Imamat 21:1-24
21 Nina Jahwe man Musa, “Katakenlah man imam-imam eme anak-anak Harun, ‘Imam la banci banna dirina najis alu njemak mayat kalak Israel si mate,+
2 pala si mate e keluargana kel eme mamakna, bapakna, anakna si dilaki ntah si diberu, seninana,
3 ntah pe turangna si perawan denga si tading ras ia janah lenga erjabu.
4 Ula banna dirina najis alu njemak mayat ndehara sekalak dilaki si lit bas bangsa e.
5 Imam la banci cukurna takalna,+ janggutna, ntah pe lukaina dagingna.+
6 Kalak e arus badia i lebe-lebe Dibatana,+ janah ula ceda iban kalak e gelar Dibatana.+ Sebap kalak e me si mpersembahken persembahen si itutung alu api, eme korban pangan man Jahwe Dibata kalak e. Kalak e arus badia.+
7 Sekalak imam la banci ngempoi pelacur,+ diberu si lanai perawan, bage pe diberu si enggo cerai ras dilakina,+ perban imam e badia i lebe-lebe Dibata.
8 Sekalak imam arus ianggap badia,+ perban imam me si mpersembahken pangan* man Dibata kena. Imam arus badia akap kena, perban Aku Jahwe badia kap janah Aku kap si mpebadia kena.+
9 “‘Adi lit anak si diberu arah sekalak imam si erban dirina najis perban ia jadi pelacur, ipermelakenna kap bapakna. Ia arus ibunuh jenari itutung.+
10 “‘Imam si mbelin si enggo ipilih arah senina-seninana janah enggo iamburken minak pelantiken ku takalna+ ras enggo ipakeken baju imam man bana,+ la banci pediatna bukna la terurus ntah pe rigatkenna bajuna.+
11 La banci banna dirina najis alu njemak mayat kalak mate,+ la soal si mate e bapakna ntah pe mamakna.
12 La banci tadingkenna ingan si badia janah la banci banna najis ingan Dibata si badia,+ sebap enggo iamburken minak pelantiken Dibatana+ ku takalna, si jadi tanda maka enggo berekenna dirina guna ngelayani Dibata. Aku kap Jahwe.
13 “‘Arus empoina sekalak diberu si perawan denga.+
14 La banci empoina janda, diberu si enggo cerai, diberu si lanai perawan, ntah pe pelacur. Tapi diberu si banci empoina arus perawan denga janah arah bangsana nari.
15 La banci banna keturunenna si lit bas bangsa e jadi najis,+ sebap Aku kap Jahwe si mpebadia ia.’”
16 Nina Jahwe ka man Musa,
17 “Kataken man Harun, ‘Ngasa ndigan pe keturunenndu si lit cacatna la banci mpersembahken persembahen pangan man Dibatana.
18 Ise pe si lit cacatna la banci mpersembahken persembahen, enda termasuk kalak pentang, si pincang, si cacat ayona,* si la seri gedang nahena ntah pe tanna,
19 kalak si penggel nahena ntah pe tanna,
20 kalak si mbengkung, kalak si kerdil,* kalak si cacat matana, kalak si kudisen ntah pe kurapen, ntah si cacat alat kelaminna.+
21 Kerina keturunen Imam Harun si lit cacatna la banci mpersembahken persembahen si itutung alu api man Jahwe. Perban ia cacat emaka la banci persembahkenna persembahen pangan man Dibatana.
22 Banci panna pangan si ipersembahken man Dibatana,+ la soal si badia ntah pe si seh kel badiana.+
23 Tapi la banci deherina tirai+ janah la banci deherina ingan nutung* persembahen,+ perban lit cacatna. Janah la banci banna najis inganKu si badia.+ Aku kap Jahwe si mpebadia kalak e.’”+
24 Emaka ipeseh Musa kerina perentah e man Harun ras anak-anakna bage pe man kerina kalak Israel.
