Imamat 5:1-19
5 “‘Adi lit si ngidah ras si meteh sada perbahanen si salah, ia enggo jadi saksina. Sanga lit pengumumen* maka kalak si ngidahsa ntah pe si metehsa arus ngelaporkenca,+ tapi la laporkenna, ia enggo erdosa janah arus tanggungna akibatna.
2 “‘Adi lit kalak si ngkuit kai pe si najis, misalna bangke binatang si ipantangken, la soal binatang liar, asuh-asuhen, bage pe binatang si kitik,*+ ia enggo najis janah ersalah amin pe la sengaja terkuitna.
3 Adi lit kalak si terkuitna kai pe si najis arah manusia,+ la soal si najis e barang ntah pe jelma, ia jadi najis janah ersalah amin pe dungna maka sadarina.
4 “‘Adi lit kalak terburu-buru erban janji guna ngelakoken kai pe, la soal si mehuli ntah pe si la mehuli, tapi dungna maka isadarina kerna si e, ia ersalah.*+
5 “‘Adi lit kalak si ersalah perban ngelakoken salah sada arah si ndai, ia enggo ersalah emaka arus akuina+ dosana.
6 Arus ka babana persembahen kesalahen man Jahwe guna dosa si enggo ilakokenna e,+ eme sada biri-biri beruna ntah pe kambing beruna si nguda denga jadi persembahen dosa. Kenca si e ipindoken imam kari gelah dosana e iampuni.
7 “‘Adi la ia ngasup mereken sada biri-biri, arus babana man Jahwe dua ndukur ntah pe dua merpati si nguda denga+ jadi persembahen kesalahen guna dosana e, sada guna persembahen dosa janah sada nari guna persembahen tutungen.+
8 Arus ka babana perik-perik e man imam. Imamlah kari si mpersembahken perik-perik e jadi persembahen dosa, kenca si e arus gelehna kerahung perik e tapi la seh ngasa retap.
9 Arus percikken imam deba dareh persembahen dosa e ku dingding ingan nutung* persembahen, tapi sisa darehna e ibanna maler ku teruh ingan nutung persembahen.+ Enda me persembahen dosa.
10 Perik si sada nari arus ipersembahken jadi persembahen tutungen bagi si biasana ilakoken.+ Bage me carana imam erban pemindon gelah dosa kalak si ersalah e iampuni. Alu bage dosana iampuni.+
11 “‘Tapi adi la ia ngasup mereken dua ndukur ntah pe dua merpati si nguda denga, arus berena sada kilo*+ tepung halus jadi persembahen dosa. La banci tamana minak ntah pe kemenyan mbentar ku tepung e, sebap tepung e persembahen dosa.
12 Arus babana tepung e man imam jenari ibuat imam me sengkerauk si jadi tanda maka tepung e enggo ipersembahken. Itutung imam me persembahen e man Jahwe i datas persembahen si enggo itutung alu api gelah ku das asapna. Enda me persembahen dosa.
13 Bage me carana imam erban pemindon gelah ise pe si ngelakoken salah sada arah dosa e ndai banci iampuni.+ Sisa persembahen e jadi bagin imam,+ bali bagi persembahen pangan.’”*+
14 Kenca si e nina Jahwe ka man Musa,
15 “Adi lit kalak si la setia perban la sengaja erdosa nandangi kai pe si enggo ipebadia man Jahwe,+ arus babana man Jahwe sada biri-biri jantan si sehat jadi persembahen kesalahen.+ Imam me si nentuken piga sekel* pirak erga biri-biri e, menurut timbangen si biasa ipake bas ingan si badia.+
16 Arus ka galarina ganti rugi perban enggo erdosa ia nandangi kai si badia, janah arus ka tambahina seperlima arah erga persembahenna ndai.+ Arus berekenna e man imam janah imam me si mpersembahken biri-biri jantan si jadi persembahen kesalahen e gelah dosana iampuni.+ Alu bage dosana iampuni.+
17 “Adi lit kalak si erdosa perban lakokenna kai si larang Jahwe, aminna pe lalap la sadarina, tetap ia ersalah janah arus tanggungna akibatna.+
18 Arus babana man imam sada biri-biri jantan si sehat menurut erga si enggo itetapken guna persembahen kesalahen.+ Kenca si e iban imam pemindon gelah dosana iampuni. Alu bage iampuni me dosana si la sengaja ilakokenna janah si lalap la isadarina.
19 Enda me persembahen kesalahen, perban ia enggo erdosa man Jahwe.”
Cataten i teruh
^ As. “sumpah.” Mungkin enda pengumumen kerna sada kesalahen, termasuk numpahi kalak si ersalah ntah pe numpahi kalak si la nggit ersaksi amin pe idahna kejadinna.
^ Mungkin maksudna erbage-bage binatang si kitik si nggeluh erkelompok.
^ Mungkin perban la tepatina janjina e.
