Imamat 26:1-46
26 “‘Ula ban kena dibata-dibata si la erguna.+ Ula ban kena patung si ipahat+ ntah pe tiang-tiang si badia bage pe batu si ipahat+ i bas negri kena guna isembah.+ Sebap Aku kap Jahwe Dibata kena.
2 Arus dalanken kena SabatKu janah arus ergai kena inganKu si badia. Aku kap Jahwe.
3 “‘Adi terus kena nggeluh menurut peraturen-peraturenKu janah terus patuhi kena ras dalanken kena perentah-perentahKu,+
4 Kupenusur udan bas waktuna,+ alu bage taneh mereken hasilna,+ janah kerina batang kayu si lit bas juma kena pe erbuah.
5 Melala kel pagi hasil rani kena. Sanga ngerik gandum denga pe kena enggo ka seh waktuna mperani anggur, janah sanga perani kena denga anggur, enggo ka seh waktuna ngambur benih. Puas kena man roti janah la lit si erban kena mbiar bas negri kena.+
6 Kuban pagi negri kena dame,+ janah sanga kena medem la lit ise pe si erban kena mbiar.+ Kupelawes binatang buas arah negri kena janah la lit pagi pedang si nyerang kena.
7 Pasti ayak-ayak kena musuh kena janah talu kalak e i lebe-lebe kena perban pedang.
8 Lima kalak arah kena nari ngasup pagi naluken 100 kalak, janah 100 kalak ngasup naluken 10.000 kalak. Taluken kena pagi musuh-musuh kena i lebe-lebe kena alu pedang.+
9 “‘Kupasu-pasu pagi kena janah Kuban kena jadi enterem ras lalap reh teremna.+ Pasti Kutepati perjanjinKu ras kena.+
10 Sanga pan kena hasil rani si ndekah, enggo ka arus ambekken kena hasil rani si ndekah e gelah lit ingan man hasil rani si mbaru.
11 Kutama pagi kemahKu i tengah-tengah kena+ eme kemah ingan ersembah janah labo pagi kena Kutulak.
12 Kutemani kena janah Aku jadi Dibata kena,+ kena jadi umatKu.+
13 Aku kap Jahwe Dibata kena si maba kena ndarat arah negri Mesir gelah lanai kena jadi budak kalak e. Aku kap si menggelken pasangen* si nindihi kena gelah banci kena tegak erdalan.
14 “‘Tapi adi la begiken kena Aku, la ikutken kena perentah-perentahKu,+
15 itulak kena peraturen-peraturenKu,+ janah segat ate kena undang-undangKu, alu bage la dalanken kena kerina perentah-perentahKu janah la tepati kena perjanjinKu,+
16 bagenda me si Kulakoken man kena: Kuhukum pagi kena alu kesusahen, penakit TBC* ras demam tinggi, mata kena pe lanai pagi jelas pengidahna, janah keri gegeh kena. Sia-sia kena nuan benih sebap musuh kena si mangani hasilna.+
17 Kutulak pagi kena janah talu kena iban musuh kena.+ Kalak si rate segat man kena perjakina pagi kena+ janah kiam kena amin pe la lit si ngayakisa.+
18 “‘Adi kenca bage pe lalap la begiken kena Aku, Kuhukum me kena pitu kali lipat asangken dosa-dosa kena.
19 Kuhancurken kesombongen kena janah Kuban langit kena bagi besi+ janah taneh kena bagi tembaga.
20 Sia-sia kerina gegeh kena, perban taneh kena la mereken hasil+ janah batang kayu bas negri kena pe la erbuah.
21 “‘Tapi adi lalap denga kena ngelawan janah la nggit megiken Aku, Kuhukum pagi kena pitu kali lipat beratna menurut dosa-dosa kena.
22 Kusuruh binatang-binatang buas reh ku tengah-tengah kena+ jenari bunuhna anak-anak kena+ ras asuh-asuhen kena. Reh sitikna jumlah kena janah melungen dalan-dalan kena.+
23 “‘Tapi adi enggo pe nanami kena si e janah tetap denga kena la nggit ngaloken persingetKu+ ras tetap lawan kena Aku,
24 Kulawan pagi kena janah Kuhukum kena pitu kali lipat beratna menurut dosa-dosa kena.
25 Kuban kena iserang musuh-musuh kena alu pedang, perban la patuhi kena perjanjinKu.+ Sanga kiam kena ku kota-kota kena, Kuban pagi reh penakit ku tengah-tengah kena,+ janah iserahken pagi kena ku musuh kena.+
26 Kenca Kuhancurken persedian* roti* kena,+ sitik nari ngenca kari si tading. Sada alat pemanggang roti ngenca si iperluken sepuluh diberu guna manggang roti. Itimbang kari roti e,+ ibagi-bagiken jenari pan kena, tapi labo kena besur.+
27 “‘Tapi adi enggo pe inanami kena si e janah tetap denga la begiken kena Aku janah lawan kena Aku,
28 reh gegehna Aku ngelawan kena,+ janah Kuhukum kena pitu kali lipat beratna perban dosa-dosa kena.
29 Ban lihena, bunuh kena pagi anak-anak kena si dilaki bage pe si diberu janah pan kena dagingna.+
30 Kuhancurken ingan-ingan kena ersembah+ ras ingan kena nutung kemenyan, jenari Kubenterken mayat-mayat kena ku berhala-berhala kena si la erkesah ras si erban ciga ate.*+ Ciga kel ateKu kena emaka Kutadingken kena.+
31 Kuhancurken kota-kota kena+ janah ingan-ingan kena si badia pe lanai terurus. Lanai Aku nggit nganggeh bau si merim* arah persembahen kena.
32 Kuban negri kena lanai terurus,+ alu bage musuh-musuh kena si tading i je pe sengget ngidahsa.+
33 Kuban kena merap i tengah bangsa-bangsa.+ Kuban kena iayak-ayak alu pedang.+ Negri kena pe lanai terurus+ janah kota-kota kena pe jadi hancur.
34 “‘Sanga kena bas negri musuh, ipediat pagi negri kena la terurus, janah igalari taneh kena sabat-sabatna. Paksa si e, taneh kena ipediat la iperjumai* perban arus igalari taneh e mulihi sabat-sabatna.+
35 Sanga taneh e ipediat la terurus, taneh e la iperjumai, perban sanga kena tading bas taneh e, lalap perjumai kena taneh e sedekah sabat-sabat kena.
36 “‘Kalak si nggeluh denga+ janah si tading i negri musuh pasti Kuban kebiaren. Sora bulung-bulung si ndabuhen pe erban kalak e kiam, amin pe la lit si ngayakisa. Kiam pagi kalak e bagi tempa iayaki alu pedang janah jongkang* kalak e.+
37 Bali bagi kalak si kiam arah pedang nari, jongkang kalak e janah ndabuhen, amin pe la lit si ngayakisa. Labo pagi kena ngasup ngelawan musuh-musuh kena.+
38 Kernep kena bas negri+ musuh kena janah keri kena ibendut negri musuh kena.
39 Rate mesui pagi kalak si tading si nggeluh denga i negri musuh+ perban kesalahenna. Maciken pagi daging kalak e perban dosa-dosa nini bulang kalak e.+
40 Kenca si e, akui kalak e pagi maka kalak e bage pe nini bulangna ersalah ras la setia.+ Akui kalak e pagi maka enggo ilawanna Aku janah la kalak e setia man bangKu.+
41 Emaka Kulawan kalak e+ janah Kubaba ku negri musuh-musuhna.+
“‘Ntah banci pagi berubah pusuhna si mekeng e jadi meteruk ukur,+ jenari tebusna kesalahenna.
42 Janah Kuinget pagi perjanjin si Kuban ras Jakup,+ ras Isak,+ bage pe ras Abraham.+ Labo Aku lupa kerna negri si Kujanjiken man kalak e.
43 Sedekah itadingken, negri e la iurus janah galarina sabat-sabatna.+ Galari kalak e kesalahenna perban tulakna undang-undangKu janah segat atena peraturen-peraturenKu.+
44 Amin pe bage, sanga kalak e bas negri musuh, labo tuhu-tuhu Kutulak kalak e+ ntah pe Kutadingken seh ngasa kernep. Perban adi bage Kuban, Kulanggar perjanjinKu+ ras kalak e, sebap Aku kap Jahwe Dibata kalak e.
45 Guna kepentingen kalak e, Kuinget pagi perjanjinKu ras nini bulang kalak e+ si enggo Kubaba ndarat arah Mesir nari, arah lebe-lebe bangsa-bangsa+ guna mbuktiken maka Aku kap Dibata kalak e. Aku kap Jahwe.’”
46 Enda ndai me peraturen-peraturen ras undang-undang si ibereken Jahwe man kalak Israel arah Musa i Gunung Sinai.+
Cataten i teruh
^ Pasangen eme alat si biasa itama ku kuduk manusia ntah pe binatang guna maba baban.
^ Ntah “tuberkulosis.”
^ Ntah “pangan.”
^ As. “tongkat.” Banci jadi ingan nggantungken roti si bentukna bagi gelang.
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “si erban meriah.”
^ Ntah “taneh kena ndalanken Sabat.”
^ Ntah “guling.”
