Imamat 3:1-17
3 “‘Adi bereken kena lembu jadi korban persadan+ i lebe-lebe Jahwe, arus bere kena lembu si sehat, la soal jantanna ntah pe beruna.
2 Tama tan kena ku takal lembu e janah geleh lembu e i pintu masuk kemah perjumpan. Imam-imam keturunen Harun si mercikken dareh lembu e ku kerina bagin ingan nutung* persembahen.
3 Deba arah korban persadan e arus ipersembahken jadi persembahen si itutung alu api man Jahwe,+ eme lemak+ si nutupi ususna ras si lit i sekelilingna,
4 duana ginjalna si lit i deher awakna bage pe kerina lemakna, ras lemak si lit bas atena.+
5 Imam-imam keturunen Harun si nutung kerina e i datas persembahen tutungen si itutung i datas ranting bas ingan nutung persembahen.+ Enda ndai me persembahen si itutung alu api, si merim* akap Jahwe.+
6 “‘Adi bereken kena biri-biri ntah pe kambing jadi korban persadan man Jahwe, arus bere kena si sehat, la soal jantanna ntah pe beruna.+
7 Adi bereken kena biri-biri jantan si nguda jadi persembahen, babalah e ku lebe-lebe Jahwe.
8 Tama tan kena ku takal biri-biri e janah geleh i pintu masuk kemah perjumpan. Anak-anak Harun si mercikken darehna ku kerina bagin ingan nutung persembahen.
9 Arus ka persembahkenna lemak arah korban persadan e janah tutungna alu api man Jahwe.+ Bagin-bagin si ipersembahken eme ikurna si erlemak si lit i deher tulang punggung, lemak si nutupi usus ras si lit i sekelilingna,
10 duana ginjalna si lit i deher awakna bage pe kerina lemakna, ras lemak si lit bas atena.+
11 Kenca si e itutung imam kerina e bas ingan nutung persembahen gelah ku das asapna. Enda ndai me pangan* si jadi persembahen si itutung alu api man Jahwe.+
12 “‘Adi kambing si persembahken kena, babalah e ku lebe-lebe Jahwe.
13 Tama tan kena ku takal kambing e janah geleh i pintu masuk kemah perjumpan. Anak-anak Harun si mercikken darehna ku kerina bagin ingan nutung persembahen.
14 Bagin si arus ipersembahken jadi persembahen si itutung alu api man Jahwe eme lemak si nutupi ususna bage pe kerina lemak si lit i sekeliling ususna,+
15 duana ginjalna si lit i deher awakna bage pe kerina lemakna, ras lemak si lit bas atena.
16 Kenca si e tutung imam kerina e bas ingan nutung persembahen gelah ku das asapna. Enda ndai me pangan* si jadi persembahen si itutung alu api, si merim* akap Dibata. Jahwe kap si mpuna kerina lemak.+
17 “‘I japa pe kena tading, enda ndai me peraturen si arus terus patuhi kena ras keturunen kena: La banci pan kena lemak ntah pe dareh.’”+
Cataten i teruh
^ Ntah “si erban meriah.”
^ As. “roti.” Maksudna eme bagin enda ibuat arah korban persadan si jadi jang Dibata.
^ As. “roti.” Maksudna eme bagin enda ibuat arah korban persadan si jadi jang Dibata.
^ Ntah “erban meriah.”
