Imamat 27:1-34
27 Nina Jahwe ka man Musa,
2 “Bagendalah nindu man kalak Israel, ‘Adi lit kalak erban janji khusus+ man Jahwe guna mpersembahken sen si buena asa erga sekalak jelma, enda me ergana:
3 Dilaki si umurna antara 20 tahun seh ku 60 tahun ergana 570 gram* pirak, menurut timbangen si biasa ipake bas ingan si badia,
4 tapi adi diberu ergana 342 gram* pirak.
5 Si umurna antara 5 tahun seh ku 20 tahun, adi dilaki ergana 228 gram* pirak, adi diberu ergana 114 gram* pirak.
6 Si umurna sada bulan seh ku lima tahun, adi dilaki ergana 57 gram* pirak, adi diberu ergana 34,2 gram* pirak.
7 “‘Si umurna 60 tahun ku datas, adi dilaki ergana 171 gram* pirak, adi diberu ergana 114 gram* pirak.
8 Adi kalak si erjanji e la ngasup nggalari erga si enggo itetapken+ perban mesera kel pergeluhna, arus babana kalak si atena berekenna e man imam. Tentuken imam me sekai erga kalak e menurut kengasupen kalak si erjanji ndai.+
9 “‘Adi lit si erjanji mereken binatang jadi persembahen man Jahwe, binatang kai pe si berekenna man Jahwe ianggap badia.
10 La banci tukarkenna ntah pe gantina binatang e alu binatang si sehat ntah pe si la sehat. Adi tukarna ras binatang si deban, duana binatang e ianggap badia.
11 Adi si berekenna e binatang si ipantangken+ si la banci persembahkenna man Jahwe, arus babana binatang e ku imam.
12 Imam me si nentuken erga binatang e menurut keadan binatang e, erga si itentuken imam la banci iubah.
13 Tapi adi tebusina atena binatang e, arus galarina menurut erga binatang e janah arus tambahina seperlima nari arah erga binatang e.+
14 “‘Adi lit kalak si atena mereken rumahna guna ipebadia man Jahwe, imam si nentuken ergana menurut keadan rumah e. Asa kai pe erga si enggo itentuken imam, ase me erga rumah e.+
15 Tapi adi tebusina atena rumahna e, arus galarina asa erga si enggo itentuken janah arus tambahina seperlima arah erga rumah e. Jenari man bana mulihi rumah e.
16 “‘Adi lit si atena mereken deba arah jumana man Jahwe, erga juma e itentuken arah asa kai buena benih si banci isuan i juma e. Adi 130 kilo* benih, erga juma e 570 gram* pirak.
17 Adi juma e berekenna mulai bas Tahun Pembebasen,*+ erga juma e la berubah.
18 Adi juma e berekenna kenca Tahun Pembebasen, arus tentuken imam erga juma e alu ngkira piga tahun nari maka seh ku Tahun Pembebasen berikutna. Emaka erga juma e pasti reh murahna.+
19 Tapi adi tebusina atena jumana e, arus galarina asa erga si enggo itentuken janah arus tambahina seperlima arah erga jumana e. Jenari man bana mulihi juma e.
20 Adi la tebusina juma e janah juma e enggo idayaken man kalak si deban, lanai banci tebusina jumana e.
21 Bas Tahun Pembebasen, sanga juma e enggo bebas, juma e ibereken man Jahwe janah ianggap badia. Juma e jadi jang imam-imam.+
22 “‘Adi juma si ibereken kalak ndai man Jahwe labo juma warisen tapi juma si itukur,+
23 erga juma e itentuken imam arah piga tahun nari maka seh ku Tahun Pembebasen berikutna. Bas wari e arus galari si mereken juma e menurut erga si enggo itentuken ndai.+ Sebap e badia man Jahwe.
24 Bas Tahun Pembebasen, juma e iulihken man si mpuna, eme man kalak si ndayakenca mbarenda.+
25 “‘Kerina erga arus itentuken menurut timbangen si biasa ipake bas ingan si badia eme sekel.* Sada sekel seri beratna ras 20 gera.*
26 “‘Tapi, anak si pertama arah binatang la banci ipersembahken, sebap mulai lahir nari pe enggo jang Jahwe kap e.+ La soal e lembu ntah pe biri-biri, jang Jahwe kap e.+
27 Adi binatang e binatang si ipantangken janah lit si atena nebusisa menurut erga si enggo itentuken, arus galarina asa erga si enggo itentuken e janah arus tambahina seperlima arah erga e.+ Tapi adi la itebusi, binatang e idayaken menurut erga si enggo itentuken.
28 “‘Tapi kai pe si enggo ipersembahken man Jahwe alu la ersyarat, la soal e manusia, binatang ntah pe juma, la banci idayaken ntah pe itebusi. Kerina si enggo ipersembahken e badia man Jahwe.+
29 Tapi kalak si enggo itentuken guna ihukum mate la banci itebusi,+ ia arus ibunuh.+
30 “‘Sepersepuluh+ arah hasil taneh kena, la soal e arah juma ntah pe buah arah batang kayu, kerina e jang Jahwe. Badia kap e man Jahwe.
31 Adi lit si atena nebusi bagin si sepersepuluh e, arus galarina menurut erga si enggo itentuken janah arus tambahina seperlima nari arah erga e.
32 Sanga lembu, kambing, ntah pe biri-biri ikira, tiap binatang si pe-10-ken si lewat i teruh tongkat permakan arus ibereken man Jahwe janah ianggap badia.
33 La banci ipereksa permakan sehat ntah lang binatang e janah la banci itukarna ras binatang si deban. Adi tukarna denga alu binatang si deban, duana binatang e ianggap badia+ janah la banci itebus.’”
34 Enda ndai me perentah-perentah si ibereken Jahwe man kalak Israel arah Musa bas Gunung Sinai.+
Cataten i teruh
^ As. “10 sekel.”
^ As. “3 sekel.”
^ As. “10 sekel.”
^ As. “50 sekel.”
^ Ntah “Tahun Penangtangen.”
^ 1 gera = 0,57 gram.
