Jakup 1:1-27
1 Surat enda arah Jakup nari,+ sekalak budak Dibata ras budak Tuan Jesus Kristus. Surat enda man kena kerina 12 suku si lit bas erbage-bage ingan.
Mejuah-juah!
2 O turang seninaku, ermeriah ukurlah kena sanga ngadapi erbage-bage percuban.+
3 Sebap bagi si enggo teh kena, adi kiniteken kena enggo teruji, kena jadi kalak si paguh.*+
4 Teruslah kena ertahan* seh ku tujunna, alu bage banci kena sempurna janah lengkap bas kerinana, la kurang kai pe.+
5 Emaka adi lit bas kena si kurang pentar, teruslah ia mindo man Dibata,+ pasti alokenna.+ Sebap meriah akap Dibata melala mere man kerina kalak, labo Ia merawa.+
6 Tapi teruslah pindona alu kiniteken,+ ula sitik pe ragu,+ perban kalak si ragu seri ras gelombang laut si embus angin ku jah ku je.
7 Sebap, kalak si bage la banci ngarapken kai pe arah Jahwe.*
8 Kalak si erdua ukur,+ berubah-ubah lalap perbahanenna.
9 O turang senina si mesera geluhna, ermeriah ukurlah adi kena ipeganjang.+
10 Ermeriah ukurlah kena si bayak, adi kena ipeteruk,+ perban kalak bayak kernep pagi bagi bunga dukut.
11 Bagi sinuan-sinuan si kerah perban kena las matawari, si bungana naktaken janah lanai mejile, kalak bayak pe kernep sanga ayakina kebayaken.+
12 Ermeriah ukurlah kalak si ertahan* bas erbage-bage percuban,+ sebap adi ngena ate Dibata man bana, datna mahkota kegeluhen+ si enggo janjiken Jahwe* man kalak si terus engkelengi Ia.+
13 Adi lit kalak si ngadapi percuban, ula min nina, “Aku sangana icubai Dibata.” Perban Dibata la banci icubai, janah ise pe labo cubaiNa alu si jahat.
14 Tapi tiap kalak icubai sanga itarik janah igoda alu sura-surana.+
15 Kenca sura-sura e reh belinna, turah me dosa. Adi dosa e enggo ilakoken, akibatna kematen.+
16 O turang senina si kukelengi, ula kena tertipu.
17 Kerina pemere si mehuli ras hadiah si sempurna, rehna arah datas,+ eme arah Bapak, Sumber terang.+ La pernah Ia berubah bagi bayang-bayang.+
18 Perban peratenNa, bereNa kita kegeluhen arah kataNa si benar,+ gelah kita ipilihNa jadi si pertama arah kerina ciptanNa.+
19 O turang senina si kukelengi, ingetlah: Tiap kalak arus meter megiken, ula mis ngerana,+ janah ula mis merawa.+
20 Sebap rawa manusia labo maba kai si benar i lebe-lebe Dibata.+
21 Emaka ambekkenlah kai pe si najis ras kerina si la mehuli.+ Alokenlah alu meteruk ukur kata si isuan Dibata si banci nelamatken kena.
22 Lakokenlah kai si kataken Dibata,+ labo megi-megi saja. Ula tipu diri kena alu cara rukur si salah.
23 Kalak si megi kata Dibata tapi la lakokenna,+ bali ia ras kalak si ngidah ayona bas cermin.
24 Idahna ia bas cermin e, jenari lawes ia, dung e mis ia lupa uga penampilenna.
25 Tapi kalak si perdiatekenna undang-undang si sempurna+ si maba kebebasen, janah terus lakokenna undang-undang e, ia kap kalak si ngelakoken kata Dibata, ia labo kalak si megi-megi saja ngenca jenari lupa. Ermeriah ukur ia perban lakokenna kai si begina.+
26 Adi lit si akapna ia kalak si eragama tapi la jagana dilahna,+ tipuna kap bana janah sia-sia ia eragama.
27 Agama si bersih ras la najis menurut Dibata, Bapakta, eme: ngurus anak si la ernande ras si la erbapa,+ kalak si enggo janda+ si lit bas kesusahen,+ janah sijaga banta gelah ula icedai doni enda.+
