Imamat 2:1-16
-
Persembahen pangan (1-16)
2 “‘Adi lit si atena mereken persembahen pangan*+ man Jahwe, persembahen e arus enggo jadi tepung halus janah arus amburkenna minak ku tepung e ras tamana kemenyan mbentar i datasna.+
2 Kenca si e arus babana man imam-imam keturunen Harun. Jenari buat imam kari sengkerauk tepung halus si enggo itama minak ras kemenyan mbentar e, janah tutungna alu api bas ingan nutung* persembahen. Alu bage ku das asapna si jadi tanda maka persembahen+ e enggo ipersembahken janah merim* akap Jahwe.
3 Sisa persembahen pangan e jadi bagin Harun ras keturunenna.+ Sisa persembahen si itutung alu api e seh kel badiana+ akap Jahwe.
4 “‘Adi lit si atena mereken persembahen pangan si ipanggang, persembahen e arus roti si la itama ragi si iban arah tepung halus nari. Roti e bentukna bagi gelang si icampur minak ntah pe roti si menipes si iolesi alu minak.+
5 “‘Adi lit si atena mereken persembahen pangan si ipanggang bas belanga si rata,+ persembahen e arus iban arah tepung si halus nari si la itama ragi tapi icampur ras minak.
6 Persembahen e arus icepik-cepikken janah curcurken minak ku datasna.+ Enda ndai me persembahen pangan.
7 “‘Adi lit si atena mereken persembahen pangan si itanggerken bas kudin, arus banna arah tepung halus ras minak.
8 Arus babana persembahen pangan e man Jahwe. Berekennalah man imam-imam gelah babana ku deher ingan nutung persembahen.
9 Buat imam sitik persembahen e, si jadi tanda maka kerina persembahen e enggo ipersembahken. Tutungna e alu api i datas ingan nutung persembahen gelah ku das asapna.+ E me persembahen si merim* akap Jahwe.+
10 Sisa persembahen pangan e jadi bagin Harun ras keturunenna. Sisa persembahen si itutung alu api e seh kel badiana akap Jahwe.+
11 “‘Persembahen pangan si baba kena man Jahwe la banci itama ragi,+ sebap kai pe si enggo icampur ras ragi ntah pe madu la banci ibereken jadi persembahen si itutung alu api man Jahwe.
12 “‘Banci persembahken kena persembahen pangan si icampur ragi ntah pe madu jadi persembahen hasil rani si pertama man Jahwe.+ Tapi la banci tutung kena i datas ingan nutung persembahen jadi persembahen si merim* akapNa.
13 “‘Tiap persembahen pangan arus itama sira. Ula sempat la tama sira perban sira e ngingetken kena nandangi perjanjin kena ras Dibata kena. Adi mereken persembahen ate kena arus tama kena sira.+
14 “‘Adi bereken kena persembahen pangan arah hasil rani kena si pertama man Jahwe, berekenlah biji-bijin* si mbaru si enggo ipanggang ntah pe si enggo igiling kasar. E me si jadi persembahen pangan arah hasil rani kena si pertama.+
15 Tamakenlah minak ku persembahen e janah ban kemenyan mbentar i datasna. Enda ndai me persembahen pangan.
16 Itutung imam-imam kari sitik persembahen e eme biji-bijin si enggo igiling kasar janah enggo itama minak ras kemenyan mbentar, gelah ku das asapna.+ Enda ndai me si jadi persembahen pangan si itutung alu api man Jahwe.
