Imamat 20:1-27
20 Nina Jahwe ka man Musa,
2 “Bagendalah nindu man kalak Israel, ‘Ise pe ia, la soal kalak Israel ntah pe kalak asing, adi berena persembahen man Dewa Molekh, arus ia ihukum mate.+ Kerina kalak Israel si tading i negri enda arus mbenteri ia alu batu seh asa mate.
3 Kutulak pagi ia janah Kubunuh ia sebap berekenna anakna man Dewa Molekh, janah enggo banna inganKu si badia jadi najis+ ras banna ceda gelarKu si badia.
4 Adi idah bangsa e kalak si mpersembahken anakna man Dewa Molekh, tapi pediat kalak e saja janah la ibunuh kalak e ia,+
5 pasti Kutulak ia bage pe keluargana.+ Pasti Kubunuh ia ras kerina kalak si la setia si ikut nembah Dewa Molekh.
6 “‘Adi lit kalak si la setia man bangKu alu erguru man kalak si beluh ngelebuh begu kalak mate+ ntah pe mindo petunjuk man peramal,+ pasti ia Kutulak janah Kubunuh.+
7 “‘Kena arus bersih janah badia,+ perban Aku kap Jahwe Dibata kena.
8 Arus terus patuhi kena ras dalanken kena peraturen-peraturenKu.+ Aku kap Jahwe si enggo erban kena badia.+
9 “‘Ise pe si sumpahina bapakna ntah pe mamakna arus ibunuh.+ Ia arus mate perban sumpahina bapakna ras mamakna. Ia sendiri si nanggung kesalahenna.
10 “‘Enda me undang-undang kerna dilaki si erhubungen seks ras diberu kalak: Kalak si erlua-lua ras diberu kalak si deban arus ibunuh, la soal dilaki ntah pe diberu si erlua-lua e.+
11 Kalak si erhubungen seks ras diberu bapakna enggo mpermelaken bapakna sendiri.+ Kalak e duana arus ibunuh. Kalak e mate perban kesalahenna.
12 Adi lit dilaki si erhubungen seks ras permenna, kalak e duana arus ibunuh. Sebap e perbahanen si pantang. Kalak e mate perban kesalahenna.+
13 “‘Adi lit dilaki si erhubungen seks ras dilaki bagi dilaki si erhubungen seks ras diberu, duana kalak e enggo ngelakoken perbahanen si erban ciga ate.+ Kalak e arus ibunuh. Kalak e mate perban kesalahenna.
14 “‘Adi lit sekalak dilaki si ngempoi sekalak diberu janah erhubungen seks ia ras mamina,* ia enggo ngelakoken perbahanen si la meteh mela.+ Dilaki e arus ibunuh bage pe duana diberu e jenari itutung,+ gelah ula nai lit perbahanen si bage bas kena.
15 “‘Adi lit dilaki si erhubungen seks ras binatang, dilaki e arus ibunuh bage pe binatang e.+
16 Adi lit diberu si erhubungen seks ras binatang,+ diberu e arus ibunuh bage pe binatang e. Duana arus ibunuh. Dilaki ras diberu si ngelakoken si bage arus ibunuh perban kesalahenna e.
17 “‘Adi lit kalak si erhubungen seks ras turangna, la soal turangna arah bapakna ntah pe arah mamakna, janah enggo siidahen kalak e sanga tilanjang, kalak e enggo ngelakoken perbahanen si pemela-melaken.+ Kalak e arus ibunuh i lebe-lebe jelma si enterem. Enggo ipermelaken dilaki e turangna e. Arus itanggungna kesalahenna e.
18 “‘Adi lit dilaki si erhubungen seks ras diberu si sangana haid, berarti kalak e duana la ngergai dareh.+ Kalak e duana arus ibunuh.
19 “‘Ula kena erhubungen seks ras senina mamak kena ntah pe turang bapak kena, perban e perbahanen si mpermelaken keluarga kena.+ Ise pe si ngelakoken si bage arus itanggungna kesalahenna.
20 Ise pe si erhubungen seks ras diberu senina bapakna, permelakenna kap senina bapakna e.+ Duana kalak e arus nanggung dosana. Duana kalak e arus mate janah la banci lit anak kalak e.
21 Adi lit dilaki si ngempoi diberu seninana,* perbahanenna e erban ciga ate.+ Permelakenna kap seninana e. Ia ras diberu e la banci lit anakna.
22 “‘Arus patuhi kena kerina peraturen-peraturenKu ras kerina undang-undangKu+ janah arus dalanken kena.+ Alu bage la kena ipelawes arah negri si nandangi Kubereken man kena.+
23 Ula ikutken kena peraturen-peraturen arah bangsa-bangsa si nandangi Kupelawes arah lebe-lebe kena nari.+ Sebap enggo lakoken kalak e kerina si ndai janah ciga ateKu kalak e.+
24 E me sebapna maka Kukataken man kena, “Irebut kena me negri kalak e janah Kubereken kari negri e jadi jang kena eme negri si melala kel i je susu ras madu.+ Aku kap Jahwe Dibata kena si misahken kena arah bangsa-bangsa si deban nari.”+
25 Arus teh kena apai binatang si ipantangken ras si lang, apai perik si ipantangken ras si lang.+ Enggo Kutentuken si apai binatang, perik, ntah pe binatang si nggawang ras si njoler* si ipantangken. Emaka ula iban kena diri kena najis perban binatang-binatang e.+
26 Kena arus badia, sebap Aku Jahwe badia kap.+ Enggo Kupisahken kena arah bangsa-bangsa si deban gelah jadi jangKu.+
27 “‘La soal dilaki ntah pe diberu si jadi tukang ngelebuh begu kalak mate ntah pe peramal arus ibunuh.+ Kalak e arus ibenteri alu batu seh ngasa mate. Ia mate perban kesalahenna sendiri.’”
Cataten i teruh
^ Ntah “mamak diberu e.”
^ Maksudna, seninana e nggeluh denga.
^ Ntah “binatang melata.”
