Jakup 3:1-18
3 O turang seninaku, labo kerina kena arus jadi guru. Bagi si enggo teh kena, kalak si jadi guru, beraten kap pagi penghakimenna.+
2 Kerina kita rusur erban salah.*+ Adi lit kalak si la pernah salah ngerana, sempurna kap ia janah banci kuasaina bana.
3 Adi siban nali kekang bas babah kuda gelah patuh ia man banta, kita kap si nguasai kuda e.
4 Bage pe kapal, amin pe galang kel kapal e janah iembus angin meter, banci atur juru mudi dalanna ku japa pe alu kemudi si kitik kel.
5 Bage ka pe dilah, dilah bagin si kitik bas dagingta, tapi banci ia tual ngerana. Kerangen si mbelang banci itutung alu api si seh kel kitikna!
6 Dilah pe bali ras api.+ Dilah, bagin dagingta si dem alu kejahaten, perban banci banna kerina dagingta najis+ janah kernepkenna kegeluhenta, bagi Gehena.*
7 Manusia ngasup erban kerina binatang jadi jinak, janah enggo jinak banna binatang buas, perik, binatang si njoler,* bage pe si lit bas laut.
8 Tapi ise pe la ngasup pelemuk dilah. Dilah e berbahaya janah la terkuasai, dem racun si erban mate.+
9 Dilah e sipake guna muji Jahwe,* Bapakta. Tapi sipake ka guna numpahi kalak si deban, si enggo iciptaken “bali ras sipat Dibata.”+
10 Arah babah e ka, sipuji kalak janah sisumpahi.
O turang seninaku, si enda kerina arusna la terjadi.+
11 Banci kin ndarat lau si ntebu ras lau si pagit arah sada sumber lau si seri?
12 O turang senina, me labo banci batang ara buahna buah saitun, janah batang anggur buahna buah ara?+ Sumber lau si masin pe labo banci ntebu launa.
13 Ise arah kena si pentar ras erpengangka? Adi lit, arus mehuli perbahanenna, janah kerina perbahanenna lembut, si e rehna arah kepentaren.
14 Tapi adi lit ate cian bas pusuh kena+ janah nggit rubati,*+ ula banggaken kena kepentaren kena e,+ janah ula kena erbual.
15 Kepentaren enda labo rehna surga nari, tapi doni nari+ si sipatna bagi binatang ras bagi malekat jahat.
16 I ja lit cian ate ras nggit rubati,* i je lit keadan si kacau ras erbage-bage kejahaten.+
17 Tapi kepentaren si rehna surga nari, si pertama eme bersih,+ nggit erdame,+ masuk akal,+ nggit patuh, dem perkuah ate janah ngelakoken si mehuli,+ la mbeda-bedaken,+ la munapik.+
18 Selain si e, buah perbahanen si mehuli isuan bas keadan si dame+ man kalak si ngena tena kedamen.*+
Cataten i teruh
^ As. “rusur tertuktuk.”
^ Ntah “merayap.”
^ Ntah banci saja “janah mentingken bana.”
^ Ntah banci saja “ras mentingken bana.”
^ Ntah banci saja “isuan kalak si ngena atena kedamen bas keadan si dame.”
