Imamat 22:1-33
22 Nina Jahwe ka man Musa,
2 “Katakenlah man Harun ras anak-anakna gelah hati-hati kalak e ngurus kai pe si badia si ipisahken ras ipersembahken kalak Israel man bangKu.+ Ula sempat ban kalak e ceda gelarKu si badia.+ Aku kap Jahwe.
3 Kataken man kalak e, ‘Ngasa ndigan pe, adi lit keturunen kena si ndeheri kai pe si badia si ipisahken kalak Israel man Jahwe, padahal ia sangana najis, kalak e arus ibunuh.+ Aku kap Jahwe.
4 Ise pe keturunen Harun si sakit kusta+ ntah pe si ndaraten cairen arah kelaminna nari,+ la banci panna kai pe si badia seh ngasa lanai ia najis,+ bage ka pe si ngkuit kalak si najis perban kalak mate,+ ntah pe si mpedarat air mani,+
5 ntah si ngkuit binatang kitik si najis,+ ntah si ngkuit kalak si najis perban kai pe.+
6 Ise pe si ngkuit kai pe si najis bagi si ndai, ia jadi najis seh asa terbenam matawari. La banci panna kai pe si badia janah arus ia ridi.+
7 Sanga enggo terbenam matawari, lanai ia najis, janah banci panna pangan si badia, perban e kap panganna.+
8 La banci panna daging binatang si enggo mate sanga idat ntah pe si mate perban icabik-cabik binatang buas, gelah la ia jadi najis.+ Aku kap Jahwe.
9 “‘Arus patuhi kalak e perentahKu gelah ula kalak e erdosa janah mate perban banna jadi najis kai si badia. Aku kap Jahwe si mpebadia kalak e.
10 “‘Ise pe si la iijinken* la banci panna kai pe si badia.+ Kalak upahen ntah pe kalak asing si tading ras imam la banci panna kai pe si badia.
11 Tapi kalak si itukur imam alu senna sendiri banci ikut manca. Budak si lahir bas rumahna pe banci ikut manca.+
12 Tapi anak imam si sereh man dilaki si labo imam,* la banci ikut man kai pe si badia.
13 Tapi adi anak imam e jadi janda, ntah iceraiken, ntah pe la lit anakna, jenari mulihi ia tading bas rumah bapakna bagi sanga ia nguda denga, banci panna pangan bapakna.+ Tapi kalak si la iijinken* la banci manca.
14 “‘Tapi adi lit kalak si la sengaja terpanna kai si badia, arus gantina kai si badia e janah tambahina seperlima nari jenari berekenna man imam.+
15 Emaka la banci najis iban imam kai pe si badia si enggo isumbangken kalak Israel man Jahwe,+
16 janah la banci banna kalak Israel ersalah ras ihukum perban ipan kalak e kai si badia. Aku kap Jahwe si mpebadia kalak e.’”
17 Nina Jahwe ka man Musa,
18 “Katakenlah man Harun, man anak-anakna, bage pe man kalak Israel, ‘Adi lit kalak Israel ntah pe penduduk asing si tading bas Israel, janah berena atena persembahen tutungen+ man Jahwe guna nepati janjina ntah pe guna mereken persembahen sukarela,+
19 si banci persembahkenna eme lembu jantan,+ biri-biri jantan si nguda denga, ntah pe kambing si sehat, gelah persembahenna e ialoken Dibata.
20 Ula persembahken kena kai pe si lit cacatna,+ perban labo aloken Dibata persembahen si bage.
21 “‘Adi lit kalak si mereken korban persadan+ man Jahwe guna nepati janjina ntah pe guna persembahen sukarela, si banci persembahkenna eme lembu, biri-biri, ntah pe kambing si sehat gelah ialoken Dibata. Binatang-binatang e la banci lit cacatna.
22 Binatang persembahen e la banci pentang, la banci penggel tulanna, la banci lit lukana, la banci lit kutilna, kudisen, ntah pe kurapen. Ula bereken kena binatang si bage man Jahwe janah ula persembahken kena man Jahwe bas ingan nutung* persembahen.
23 Lembu ntah pe biri-biri si nahena sigedangen banci persembahken kena jadi persembahen sukarela. Tapi adi si e iban kena jadi persembahen guna nepati janji, persembahen e la aloken Dibata.
24 Ula persembahken kena man Jahwe binatang si ceda telor alat kelaminna, si pecah, si ipedarat ntah pe si ipotong telor alat kelaminna. Ula persembahken kena binatang si bage bas negri kena.
25 Adi lit kalak asing si mereken persembahen si bage, ula persembahken kena jadi pangan man Dibata kena, perban persembahen e ceda ras cacat. Persembahen si bage pasti erban Dibata la senang man kena.’”
26 Nina Jahwe ka man Musa,
27 “Adi lit lembu jantan, biri-biri jantan, ntah pe kambing si mbaru lahir, pediatlah ia ras indungna pitu wari dekahna.+ Tapi kenca wari pewaluhken, binatang e enggo banci ialoken jadi persembahen, eme persembahen si itutung alu api man Jahwe.
28 Lembu jantan ntah pe biri-biri la banci igeleh ras anakna i bas wari si seri.+
29 “Adi bereken kena korban pengatan bujur man Jahwe,+ arus korbanken kena alu cara si benar gelah aloken Dibata.
30 Korban e arus ipan kena bas wari e. La banci lit si sisa seh ngasa paginna.+ Aku kap Jahwe.
31 “Arus patuhi kena perentah-perentahKu janah arus dalanken kena.+ Aku kap Jahwe.
32 Ula ban kena ceda gelarKu si badia.+ Arus pebadia kena Aku i tengah-tengah kalak Israel.+ Aku kap Jahwe, si mpebadia kena,+
33 si maba kena ndarat arah negri Mesir nari guna mbuktiken maka Aku kap Dibata kena.+ Aku kap Jahwe.”
Cataten i teruh
^ As. “Kalak asing,” eme dilaki si labo arah keturunen Harun.
^ Ntah “man kalak asing.”
^ As. “Kalak asing,” eme dilaki si labo arah keturunen Harun.
