Imamat 24:1-23
24 Nina Jahwe ka man Musa,
2 “Suruhlah baba kalak Israel minak saitun murni guna lampu-lampu gelah lalap gara.+
3 Arus pegara Harun lampu-lampu si lit i darat tirai pemisah i deher Peti Perjanjin.* Kerina lampu bas kemah perjumpan e arus lalap gara i lebe-lebe Jahwe mulai berngi seh ngasa erpagi-pagi. Enda peraturen si arus terus ikutken kena bage pe keturunen kena.
4 Harun me si arus terus ngurus lampu-lampu bas ingan lampu+ si iban arah emas murni e i lebe-lebe Jahwe.
5 “Pangganglah 12 roti si bentukna bagi gelang. Tiap roti arus iban arah dua kilo* tepung halus.
6 Tamalah roti-roti e i datas meja si iban arah emas murni nari si lit i lebe-lebe Jahwe.+ Ban roti ndai jadi dua bagin jenari ban roti e sitindihen janah tiap baginna ban enem roti.+
7 Tamalah kemenyan mbentar si murni ku datas duana bagin roti e janah kemenyan e me si jadi tanda maka kerina roti e enggo jadi persembahen+ si itutung alu api man Jahwe.
8 Tiap wari Sabat, kerina roti e arus itama i lebe-lebe Jahwe.+ Enda me perjanjinKu ras kalak Israel seh rasa lalap.
9 Roti e me si jadi bagin Harun ras anak-anakna,+ janah arus ipan kalak e bas ingan si badia,+ perban roti e ibuat arah persembahen si itutung alu api man Jahwe. Roti e badia kel. Perentah enda arus terus ipatuhi kalak e.”
10 Bas perkemahen kalak Israel, lit sekalak dilaki si mamakna kalak Israel janah bapakna kalak Mesir.+ Rubati dilaki e ras sekalak dilaki arah kalak Israel.
11 Ihina ras isumpahi anak dilaki si mamakna kalak Israel e gelar Dibata.+ Emaka ibaba ia ngadap man Musa.+ Mamak dilaki e gelarna Selomit anak Dibri arah suku Dan nari.
12 Itahan me dilaki e seh asa iteh kalak e kai keputusen Jahwe.+
13 Kenca si e nina Jahwe man Musa,
14 “Baba dilaki si numpahi Aku e ku darat perkemahen. Kerina kalak si megi kata-katana e arus namaken tanna ku takal dilaki e, jenari kerina kalak Israel arus mbenteri ia alu batu.+
15 Arus katakenndu man kalak Israel, ‘Ise pe si numpahi Dibatana arus tanggungna dosana e.
16 Emaka ise pe si ihinana gelar Jahwe arus ibunuh.+ Kerina kalak Israel arus mbenteri ia alu batu. Penduduk asing si tading ras kalak Israel pe arus ibunuh adi ihinana gelar Dibata.
17 “‘Ise pe si munuh kalak si deban arus ibunuh.+
18 Ise pe si munuh asuh-asuhen kalak si deban arus nggalar ganti rugi, kesah ganti kesah.
19 Ise pe si erban kalak si deban suin, arus iban ka man bana bagi si ilakokenna e.+
20 Tulan si penggel ganti tulan si penggel, mata ganti mata, ipen ganti ipen, uga ia erban kalak suin bage ka me si arus iban man bana.+
21 Ise pe si munuh binatang arus nggalar ganti rugi,+ tapi ise pe si munuh kalak si deban arus ibunuh.+
22 “‘Peraturen e arus ipatuhi kalak Israel bage pe penduduk asing si tading ras kena,+ sebap Aku kap Jahwe Dibata kena.’”
23 Kenca si e ngerana Musa man kalak Israel janah baba kalak e dilaki si numpahi Dibata ndai ku darat perkemahen, jenari benteri kalak e ia alu batu.+ Lakoken kalak Israel kerina si iperentahken Jahwe man Musa.
