Imamat 8:1-36
-
Harun ras keturunenna ilantik jadi imam (1-36)
8 Nina Jahwe ka man Musa,
2 “Lebuhlah Harun ras anak-anakna+ janah baba baju+ man imam, minak pelantiken,+ lembu jantan guna persembahen dosa, dua biri-biri jantan, ras keranjang ingan roti si la itama ragi.+
3 Kenca bage suruh kerina kalak Israel pulung i pintu masuk kemah perjumpan.”
4 Kenca si e lakoken Musa bagi si perentahken Jahwe man bana, janah pulung kerina kalak Israel i pintu masuk kemah perjumpan.
5 Nina Musa man kalak si pulung e, “Enda me si perentahken Jahwe gelah silakoken.”
6 Emaka ibaba Musa me Harun ras anak-anakna ku lebe janah suruhna kalak e mbersihken dirina alu lau.+
7 Kenca si e pakeken Musa jubah+ man Harun, ikat pinggang,+ rompi si gedang,+ ras epod,*+ janah iketkenna tali pinggang+ epod e alu nteguh gelah ula ergeser epod e.
8 Kenca si e pasangna ka penutup dada+ janah tamana Urim ras Tumim*+ bas penutup dada e.
9 Dung e pakekenna ka penutup takal+ ku Harun, ras iketna lempengen emas si erndilap i lebe-lebe penutup takal e, si jadi tanda maka Harun enggo pisahken Dibata.+ Kerina e ilakoken bagi si perentahken Jahwe man Musa.
10 Kenca si e buat Musa minak pelantiken jenari percikkenna ku kemah ingan ersembah ras ku kerina isina+ guna mpebadiakenca.
11 Dung e percikkenna ka pitu kali ku ingan nutung* persembahen bage pe ku kerina perlengkapenna, ku baskom ras nahena guna mpebadiakenca.
12 Dungna amburkenna deba minak pelantiken e ku takal Harun janah lantikna ia guna ndalanken pelayanen si badia.+
13 Kenca si e baba Musa anak-anak Harun ku lebe janah pakekenna jubah man kalak e, ikat pinggang, jenari pakekenna penutup takal man kalak e,+ bagi si perentahken Jahwe man Musa.
14 Kenca si e ibaba Musa lembu jantan guna persembahen dosa jenari itama Harun ras anak-anakna tanna ku takal lembu e.+
15 Dung e igeleh Musa lembu e janah buatna darehna+ alu jari-jarina jenari oleskenna ku kerina tanduk si lit bas ingan nutung persembahen. Ipebadiana ingan nutung persembahen e arah dosa nari, tapi sisa dareh lembu e iamburkenna ku teruh ingan nutung persembahen gelah ingan e jadi badia ras bersih.
16 Kenca si e ibuatna kerina lemak si nutupi ususna, lemak si lit bas atena, duana ginjalna ras lemakna, jenari itutung Musa kerina bas ingan nutung persembahen gelah ku das asapna.+
17 Kenca si e bagin si deban arah lembu e eme kulitna, dagingna, ras kotorenna itutungna i darat perkemahen+ bagi si perentahken Jahwe man Musa.
18 Kenca si e ibaba Musa biri-biri jantan guna persembahen tutungen ku lebe. Jenari tama Harun ras anak-anakna tanna ku takal biri-biri e.+
19 Igeleh Musa biri-biri e jenari percikkenna darehna ku kerina bagin ingan nutung persembahen.
20 Ipotong-potong Musa biri-biri e jenari tutungna radu ras takalna bage pe lemak si lit bas ginjalna gelah ku das asapna.
21 Burihi Musa usus ras betis biri-biri e alu lau, jenari tutungna kerina i datas ingan nutung persembahen gelah ku das asapna. Enda me persembahen tutungen si merim* akap Jahwe. Persembahen e itutung alu api man Jahwe bagi si perentahkenNa man Musa.
22 Kenca si e ibaba Musa biri-biri jantan si peduaken ku lebe, eme biri-biri guna pelantiken,+ jenari tama Harun ras anak-anakna tanna ku takal biri-biri e.+
23 Igeleh Musa biri-biri e janah buatna deba darehna jenari tamana ku cuping Harun si arah kanan ras jempol tanna si arah kanan bage pe ku jempol nahena si arah kanan.
24 Kenca si e baba Musa anak-anak Harun ku lebe, jenari buatna deba dareh biri-biri ndai janah tamana ku cuping kalak e si arah kanan ras jempol tanna si arah kanan bage pe ku jempol nahena si arah kanan. Tapi sisa dareh biri-biri e percikkenna ku kerina bagin ingan nutung persembahen.+
25 Kenca si e buat Musa ka lemakna, eme ikurna si erlemak, kerina lemak si nutupi ususna, lemak si lit bas atena, duana ginjalna ras lemakna, ras lemak si lit bas nahe kananna.+
26 Ibuatna sada roti si bentukna kibul, sada roti si bentukna bagi gelang,+ ras sada roti si menipes arah keranjang ingan roti si la itama ragi,+ si lit i lebe-lebe Jahwe. Dung e tamana i datas lemak ras nahe kanan biri-biri ndai.
27 Kenca si e tamana kerina e ku tan Harun ras anak-anakna jenari ayunkenna jadi persembahen si iayunken man Jahwe.
28 Kenca si e buat Musa kerina e arah tan kalak e nari, jenari tutungna i datas persembahen tutungen bas ingan nutung persembahen gelah ku das asapna. Enda me persembahen pelantiken si merim* akap Jahwe, enda me persembahen si itutung alu api man baNa.
29 Kenca si e buat Musa dada biri-biri ndai janah ayunkenna jadi persembahen si iayunken i lebe-lebe Jahwe.+ Bagin e me si jadi jang Musa arah persembahen pelantiken ndai, bagi si perentahken Jahwe man Musa.+
30 Buat Musa ka deba minak pelantiken+ bage pe dareh si lit bas ingan nutung persembahen jenari percikkenna ku Harun ras anak-anakna bage pe ku baju kalak e. Bage me ia erban Harun ras anak-anakna+ bage pe baju kalak e jadi badia.+
31 Kenca si e nina Musa man Harun ras anak-anakna, “Belgang+ kenalah daging e i pintu masuk kemah perjumpan janah pan kenalah e ras roti si lit bas keranjang pelantiken. Enda arus pan kena perban bage me si iperentahken man bangku.+
32 Adi lit sisa daging ras roti e, arus itutung.+
33 Pitu wari dekahna kena la banci lawes arah pintu masuk kemah perjumpan, seh asa dung wari pelantiken kena, perban perlu pitu wari dekahna guna ngelantik kena jadi imam.+
34 Silakoken kerina enda bas wari enda perban e perentah Jahwe, gelah dosa-dosa kena banci iampuni.+
35 Pitu wari dekahna kena arus tetap tading i pintu masuk kemah perjumpan suari ras berngi,+ janah lakokenlah kai si iperentahken Jahwe man kena+ gelah ula kena mate. Enda me si iperentahken man bangku.”
36 Lakoken Harun ras anak-anakna kerina si perentahken Jahwe arah Musa.
