Imamat 4:1-35
-
Persembahen dosa (1-35)
4 Kenca si e nina Jahwe man Musa,
2 “Bagendalah nindu man kalak Israel, ‘Adi lit kalak si erdosa perban la sengaja+ ngelakoken kai si ilarang Jahwe, enda si arus ilakoken:
3 “‘Adi lit imam+ si enggo ilantik janah erdosa+ ia jenari banna bangsa enda ikut erdosa, arus persembahkenna man Jahwe lembu si sehat ras nguda denga jadi persembahen guna dosana e.+
4 Arus babana lembu e ku lebe-lebe Jahwe i pintu kemah perjumpan.+ Arus ka tamana tanna ku takal lembu e janah gelehna lembu e i lebe-lebe Jahwe.+
5 Kenca si e imam si enggo ilantik+ e arus babana deba dareh lembu e ku bas kemah perjumpan.
6 Arus celupken imam e jari-jarina ku dareh+ e janah percikkenna dareh e pitu kali+ ku lebe-lebe Jahwe, i lebe-lebe tirai ingan si badia.
7 Arus ka olesken imam e deba dareh e ku tanduk-tanduk ingan nutung* persembahen kemenyan,+ si lit i lebe-lebe Jahwe i kemah perjumpan. Kenca si e arus amburkenna sisa dareh lembu e ku teruh ingan nutung persembahen tutungen+ si lit i pintu masuk kemah perjumpan.
8 “‘Kenca si e arus buat imam kerina lemak lembu persembahen dosa e, termasuk lemak si nutupi ususna ras kerina lemak si lit i sekeliling ususna,
9 duana ginjalna si lit i deher awakna ras kerina lemakna, bage pe lemak si lit bas atena.+
10 Arus buat imam kerina lemak e bagi si ilakokenna man lembu jantan si ipersembahken jadi korban persadan.+ Kenca si e arus tutung imam kerina e i datas ingan nutung persembahen tutungen gelah ku das asapna.
11 “‘Tapi kulit lembu e, dagingna, takalna, betisna, ususna, bage pe kotorenna,+
12 ras kerina bagin si deban arah lembu e arus ibaba ndarat arah perkemahen ku ingan si enggo itentuken eme ku ingan ngambekken abu.* Imam si arus nutung kerina e alu ranting.+ Kerina e arus itutung alu ranting bas ingan ngambekken abu.
13 “‘Adi kerina kalak Israel la sengaja+ ngelakoken dosa janah la kalak e sadar maka enggo lakokenna kai si larang Jahwe,+
14 dungna iteh kalak e dosana e, arus bereken kalak e sada lembu jantan si nguda denga jadi persembahen dosa janah babana ku lebe-lebe kemah perjumpan.
15 Arus tama peminpin-peminpin Israel tanna ku takal lembu e i lebe-lebe Jahwe janah lembu e arus igeleh i lebe-lebe Jahwe.
16 “‘Kenca si e imam si enggo ilantik arus babana deba dareh lembu e ku bas kemah perjumpan.
17 Arus celupken imam e jari-jarina ku dareh e janah percikkenna dareh e pitu kali ku lebe-lebe Jahwe, i lebe-lebe tirai.+
18 Arus ka olesken imam deba dareh ndai ku tanduk-tanduk ingan nutung persembahen+ si lit i lebe-lebe Jahwe i kemah perjumpan. Kenca si e arus amburkenna sisa dareh lembu e ku teruh ingan nutung persembahen tutungen, si lit i pintu masuk kemah perjumpan.+
19 Arus buatna kerina lemak lembu e janah tutungna bas ingan nutung persembahen gelah ku das asapna.+
20 Arus ka persembahkenna lembu e bagi lembu si ipersembahkenna sanga ia erban dosa. Bage si arus ilakoken guna pendamen man kalak e gelah dosa kalak e+ iampuni.
21 Arus ka babana lembu e ku darat perkemahen jenari tutungna bagi si lakokenna man lembu si pertama ndai.+ Enda ndai me persembahen dosa guna kerina kalak Israel.+
22 “‘Adi sekalak peminpin+ erdosa janah ersalah perban la sengaja ngelakoken kai si larang Jahwe Dibatana,
23 ntah adi dungna itehna ia enggo erdosa perban lakokenna kai si larang Dibata, arus persembahkenna sada kambing jantan si sehat janah nguda denga.
24 Arus ka tamana tanna ku takal kambing e janah gelehna kambing e i lebe-lebe Jahwe bas ingan nggeleh persembahen tutungen.+ Enda ndai me persembahen dosa.
25 Arus ka buat imam deba dareh persembahen dosa e alu jari-jarina jenari oleskenna ku tanduk-tanduk+ ingan nutung persembahen tutungen. Kenca si e arus amburkenna sisa dareh kambing e ku teruh ingan nutung persembahen tutungen.+
26 Kerina lemak kambing e arus itutung imam bas ingan nutung persembahen gelah ku das asapna bagi si banna man korban persadan.+ Bage cara imam erban pemindon gelah dosa kalak si ersalah e iampuni. Alu bage iampuni dosana e.
27 “‘Adi lit kalak arah bangsa enda si erdosa janah ersalah perban la sengaja ngelakoken kai si larang Jahwe,+
28 ntah adi dungna sadarina ia enggo erdosa, arus berekenna sada kambing beruna si nguda denga ras sehat jadi persembahen guna dosa si enggo lakokenna e.
29 Arus tamana tanna ku takal kambing si ipersembahken e janah kambing e arus igeleh bas ingan nggeleh persembahen tutungen.+
30 Arus buat imam deba dareh kambing e alu jari-jarina janah oleskenna ku tanduk-tanduk si lit bas ingan nutung persembahen tutungen. Kenca si e arus amburkenna kerina sisa dareh kambing e ku teruh ingan nutung persembahen.+
31 Kerina lemak kambing e arus ibuat imam+ bagi si banna man korban persadan,+ jenari tutungna bas ingan nutung persembahen gelah ku das asapna janah merim* akap Jahwe. Bage cara imam erban pemindon gelah dosa kalak si ersalah e iampuni. Alu bage iampuni dosana e.
32 “‘Tapi adi biri-biri si ibereken jadi persembahen dosa, arus babana biri-biri beruna si sehat janah nguda denga.
33 Arus tamana tanna ku takal biri-biri si ipersembahken e janah biri-biri e arus igeleh jadi persembahen dosa bas ingan nggeleh persembahen tutungen.+
34 Arus buat imam deba dareh biri-biri e alu jari-jarina janah oleskenna ku tanduk-tanduk si lit bas ingan nutung persembahen tutungen.+ Kenca si e arus amburkenna kerina sisa dareh biri-biri e ku teruh ingan nutung persembahen.
35 Kerina lemak biri-biri e arus ibuat imam bagi si banna man biri-biri jantan si nguda denga si jadi korban persadan. Jenari tutung imam lemak e i datas persembahen si itutung alu api man Jahwe bas ingan nutung persembahen gelah ku das asapna.+ Bage cara imam erban pemindon gelah dosa kalak si ersalah e iampuni. Alu bage iampuni dosana e.+
Cataten i teruh
^ Ntah “abu si lit lemakna,” eme abu si tercampur ras lemak korban.
^ Ntah “erban meriah.”
