Imamat 19:1-37
-
Erbage undang-undang kerna kai si badia (1-37)
19 Nina Jahwe ka man Musa,
2 “Bagendalah nindu man kalak Israel, ‘Kena arus badia, sebap Aku pe badia. Aku kap Jahwe Dibata kena.+
3 “‘Arus hamati kena mamak kena ras bapak kena.+ Arus dalanken kena wari SabatKu.+ Aku kap Jahwe Dibata kena.
4 Ula sembah kena dibata-dibata si la erguna+ janah ula ban kena berhala-berhala.+ Aku kap Jahwe Dibata kena.
5 “‘Adi persembahken kena korban persadan man Jahwe,+ arus korbanken kena alu cara si benar gelah alokenNa.+
6 Daging korban e arus ipan kena bas wari daging e ipersembahken ntah pe paginna. Tapi adi lit denga sisa bas wari si peteluken, daging e arus itutung.+
7 Adi lit si manca bas wari si peteluken, persembahen e enggo najis janah la ialoken.
8 Kalak si manca arus tanggungna kesalahenna perban enggo hinana kai si badia bas Jahwe, janah kalak e arus ibunuh.
9 “‘Adi perani kena hasil juma kena, ula perani kena seh asa keri bagin si arah pinggir juma kena e, janah ula buati kena si tadingen.+
10 Ula pepulung kena buah anggur kena si tadingen janah ula pepulung kena buah si ndabuhen. Tadingkenlah e man kalak si mesera*+ bage pe man penduduk asing. Aku kap Jahwe Dibata kena.
11 “‘Ula kena nangko,+ ula kena nipu,+ ula kena licik man kalak si deban.
12 Ula kena ersumpah palsu bas gelarKu,+ perban adi bage ban kena, hina kena gelar Dibata kena. Aku kap Jahwe.
13 Ula tipu kena kalak si deban,+ ras ula kena ngerampok.+ Ula tahan kena gaji sierdahin kena seh ngasa paginna.+
14 “‘Ula sumpahi kena kalak si pasek, janah ula tama kena kai pe si banci ngambati i lebe-lebe kalak si pentang,+ mbiarlah kena man Dibata kena.+ Aku kap Jahwe.
15 “‘Sanga hakimi kena kalak si deban, ula kena la adil man bana. Ula bela kena sekalak jelma perban ia mesera ntah pe perban ia bayak.+ Arus hakimi kena kalak si deban alu adil.
16 “‘Ula ceritaken kena si la tuhu kerna ise pe man kalak si deban.+ Ula sengajaken kena ngelakoken kai pe si banci erban kalak si deban mate.*+ Aku kap Jahwe.
17 “‘Ula ate kena segat man kalak si deban bas pusuh kena.+ Arus persingeti kena ia+ gelah ula kena ikut nanggung dosana.
18 “‘Ula kena balas dendam+ ntah pe dendam man kalak si deban. Arus kelengi kena kalak si deban bagi kena engkelengi diri kena.+ Aku kap Jahwe.
19 “‘Arus patuhi kena peraturenKu enda: Ula kawinken kena dua binatang si la seri jenisna, ras ula suan kena dua benih si la seri jenisna bas sada juma,+ janah ula pake kena baju si iban arah dua benang si la seri jenisna.+
20 “‘Adi lit dilaki si erhubungen seks ras sekalak diberu janah diberu e sekalak budak si enggo ijanjiken guna ibere man dilaki si deban, tapi budak e lenga itebus ntah pe ibebasken, kalak e arus ihukum. Tapi kalak e la banci ihukum mate, perban diberu e lenga ibebasken.
21 Arus baba dilaki e sada biri-biri jantan ku pintu masuk kemah perjumpan jadi persembahen kesalahen man Jahwe.+
22 Arus iban imam pendamen guna dilaki e alu mpersembahken biri-biri jantan ndai jadi persembahen kesalahen i lebe-lebe Jahwe. Alu bage dosa dilaki e iampuni.
23 “‘Adi enggo seh pagi kena ku negri si nandangi Kubereken man kena janah suan kena batang kayu si erbuah, buah batang kayu e arus najis akap kena janah la banci pan kena. Bas telu tahun si pertama, buah batang kayu e pantang pan kena. Ula pan kena.
24 Bas tahun si peempatken, kerina buahna jadi badia. Arus persembahken kena kerina man Jahwe alu ermeriah ukur.+
25 Kenca si e, bas tahun si pelimaken, banci pan kena buahna janah hasilna pasti seh kel buena. Aku kap Jahwe Dibata kena.
26 “‘Ula pan kena kai pe si lit denga darehna.+
“‘Ula kena ngeramal ntah pe make ilmu sihir.+
27 “‘Ula cukur kena buk si lit i sekeliling takal kena janah ula potong ujung-ujung janggut kena.*+
28 “‘Ula sayati daging kena guna kalak mate,+ janah ula ban kena tato bas daging kena. Aku kap Jahwe.
29 “‘Ula permelaken kena anak kena si diberu alu njadiken ia pelacur,+ gelah negri kena la najis perban pelacuren bage pe perban lagu langkah si la mehuli.+
30 “‘Arus dalanken kena SabatKu+ janah arus hamati kena inganKu si badia. Aku kap Jahwe.
31 “‘Ula kena erguru man kalak si beluh ngelebuh begu kalak mate+ janah ula pindo kena petunjuk man peramal,+ najis kari kena adi bage ban kena. Aku kap Jahwe Dibata kena.
32 “‘Ergai kenalah kalak si enggo metua,+ hamatilah kalak e,+ janah mbiarlah kena man Dibata kena.+ Aku kap Jahwe.
33 “‘Ula tindas kena kalak asing si tading ras kena.+
34 Kalak asing si tading ras kena arus ianggap kena bagi kalak Israel.+ Kelengilah kalak e bagi kena engkelengi diri kena, sebap kena pe mbarenda jadi penduduk asing nge bas negri Mesir.+ Aku kap Jahwe Dibata kena.
35 “‘Ula gunaken kena alat pengukur, timbangen, ras sukat-sukat* si la pas.+
36 Arus gunaken kena alat pengukur si pas, batu timbangen si pas, sukat-sukat si pas guna nukati bahan-bahan si kerah ras si cair.+ Aku kap Jahwe Dibata kena si maba kena ndarat arah negri Mesir nari.
37 Emaka arus terus patuhi kena kerina peraturen-peraturenKu ras undang-undangKu janah arus terus ikutken kena.+ Aku kap Jahwe.’”
Cataten i teruh
^ Ntah “kalak si susah.”
^ Ntah banci saja “Ula kena sinik saja sanga terancam geluh teman kena.”
^ Mungkin enda kebiasan kalak si la nembah Dibata.
^ Ntah “takaren.”
