terus patuhi kena perentahKu. Ula lakoken kena perbahanen si erban ciga ate si ilakoken bangsa-bangsa si tading i je ope kena.+ Alu bage kena la najis. Aku kap Jahwe Dibata kena.’”
Cataten i teruh
^ As. “Dilaki la banci erhubungen seks ras dilaki bagi dilaki erhubungen seks ras diberu.”
