Imamat 25:1-55
25 Nina Jahwe ka man Musa i Gunung Sinai,
2 “Kataken man kalak Israel, ‘Adi enggo masuk kena ku negri si Kubereken man kena,+ pediatlah taneh bas negri e la isuani janah patuhilah wari Sabat Jahwe.+
3 Enem tahun dekahna banci suani kena juma kena, pangkas kena kebun anggur kena, janah banci pepulung kena hasil juma kena.+
4 Tapi bas tahun pepituken, ula suani kena juma kena, ula pangkas kena kebun anggur kena, sebap tahun e eme Sabat man Jahwe.
5 Ula pepulung kena hasil arah biji-bijin si ndabuhen si turah kenca musim rani, janah ula pepulung kena buah arah batang anggur si la ipangkas. Sebap bas tahun e, la banci perjumai kena taneh e.
6 Tapi buah sinuan-sinuan si turah bage-bage saja sedekah tahun Sabat e, banci pan kena, banci pan budak kena si dilaki ras si diberu, sierdahin kena, kalak asing si tading ras kena,
7 bage pe asuh-asuhen ras binatang liar si lit i negri kena. Kerina hasil juma e banci ipan.
8 “‘Kiralah pitu tahun Sabat, eme pitu tahun kali pitu. Emaka jumlahna 49 tahun.
9 Bas wari si pe-10-ken bas bulan pepituken eme Wari Pendamen.+ Bas wari e, arus embus kena trompet janah megang ban sorana seh ngasa terbegi ku kerina negri kena.
10 Tahun si pe-50-ken eme tahun si badia emaka arus umumken kena wari pembebasen man kerina penduduk negri kena.+ Tahun e eme Tahun Pembebasen* man kena. Emaka arus kena mulih ku taneh kena ras keluarga kena sekalak-sekalak.+
11 Tahun si pe-50-ken eme Tahun Pembebasen man kena. Ula suani kena juma kena, janah sinuan-sinuan si turah bage-bage saja kenca musim rani ula perani kena buahna, bage pe ula perani kena buah anggur si la ipangkas.+
12 Sebap tahun e eme Tahun Pembebasen, emaka arus badia akap kena. Si banci ipan kena eme buah sinuan-sinuan si turah bage-bage saja.+
13 “‘Bas Tahun Pembebasen e, kerina kalak arus mulih ku tanehna sekalak-sekalak.+
14 Adi kena erdaya ntah pe nukur, ula ban kena rugi kalak si deban.+
15 Adi tukur kena taneh kalak, kiralah piga tahun enggo lewat kenca Tahun Pembebasen. Erga taneh e itentuken arah piga kali nari kena banci mperani hasil juma e seh ngasa Tahun Pembebasen si berikutna.+
16 Adi ndekah denga, erga taneh e banci itambahi. Tapi adi tading piga-piga tahun nari ngenca, erga taneh e banci ikurangi, perban si dayakenna eme asa kai buena si ihasilken taneh e.
17 Ula ban kena kalak si deban jadi rugi.+ Mbiarlah kena man Dibata kena,+ sebap Aku kap Jahwe Dibata kena.+
18 Adi patuhi kena peraturen-peraturenKu ras undang-undangKu janah terus dalanken kena, la lit si banci erban kena mbiar bas negri e.+
19 Ibereken taneh e me hasilna+ janah puas kena manca, ras la lit si erban kena mbiar bas negri e.+
20 “‘Tapi banci saja lit si nungkun, “Kai kari pan kami bas tahun si pepituken adi la suani kami juma kami janah la pepulung kami hasilna?”+
21 Ula kena mbiar, sebap bas tahun si peenemken Kupasu-pasu kari taneh e janah hasil juma e bias man telu tahun.+
22 Isuan kena me juma kena bas tahun si pewaluhken. Tapi si jadi pangan kena seh ngasa tahun si pesiwahken eme hasil rani arah tahun si peenemken, ope lenga banci iperani kena hasil juma kena e.
23 “‘Ula dayaken kena taneh kena man kalak guna jadi jangna seh rasa lalap, sebap jangKu kap taneh e.+ Bas Aku, kena penduduk asing ras penduduk sementara bas negri e.+
24 I belang-belang negri kena, kerina kalak arus lit hakna nebusi taneh si idayakenna.
25 “‘Adi lit kalak Israel jadi mesera pergeluhna janah arus dayakenna tanehna, keluargana si ndehernalah si arus nebusi taneh si dayakenna e.+
26 Adi la lit keluargana si ngasup nebusi taneh si dayakenna e, tapi dungna bayak ia janah enggo ngasup ia nebusi taneh e,
27 arus kirana hasil juma e mulai paksa juma e idayaken, janah si arus galarina eme erga taneh e sanga idayaken ikurangi jumlah hasil juma e. Kenca bage maka taneh e banci mulih man bana.+
28 “‘Tapi adi la lit senna nebusi taneh ndai, taneh e jadi jang si nukur seh asa Tahun Pembebasen.+ Bas tahun e me maka taneh e iulihken man bana janah mulihken jadi jangna.+
29 “‘Adi lit kalak si ndayaken rumahna si lit bas kota si ertembok, lit hakna nebusi rumah e mulihken+ i bas sada tahun mulai kenca rumah e idayaken.
30 Tapi adi rumah e la itebusi seh ngasa setahun, rumah e jadi jang si nukur ras keturunenna seterusna. Bas Tahun Pembebasen pe rumah e la iulihken man si mpuna.
31 Tapi adi rumah si idayaken e labo bas kota si ertembok, lit hak si mpuna rumah e nebusisa ndigan pe atena. Sebap rumah e ianggap bagin arah taneh si mbelang. Bas Tahun Pembebasen rumah e arus iulihken man si mpuna.
32 “‘Adi kalak Lewi si ndayaken rumahna si lit i salah sada kota kalak e,+ banci tebusina rumah e katawari pe atena.
33 Adi rumah kalak Lewi si lit i kota-kota kalak e la itebusi, rumah e arus iulihken bas Tahun Pembebasen,+ perban rumah-rumah kalak Lewi si lit i tengah-tengah kalak Israel lalap jadi jang kalak Lewi.+
34 Selain si e, mbalmbal+ si lit i sekeliling kota-kota kalak e la banci dayaken, sebap kerina e jadi jang kalak Lewi seh rasa lalap.
35 “‘Adi lit kalak Israel i deher kena si jadi mesera pergeluhna janah la ia ngasup ncariken nakanna, arus sampati kena kalak e+ bagi kena nampati penduduk asing ras penduduk sementara,+ gelah banci ia tetap nggeluh ras kena.
36 Arus mbiar kena man Dibata kena.+ Ula buat kena untung arah ia,+ alu bage kalak Israel e banci tetap nggeluh ras kena.
37 Ula ban kena bungana sanga bere kena ia pinjamen+ janah ula buat kena untung arah pangan si bereken kena.
38 Aku kap Jahwe Dibata kena si maba kena ndarat arah negri Mesir+ nari guna mereken negri Kanaan man kena, guna mbuktiken maka Aku kap Dibata kena.+
39 “‘Adi lit kalak Israel i deher kena si jadi mesera pergeluhna janah dayakenna dirina man kena,+ ula suruh kena ia erdahin bagi sekalak budak.+
40 Banlah man bana bagi si ban kena man sierdahin kena+ ntah pe penduduk sementara. Ia erdahin man kena seh ngasa Tahun Pembebasen.
41 Bas tahun e, lawes ia ras anak-anakna nadingken kena janah mulih ia ku keluargana bage pe mulih ia ku taneh nini bulangna.+
42 Sebap kalak e budakKu si Kubaba ndarat arah Mesir nari.+ Kalak e la banci ndayaken dirina jadi budak.
43 Ula kena kejam man bana,+ arus kena mbiar man Dibata kena.+
44 Banci tukur kena budak kena si dilaki ras si diberu arah bangsa-bangsa si lit i sekeliling kena.
45 Banci ka tukur kena budak kena arah anak-anak kalak asing si tading ras kena+ bage pe arah keluargana si lahir i negri kena. Kalak e banci jadi jang kena.
46 Kalak e banci jadi jang kena rasa lalap janah banci warisken kena man anak-anak kena. Tapi ula kejam perbahanen kena man senina kena kalak Israel.+
47 “‘Tapi adi penduduk asing ntah pe penduduk sementara si lit i negri kena jadi bayak janah lit kalak Israel si jadi mesera pergeluhna ras arus dayakenna bana man penduduk asing ntah pe penduduk sementara e ntah pe man keluarga kalak e,
48 kalak Israel e banci tetap itebus kenca idayakenna bana. Si banci nebusisa eme salah sada seninana,+
49 ntah senina bapakna, ntah anak senina bapakna, ntah salah sada keluargana si sada dareh, ntah pe salah sada kade-kadena. Kalak e me si banci nebusi ia.
“‘Ntah pe ia sendiri si nebusi bana sanga ia enggo jadi kalak bayak.+
50 Guna ngelakoken si e, arus jumpaina kalak si nukur ia. Arus ikira kalak e enggo piga tahun ia ndayaken bana seh ngasa Tahun Pembebasen berikutna.+ Erga ia ndayaken bana arus sebanding ras jumlah tahun e.+ Sedekah ia erdahin, banlah man bana bagi si iban man sierdahin.+
51 Adi melala denga jumlah tahun si sisa seh ngasa Tahun Pembebasen si berikutna, arus reh ergana galarina guna nebusi bana, sue ras jumlah tahun si sisa e.
52 Tapi adi sitik nari ngenca jumlah tahun si sisa seh ngasa Tahun Pembebasen berikutna, reh sitikna me si galarina guna nebusi bana.
53 Sedekah ia erdahin ngelayani tuanna, arus perdiateken kena maka perbahanen tuanna e seri bagi man sierdahinna si deban, janah tuanna e la kejam man bana.+
54 Tapi adi la ia ngasup nebusi bana alu salah sada cara ndai, ia ras anak-anakna arus ibebasken bas Tahun Pembebasen.+
55 “‘BudakKu kap kalak Israel. Kalak e budak-budakKu si Kubaba arah Mesir nari.+ Aku kap Jahwe Dibata kena.
Cataten i teruh
^ Ntah “Tahun Penangtangen.”
