Imamat 9:1-24
-
Ipersembahken Harun persembahen guna pelantiken (1-24)
9 Bas wari pewaluhken,+ lebuh Musa me Harun ras anak-anakna bage pe peminpin-peminpin kalak Israel.
2 Nina man Harun, “Buatlah sada anak lembu si nguda denga jadi persembahen dosa+ ras sada biri-biri si sehat jadi persembahen tutungen. Persembahkenlah e i lebe-lebe Jahwe.
3 Bagendalah nindu man kalak Israel, ‘Babalah sada kambing jantan jadi persembahen dosa. Baba ka sada lembu jantan ras sada biri-biri si nguda denga jadi persembahen tutungen. Binatang e umurna arus setahun ras sehat.
4 Selain si e, baba ka sada lembu jantan ras sada biri-biri jantan jadi korban persadan.+ Persembahkenlah e i lebe-lebe Jahwe. Buat ka persembahen pangan*+ si icampur ras minak, sebap bas wari enda cidahken Jahwe diriNa man kena.’”+
5 Emaka kerina si perentahken Musa ibaba kalak e ku lebe-lebe kemah perjumpan. Jenari kerina kalak e pulung janah tedis i lebe-lebe Jahwe.
6 Nina Musa, “Enda me si perentahken Jahwe gelah lakoken kena, alu bage kemulian Jahwe banci reh ku kena.”+
7 Kenca si e nina Musa man Harun, “Laweslah kam ku ingan nutung* persembahen janah persembahken persembahen dosa+ ras persembahen tutungenndu, jenari banlah pemindon gelah kam+ ras keluargandu iampuni. Persembahken ka persembahen arah bangsa enda+ janah ban pemindon gelah dosa kalak e iampuni,+ bagi si perentahken Jahwe.”
8 Mis lawes Harun ku ingan nutung persembahen janah gelehna anak lembu guna persembahen dosa man dirina.+
9 Kenca si e ibuat anak-anak Harun dareh lembu e jenari berekenna man Harun. Celupken Harun jari-jarina ku dareh e,+ janah oleskenna ku kerina tanduk si lit bas ingan nutung persembahen janah sisa dareh e amburkenna ku teruh ingan nutung persembahen.+
10 Arah persembahen dosa ndai, tutung Harun lemak ras ginjalna bage pe lemak si lit bas atena bas ingan nutung persembahen, gelah ku das asapna bagi si perentahken Jahwe man Musa.+
11 Janah daging ras kulitna itutung i darat perkemahen.+
12 Kenca si e geleh Harun persembahen tutungen jenari buat anak-anakna darehna janah berekenna man bana. Dung e percikkenna dareh e ku kerina bagin ingan nutung persembahen.+
13 Bereken anak-anak Harun ka bagin si deban arah persembahen e bage pe takal persembahen e man Harun, jenari tutung Harun bas ingan nutung persembahen gelah ku das asapna.
14 Kenca si e burihina ususna ras betisna alu lau, jenari tutungna jadi persembahen tutungen bas ingan nutung persembahen gelah ku das asapna.
15 Dung e, persembahken Harun persembahen arah bangsa e. Buatna kambing jadi persembahen dosa guna kalak Israel, gelehna janah persembahkenna bagi persembahen dosa si pertama ndai.
16 Jenari persembahken Harun persembahen tutungen menurut peraturen si enggo itetapken.+
17 Kenca si e persembahkenna persembahen pangan,+ buatna sengkerauk arah persembahen e janah tutungna bas ingan nutung persembahen gelah nangkih asapna, enda me si jadi tambahen guna persembahen tutungen paksa erpagi-pagi.+
18 Kenca si e geleh Harun lembu jantan ras biri-biri jantan guna korban persadan si ibereken bangsa e. Jenari buat anak-anak Harun darehna janah berena man Harun, dung e percikken Harun dareh e ku kerina bagin ingan nutung persembahen.+
19 Buat kalak e ka lemak lembu e,+ ikurna si erlemak, lemak si nutupi ususna, ginjalna, ras lemak si lit bas atena,+
20 jenari kerina e tama kalak e i datas dada binatang ndai, jenari tutung Harun lemak e bas ingan nutung persembahen gelah ku das asapna.+
21 Tapi bagin dadana ras nahena si arah kanan arus ayunken Harun i lebe-lebe Jahwe, bagi si perentahken Musa.+
22 Kenca si e angkat Harun tanna ku datas janah pasu-pasuna bangsa e,+ dung e nusur ia arah ingan nutung persembahen kenca enggo persembahkenna persembahen tutungen ras korban persadan.
23 Dungna masuk Musa ras Harun ku kemah perjumpan jenari ndarat kalak e janah pasu-pasuna kalak Israel.+
Teridah me kemulian Jahwe man kalak e kerina.+
24 Nusur api arah Jahwe,+ jenari panna kerina persembahen tutungen e bage pe lemak-lemak si lit bas ingan nutung persembahen. Ngidah kejadin e ersurak janah sujud kalak e kerina.+
