Imamat 23:1-44
23 Nina Jahwe ka man Musa,
2 “Katakenlah man kalak Israel, ‘Perayan-perayan+ si kataken Jahwe gelah irayaken kena eme wari perpulungen+ si badia man kerina kalak. Arus umumkenndu kerina perayan e. Enda me perayan-perayanKu e:
3 “‘Banci kena erdahin enem wari dekahna, tapi wari si pepituken eme wari Sabat,+ wari si istimewa ras perpulungen si badia. I japa pe kena tading, kena la banci erdahin, perban wari e wari Sabat man Jahwe.+
4 “‘Enda me perayan-perayan man Jahwe, eme perpulungen si badia si arus umumken kena bas waktu si enggo itentuken:
5 Bas wari pe-14-ken bas bulan si pertama,+ paksa karaben,* eme Paskah+ man Jahwe.
6 “‘Bas wari si pe-15-ken bas bulan e eme Perayan Roti si La Itama Ragi man Jahwe.+ Pitu wari dekahna arus pan kena roti si la itama ragi.+
7 Bas wari si pertama arus ban kena perpulungen si badia.+ Ula lakoken kena pendahin si mberat.
8 Tapi arus bereken kena persembahen si itutung alu api man Jahwe pitu wari dekahna. Bas wari si pepituken lit perpulungen si badia. Ula lakoken kena pendahin si mberat.’”
9 Nina Jahwe ka man Musa,
10 “Katakenlah man kalak Israel, ‘Kenca masuk pagi kena ku negri si nandangi Kubereken janah perani kena pagi hasil juma kena, arus baba kena sada iket hasil si pertama+ arah juma kena man imam.+
11 Ayunken imam me hasil rani e i lebe-lebe Jahwe gelah ialoken. Imam si arus ngayunkenca sada wari kenca wari Sabat.
12 Bas wari hasil rani e iayunken, arus persembahken kena sada biri-biri jantan si nguda denga, si umurna setahun ntah kurang jadi persembahen tutungen man Jahwe.
13 Persembahken ka persembahen pangan* si buena dua kilo* tepung halus si icampur minak, eme si jadi persembahen si itutung alu api man Jahwe si merim* akapNa. Janah persembahken ka persembahen inemen anggur si buena hampir sada liter.*
14 Ope lenga baba kena persembahen kena man Dibata kena, ula pan kena roti, biji-bijin* si ipanggang, ntah pe biji-bijin si mbaru. Enda me peraturen si arus ikutken kena ras keturunen kena i japa pe kena tading.
15 “‘Sada wari kenca wari Sabat eme wari sanga baba kena sada iket hasil rani jadi persembahen si iayunken,+ kira kenalah pitu wari Sabat mulai bas wari e nari janah jumlahna arus dem pitu minggu.
16 Bas wari si pe-50-ken,+ eme sada wari kenca Sabat si pepituken, arus persembahken kena persembahen pangan si mbaru man Jahwe.+
17 Arus baba kena dua roti arah rumah kena nari guna persembahen si iayunken. Roti e arus iban arah dua kilo* tepung halus janah itama ragi,+ kenca si e ipanggang. E me hasil peranin si pertama man Jahwe.+
18 Radu ras roti e arus ka persembahken kena pitu anak biri-biri jantan si sehat si umurna setahun, bage pe sada lembu jantan si nguda denga, ras dua biri-biri jantan.+ Si e kerina ibereken radu ras persembahen pangan ras inemen si jadi persembahen tutungen man Jahwe. Enda me persembahen si itutung alu api man Jahwe, si merim* akapNa.
19 Bereken ka sada anak kambing jadi persembahen dosa,+ ras dua biri-biri jantan si umurna setahun jadi korban persadan.+
20 Ayunken imam duana biri-biri e radu ras roti-roti hasil rani si pertama jadi persembahen si iayunken i lebe-lebe Jahwe. Enda kerina badia man Jahwe janah enda me si jadi bagin imam.+
21 Bas wari e umumkenndulah+ maka nandangi iban perpulungen si badia. Ula lakoken kena pendahin si mberat. Arus patuhi kena ras keturunen kena peraturen enda, la soal i japa pe kena tading.
22 “‘Sanga perani kena hasil juma kena, ula perani kena ngasa keri bagin si arah pinggir juma e janah ula buati kena si tadingen.+ Tadingkenlah e man kalak si mesera+ bage pe man penduduk asing.+ Aku kap Jahwe Dibata kena.’”
23 Nina Jahwe ka man Musa,
24 “Katakenlah man kalak Israel, ‘Bas wari pertama bas bulan pepituken, la kena banci erdahin. Bas wari e iembus me trompet+ guna ngumumken maka arus ban kena perpulungen si badia.
25 Ula lakoken kena pendahin si mberat, janah arus persembahken kena persembahen si itutung alu api man Jahwe.’”
26 Nina Jahwe ka man Musa,
27 “Tapi bas wari pe-10-ken bas bulan si pepituken eme Wari Pendamen.+ Arus ban kena perpulungen si badia janah arus peteruk* kena diri kena+ ras persembahken kena persembahen si itutung alu api man Jahwe.
28 Bas Wari Pendamen e ise pe la banci erdahin, perban wari e eme wari guna erban pendamen+ man kena i lebe-lebe Jahwe Dibata kena.
29 Ise pe si la peterukna bana* bas wari e arus ibunuh.+
30 Ise pe si erdahin bas wari e pasti Kukernepken.
31 Ise pe la banci erdahin. Enda me peraturen si arus terus ipatuhi kena bage pe keturunen kena i japa pe kena tading.
32 Wari e eme wari Sabat, wari istrahat si istimewa man kena.+ Bas wari pesiwahken bas bulan e, eme kenca terbenam matawari, arus peteruk kena diri kena. Mulai arah terbenam matawari seh asa terbenam ka matawari, arus kena patuh ndalanken Sabat e.”
33 Nina Jahwe ka man Musa,
34 “Kataken man kalak Israel, ‘Bas wari pe-15-ken bas bulan pepituken eme wari Perayan Sapo-Sapo man Jahwe, rayakenlah e pitu wari dekahna.+
35 Bas wari si pertama arus iban kena perpulungen si badia, janah ula lakoken kena dahin si mberat.
36 Pitu wari dekahna arus bereken kena persembahen si itutung alu api man Jahwe. Bas wari pewaluhken, arus ban kena perpulungen si badia+ janah arus bereken kena persembahen si itutung alu api man Jahwe. Enda perpulungen si istimewa. Ula lakoken kena dahin si mberat.
37 “‘Enda ndai me perayan-perayan+ man Jahwe si arus iumumken. Perayan-perayan e perpulungen si badia.+ I je ka me waktuna ibereken kena persembahen si itutung alu api man Jahwe, eme persembahen tutungen,+ persembahen pangan+ ras persembahen inemen+ menurut jadwal si enggo itetapken tiap warina.
38 Si e ndai kerina jadi tambahen man kai si biasana ipersembahken man Jahwe bas wari Sabat.+ Persembahen-persembahen+ e ndai pe jadi tambahen man persembahen sukarela,+ persembahen guna nepati janji,+ bage pe korban-korban si debanna si arus ibereken kena man Jahwe.
39 Bas wari pe-15-ken bas bulan pepituken, kenca dung perani kena hasil juma kena, arus ban kena perayan man Jahwe pitu wari dekahna.+ Wari si pertama ras wari si pewaluhken jadi wari istrahat si istimewa.+
40 Bas wari pertama, pepulunglah buah-buahen si mejilena, bulung-bulung kurma,+ dahan kayu si mbue bulungna, bage pe dahan kayu poplar si lit i lembah.* Ermeriah ukurlah kena+ i lebe-lebe Jahwe Dibata kena pitu wari dekahna.+
41 Tiap tahun, arus rayaken kena perayan e man Jahwe pitu wari dekahna.+ Peraturen enda arus terus patuhi kena bage pe kerina keturunen kena. Rayakenlah perayan e bas bulan pepituken.
42 Arus kena tading bas sapo-sapo pitu wari dekahna.+ Kerina kalak Israel arus tading bas sapo-sapo.
43 Gelah iteh keturunen kena pagi+ maka sanga Kubaba mbarenda kalak Israel ndarat arah Mesir, Kusuruh kalak e tading bas sapo-sapo.+ Aku kap Jahwe Dibata kena.’”
44 Emaka kataken Musa man kalak Israel kerna perayan-perayan man Jahwe.
Cataten i teruh
^ Maksudna, kenca terbenam matawari.
^ Ntah “si erban meriah.”
^ As. “si buena 1/4 hin.”
^ Ntah “si erban meriah.”
^ Mungkin maksudna puasa ras ngikutken larangen-larangen si deban.
^ Ntah banci saja “la puasa.”
