Jakup 5:1-20
5 Gundari begikenlah kataku, o kalak bayak. Tangislah kena ras ngandung perban kiniseran si nandangi adapi kena.+
2 Erta kena enggo macik, janah paken kena enggo pangani serangga.*+
3 Emas ras pirak kena enggo karaten, janah karatna e jadi saksi maka kena enggo ersalah janah panganina daging kena. Kai si simpan kena bali pagi bagi api bas wari-wari pendungi.+
4 Begikenlah! Kalak si erdahin guna mperani juma kena lalap nderkuh perban la bereken kena upahna, sorana nderkuh e enggo seh ku cuping Jahwe* penguasa malekat.+
5 Mewah kel geluh kena janah sibuk kena ndarami kesenangen i doni enda. Ipebur kena diri* kena guna wari penggelehen.+
6 Hina kena kalak si benar janah bunuh kena. La kin perban si e maka kena ilawan?
7 Dage o turang senina, sabarlah kena seh asa kerehen Tuan.+ Nenlah perjuma-juma, lalap timaina hasil* si merga arah taneh nari. Sabar ia nimai musim perudan, mulai kin reh musim perudan e seh asa dung musim perudan.+
8 Kena pe arus sabar.+ Petetaplah ukur kena, perban wari kerehen Tuan enggo ndeher.+
9 O turang senina, ula kena sipandang-pandangen, gelah ula kena ihakimi.+ Nenlah! Hakim enggo tedis i lebe-lebe pintu.
10 O turang senina, usihlah nabi-nabi si ngerana bas gelar Jahwe.*+ Dat kalak e kiniseran+ janah sabar ia.+
11 Nenlah! Kalak si ertahan* bas kesusahen sikataken ermeriah ukur.+ Enggo begi kena kerna Jop si ertahan* bas kesusahen+ janah idah kena pasu-pasu si bereken Jahwe*+ man bana, alu bage teh kena maka lembut kel kekelengen Jahwe* ras mbelin perkuah ateNa.+
12 O turang senina, si pentingna eme: Ula nai kena ersumpah. Ula kena ersumpah bas gelar langit, ntah doni, ntah pe si debanna. Tapi katakenlah “Ue” adi ue janah “Lang” adi lang,+ alu bage kena labo ihakimi.
13 Lit kin arah kena si sangana dat kiniseran? Teruslah ia ertoto.+ Lit kin arah kena si sangana ermeriah ukur? Endekennalah puji-pujin.*+
14 Lit kin arah kena si sakit? Daraminalah pertua-pertua+ bas runggun, gelah totoken kalak e ia janah minakina+ bas gelar Jahwe.*
15 Pertoton si ibelasken alu kiniteken, banci erban kalak si sakit* jadi sehat, janah sehat ia iban Jahwe.* Selain si e, adina enggo kin lakokenna dosa, iampuni pagi ia.
16 Emaka akuilah dosa kena alu terus terang+ man sada ras si debanna janah totoken kenalah sada ras si debanna gelah malem kena. Toto kalak si benar, mbelin kel pengaruhna.+
17 Elia pe seri perasanna ras kita, tapi sanga tutus tena ertoto gelah ula nusur udan, la nusur udan bas negri e telu setengah tahun dekahna.+
18 Kenca ertoto ka ia mulihken, reh udan langit nari, kenca e taneh mereken hasilna.*+
19 O turang seninaku, adi lit bas kena si nilah arah kebenaren nari, janah sampati kalak si deban ia gelah mulihken,
20 teh kenalah maka ise pe si nampati kalak si erdosa e gelah mulihken ku dalan si benar,+ selamatkenna kap kalak si erdosa e arah kematen janah banna dosana si melala e iampuni.+
Cataten i teruh
^ Ntah “nget-nget.”
^ As. “pusuh.”
^ As. “buah.”
^ Ntah “megenggeng.”
^ Ntah “megenggeng.”
^ Ntah “masmur.”
^ Ntah banci saja “latih.”
^ As. “buahna.”